Read Lengua Sur 2 Reyes 20 Bible Online

2 Reyes 20 - Lengua Sur bible

2 Reyes 20

¹Cháxa eyaqhémókxa axta han apháxamákpo ekyentaxno agko' Ezequías xa ekhem nak, tén axta apye'eykekxo m'a Dios appeywa aplegasso Isaías, Amós apketche. Aptáhak axta apcháneya s'e: —Aptáhak Wesse' egegkok se'e: ‘Elpaqhetchásekxoho sa' ma'a ekheykha nak apxagkok, hakte yetsapok sa'; metaqmelwome'.’

²Appeynchákpek axta appayhékxoho nápakha tegma m'a Ezequías, tén axta aptáha apkelmaxneya Wesse' egegkok se'e:

³“Wesse' ahagkok, éltamhók ko'o exchep kaxénwakxohok apwáxok ektémakxa nak mayenseyam sekyetleykha tén han sekteméssesso naqsók agko', séláneya m'a ekleklamókxa nak xép apwáxok.” Tén axta apkelekxagweyncha'a ekwányam agko'.

⁴Amonye' apteyapma axta Isaías ma'a neyseksa eyáxñe nak ma'a tegma apyawe, keñe appaqhetchesa Wesse' egegkok ma'a Isaías, aptáhak axta apcháneya:

⁵“Etaqhoho eltennássekxa makham Ezequías, apkemha apmonye' nak énxet'ák ahagkok: ‘Aptáhak Wesse' egegkok se'e, cham'a Dios apagkok nak ma'a apyáp nano' David: Ekleg'ak ko'o exchep apkelmaxnagko, ekwet'ak nahan ma'a apaqtégmenek. Eynnaqtéssók sa' makham, wokmek sa' agkok ántánxo ekhem, keñe sa' emyekxak makham ma'a Wesse' egegkok tegma appagkanamap apagkok.

⁶Agkeyásekxak sa' ko'o makham xép quince apyeyam apweynchámeykha. Awagkasek sa' ko'o exchep teyp tén han Jerusalén, neyseksa apmáheyo emok ma'a wesse' apwányam Asiria. Amyók sa' ko'o s'e tegma apwányam nak, eñama seyásekhayo m'a David sekteme axta séláneykha, keñe han sekmeyámáxkoho ahagko' ko'óxa.’”

⁷Apkeltamhók axta Isaías kóllanaksek higo ekyexna élyamaye, kéltekxekkessek axta, keñe kéltexnassásegko ekyetnakxa aplegeykegkoho m'a wesse' apwányam, tén axta aptaqmelwokmo.

⁸Keñe axta Ezequías apkelmaxneyáncha'a m'a Isaías: —¿Yaqsa sa' aqsok magkenatchesso awanchek ko'o hey'ássesagkohok Wesse' egegkok peya hetaqmelchessók, tén han ekwokmo enxoho ántánxo ekhem amyekxak makham ma'a Wesse' egegkok tegma appagkanamap apagkok?

⁹Apchátegmowágkek axta Isaías: —Keso aqsok magkenatchesso yaqwayam sa' egkések Wesse' egegkok, elának ma'a aqsok apkeltennasso axta elána': ¿Apmenyéya kaxog ekhem pessesse agkok ekweykmoho diez kélchánteykegkaxa néten, essenhan kataqhohok natámen?

¹⁰Apchátegmowágkek axta Ezequías: —Yeskohok kaxog ma'a ekhem pessesse agkok. Askehek eyke kataqhegwók.

¹¹Keñe axta Dios appeywa aplegasso Isaías apwóneyncha'a Wesse' egegkok, keñe axta Wesse' egegkok aptaqhéssekmo pessesse ekweykekxoho diez kélchánteykegkaxa néten, cham'a ekxega axta Ahaz tektek apagkok élyetsáteyak ekhem.

¹²Aplegayak axta amya'a wesse' apwányam Babilonia Merodac-baladán, Baladán axta apketche, apháxamákpo Ezequías xa ekhem nak. Apcháphássessegkek axta weykcha'áhak tén han xama aqsok apmésso naqsa, axta eyke apsókasso m'a énxet'ák ektáha axta chá'a apkelápháseykha.

¹³Apkelmeyk axta han takha' m'a Ezequías, apkelxekmóssek axta m'a aqsok élmomnáwa apagkok, sawo élmope élmomnáwa tén han ma'a sawo ekyátekto élmomnáwa, tén han ma'a sokmátsa, tén han pexmok égmenek ektaqmalma, tén han ma'a apxátamakxa nak chá'a apkelmeykha apkenchesso kempakhakma, tén han ma'a ekyókxoho aqsok ekhéyak axta m'a kañe' apxátamakxa axta chá'a aqsok apagkok. Méko axta xama aqsok enxoho mexekmósakxa m'a kañe' nak tegma apyawe apagkok, apwokmók axta apxekmósso m'a ekyókxoho aptémakxa nak chá'a wesse' apwányam.

¹⁴Tén axta m'a Dios appeywa aplegasso Isaías apya'aweykxo m'a wesse' apwányam Ezequías. Aptáhak axta apkelmaxneyáncha'a s'e: —¿Háxko apkeleñamakxa m'a énxet'ák nak? ¿Háxko aptáhakxa apcháneya? Aptáhak axta Ezequías apchátegmowágkokxo s'e: —Apkeleñamak ma'a apkelókxa makhawo' nak; cham'a Babilonia.

¹⁵Apkelmaxneyáha axta makham Isaías: —¿Yaqsa apkelwet'a m'a kañe' tegma apyawe apagkok nak? Apchátegmowágkokxeyk axta Ezequías: —Apkelwet'ak ekyókxoho aqsok ekhéyak nak ma'a kañe'. Méko maxekmósakxa enxoho m'a sekxátamakxa nak chá'a aqsok ahagkok.

¹⁶Tén axta Isaías aptáha apcháneya Ezequías se'e: —Yeyxho sa' Wesse' egegkok appeywa:

¹⁷‘Kammok sa' ekhem yaqwánxa kólsakxak Babilonia m'a ekyókxoho aqsok ekhéyak nak kañe' tegma apyawe apagkok, tén han ekyókxoho aqsok apcháncháseykekxa axta m'a apyapmeyk nano', ekweykmoho s'e negwánxa nak. Méko sa' xama aqsok keytnekxak se'e.

¹⁸Kawomhok sa' kélnaqleykekxa Babilonia nápakha m'a aptawán'ák neptámen apancha'awo' nak, yágkelwán'ák sa' kóltamhagkok, keñe sa' kólteméssesagkok apkeltamheykha m'a kañe' nak wesse' apwányam apxagkok apyawe.’

¹⁹Aptáhak axta Ezequías apchátegmowágkokxo Isaías se'e: —Tásók agko' nak la'a Wesse' egegkok appeywa seseykentegkesso exchek. Hakte xeyenmeyk axta apwáxok keytek meyke ektáhakxa egwáxok tén han ektaqmalma negha neyseksók apha makham ma'a.

²⁰Ektémakxa axta apweynchámeykha Ezequías, tén han megyésseykekxa axta chá'a apkelane aqsok, tén han ektémakxa axta apkeláneya kélyátamakxa yegmen, tén han ma'a yegmen atamnek yaqwayam ey'ásekxak yegmen ma'a tegma apwányam, hágkek eknaqtáxésamaxche m'a weykcha'áhak apagkok axta apkelwesse'e apkelwányam nak Judá.

²¹Xama axta apketsapma Ezequías, apyaqmagkassek axta apteme wesse' apwányam ma'a apketche Manasés.