Read Lengua Sur 1 Crónicas 13 Bible Online

1 Crónicas 13 - Lengua Sur bible

1 Crónicas 13

¹Apkelmaxneyáha axta David ma'a apkelámha apmonye'e nak kempakhakma, tén han ma'a énxet'ák apkelámha apmonye'e, cham'a apyókxoho sẽlpextétamo apkelwesse'e nak,

²keñe axta aptáha apkeláneya m'a apyókxoho énxet'ák nak Israel: “Leyawók sa' agkok kélwáxok kéxegke, tén han apkeltamho enxoho Wesse' egegkok Dios, agáphássesek amya'a óláneyha hempásegwaták ma'a egnámakkok apheykencha'a nak makham ma'a ekyókxoho yókxexma nak Israel, keñe han ma'a apyókxoho apkelmaxnéssesso Dios énxet'ák apagkok tén han ma'a levitas, apheykencha'a nak makham ma'a apkelyawakxa nak tegma, keñe han ma'a yókxexma nak,

³yaqwayam sa' hegwakxések ma'a yántéseksek apagkok nak Dios egagkok, hakte yetnegkek aqsa manlányo m'a, eyeynamo m'a aphakxa axta wesse' apwányam Saúl.”

⁴Hawók axta mók apkelpeywa apyókxoho énxet'ák nak yaqwayam etnahagkok, hakte apyókxoho axta payhawok ektáhakxa élchetámeykha apkelwáxok.

⁵Apchánchesákxeyk axta David apyókxoho énxet'ák Israel, eyeynókxa m'a yókxexma Sihor ektemegwánxa nak néxa xapop ma'a Egipto, ekweykekxoho m'a nentaxnamakxa nak Hamat, yaqwayam ewakxak ma'a yántéseksek apagkok nak Dios, ekyetnama nak Quiriat-jearim.

⁶Keñe axta apmahágko m'a Quiriat-jearim, cham'a ekwesey nak han Baalá ekpayho nak Judá, yetlo apkelxegexma'a apyókxoho énxet'ák Israel, yaqwayam esanták ma'a Dios yántéseksek apagkok, cham'a kélwóneykencha'awól'a apwesey Wesse' egegkok, ekyetnama nak aptaháno takhapxet ma'a apkelásenneykha ekha nak apxempenák.

⁷Apchaqxegkessek axta kañe' xama yátnáxeg apyenyawasso axnagko' ma'a Dios yántéseksek apagkok, axta keñamak apwákxo m'a Abinadab apxagkok. Uzá tén han Ahió axta apxegkesso m'a yátnáxeg apyenyawasso nak.

⁸Keñe m'a David tén han apyókxoho énxet'ák nak Israel, apkelxegkek axta m'a apmonye' nak Dios, axta eleyságkohok apkelmeneykmasa tén han apneyweygko, yetlo apkelpáwasso m'a arpa, yát'axpog, aqsok nélaqtáwassól'a, tén han ma'a apkelaqkahasso nak.

⁹Xama axta apkelwákxo m'a yókxexma kélchexakkassamakxa axta chá'a émpe'ék aqsok aktek, apagkok axta m'a Quidón, apya'ássek axta apmek Uzá ekpayhókxa ekyetnakxa m'a yántéseksek, yaqwayam emagkok, hakte kelpelápegwákxeyk axta m'a wey.

¹⁰Aptaqnókkek axta eyke Wesse' egegkok ma'a Uzá, ñókxa apmágwa'akto axta yántéseksek, axta apchaqhohok han ma'a, nápaqto' nak.

¹¹Aplókek axta eyke David ñókxa apchaqha axta Wesse' egegkok ma'a Uzá, axta keñamak apteméssessama ekwesey Peres-uzá xa yókxexma nak, cháxa ekwesey nak, makhemek makham ekteme.

¹²Awanhek axta apkeye David Dios xa ekhem nak, keñe aptáha appeywa s'e: “¡Masakxeyk sa' Dios yántéseksek apagkok!”

¹³Keñe axta mesákxo Dios yántéseksek apagkok ma'a Tegma Apwányam apagkok nak David, axta aqsa apkeltamho kólsakxak ma'a Obed-edom apxagkok, apha nak Gat.

¹⁴Apqántánxo pelten axta ekyetnayam Dios yántéseksek apagkok ma'a Obed-edom apxagkok, keñe axta Wesse' egegkok appasmoma chá'a m'a apketchek nak Obed-edom ekweykekxoho m'a ekyókxoho aqsok apagkok.