Read Lengua Sur 2 Reyes 22 Bible Online

2 Reyes 22 - Lengua Sur bible

2 Reyes 22

¹Ocho apyeyam apagkok axta apkeynamo apteme wesse' apwányam Josías treinta y un apyeyam axta apteme wesse' apwányam ma'a Jerusalén. Jedidá axta ekwesey egken, Adaías axta apketche, apkeñama axta m'a yókxexma Boscat.

²Leklamók axta apwáxok Wesse' egegkok ektémakxa aqsok apkelane m'a Josías, hakte apyetlamchek axta ekyókxoho m'a aptémakxa axta m'a David, apyapmeyk nanók axta, meyke apyetnakhásseyam xama enxoho.

³Apcháphássek axta wesse' apwányam Wesse' egegkok tegma appagkanamap apagkok ma'a Safán, aptáxésso axta chá'a weykcha'áhak, Asalías axta apketche, Mesulam axta aptáwen, cham'a ekweykmo axta dieciocho apyeyam apteme wesse' apwányam ma'a Josías. Aptáhak axta apcháneya:

⁴—Ey'ókxa sa' Hilquías, apteme nak apkemha apmonye' apkelmaxnéssesso Dios énxet'ák apagkok, yána sa' yánchásekxak selyaqye kélseykekxa nak chá'a m'a Wesse' egegkok tegma appagkanamap apagkok, tén han apcháncheseykha nak apkeltaqmelchesso átog ma'a nepyeseksa énxet'ák,

⁵keñe sa' elmések ma'a apkelámha apmonye'e nak chá'a apkeltamheykha apkelánamap ma'a Wesse' egegkok tegma appagkanamap apagkok, yaqwayam sa' eyánmagkasek chá'a apkeltamheykha m'a apkeláneykekxa nak tegma appagkanamap,

⁶cham'a apkeláneyak nak yántéseksek, apkelámha apmonye'e apkeltamheykha, tén han apkeláneyak nak chá'a tegma, tén han yaqwayam etegyagkok yántéseksek, tén han meteymog kélyaqtenneykekxa nak, yaqwayam elánekxak ma'a tegma appagkanamap.

⁷Yána sa' han megkólyetsetchásekxeyk ekwánxa apmeykha m'a selyaqye apkelxawéyak, hakte metwasha chá'a apkelmeykha selyaqye m'a.

⁸Apkeltennáseyha axta han Hilquías, apteme nak apkemha apmonye' apkelmaxnéssesso Dios énxet'ák apagkok ma'a Safán, apteme axta aptáxésso chá'a weykcha'áhak, apwetákxo weykcha'áhak segánamakxa m'a Wesse' egegkok nak tegma appagkanamap apagkok; apméssek axta m'a weykcha'áhak, apkelyetsetchek axta m'a Safán.

⁹Tén axta Safán apkeltennásseykxo m'a wesse' apwányam. Aptáhak axta apcháneya: —Apkelpeykesákxeyk apkeláneykha m'a sawo ekmope élmomnáwa ekheykegko nak ma'a tegma appagkanamap, apkelmeyásegkek ma'a apkelánémap nak elánekxak ma'a Wesse' egegkok tegma appagkanamap apagkok.

¹⁰Apkeltennássek axta han Safán ma'a wesse' apwányam, apmésa xama weykcha'áhak ma'a apkelmaxnéssesso Dios énxet'ák apagkok Hilquías; apkelyetsetchessek axta han wesse' apwányam ma'a Safán.

¹¹Xama axta apleg'a wesse' apwányam ektáhakxa ekpeywa m'a weykcha'áhak Wesse' egegkok segánamakxa apagkok, apkelyepteyk axta apkelnaqta,

¹²yetlókok axta apteme apkenagko Hilquías, tén han Ahicam, Safán axta apketche, keñe han Acbor, Micaías axta apketche, tén han Safán, aptáxésso axta chá'a weykcha'áhak, tén han Asaías, appasmeykha nak chá'a aptamheykha wesse' apwányam:

¹³—Hélmaxnéssessekxa hana ko'o Wesse' egegkok, tén han ma'a énxet'ák apkeleymomap nak Israel tén han Judá, ektémakxa ekxeyenma s'e weykcha'áhak ekwetamaxchekxa nak; hẽltaqnaweygkok sa' kexa negko'o m'a Wesse' egegkok, hakte axta yaháxenmók aptémakxa axta apkelanagkama Wesse' egegkok ma'a ẽlyapmeyk nanók axta negko'o, axta han eláneykegkok ekyókxoho ektémakxa nak ektáxésamaxche s'e weykcha'áhak nak.

¹⁴Apxegkek axta Hilquías, Ahicam, Acbor, Safán tén han Asaías, apkelya'aweykxo m'a eklegasso axta Dios appeywa, kelán'a ekwesey axta Huldá, Salum axta aptáwa', Ticvá axta apketche, Harhás axta aptáwen, apkeltaqmelchesso axta chá'a m'a kélxátamakxa nak apáwa m'a tegma appagkanamap. Axta eghak Huldá m'a kaxwe apheykegkaxa axta énxet'ák ma'a Jerusalén, xama axta kélpaqhetchesa,

¹⁵keñe ektáha eyátegmowágko s'e: —Keso aptáhakxa apchátegmowéyak Wesse' egegkok, Dios apagkok nak Israel se'e: ‘Kólteme sa' kólának énxet ektáha nak apkelápháseykha hélmaxnegwaták ko'o,

¹⁶sektáha sekpeywa, ko'o sektáha nak Wesse': Wahak sa' ko'o aqsok ekmaso s'e yókxexma nak, tén han nepyeseksa s'e énxet'ák apheykha nak, ekhawo nak ekyókxoho ekxeyenma s'e weykcha'áhak, apkelyetseta exchek ma'a wesse' apwányam nak Judá.

¹⁷Hakte élyamasmeyk ko'o kéxegke, kélwatnéssegkek han aqsok ekmátsa nak ekpaqneyam éten agkok ma'a mók aqsok kéláyókxa nak, elókassegkek ma'a ekyókxoho aqsok kéllánéyak nak; cháxa keñamak seklawa nak ko'o sektaqnawaya s'e yókxexma nak, megkamassehek nahan sektaqnagko.

¹⁸Kóltennés sa' wesse' apwányam Judá, apkeláphasso exchek kólmaxnegwaták Wesse' egegkok, aptáha han appeywa Wesse' egegkok, Dios apagkok nak Israel se'e: Aphaxnawók axta exchep ma'a aplege nak,

¹⁹apyelaqtéssek axta han apwáxok, apkelyahákxók axta apleg'a sekpeywa peya ko'o wanmexek se'e yókxexma nak, tén han ma'a apheykha nak ma'a, peya kólmasséssamhok apagko', tén han kólmések ekmaso agko' apheykha, apkelyepteyk axta apkelnaqta, apkelekxagweyha axta han nahaqtók ko'o, cháxa keñamak sekhaxnawo nak aptáhakxa. Éltennássek ko'o exchep xa, ko'o sektáha nak Wesse'.

²⁰Cháxa keñamak peya nak ko'o wohok yetsapok xép meyke ektáhakxa, epáxaqwakxak sa' ma'a apyapmeyk nano', metagkehek sa' aqsok ekmaso peya nak ko'o wahak se'e yókxexma nak, tén han nepyeseksa énxet'ák apheykha nak kañe'.’ Apkeltaqháwok axta m'a wesse' apwányam apkeláneykha, yaqwayam esakxések ma'a amya'a nak.