Read Lengua Sur 1 Crónicas 15 Bible Online

1 Crónicas 15 - Lengua Sur bible

1 Crónicas 15

¹Apkeltamhók axta kóllánésagkok apxagkok David ma'a Tegma Apwányam apagkok nak David, keñe han apkelánesa yaqwánxa keytek ma'a Dios yántéseksek apagkok.

²Aptáhak axta han se'e: “Énxet'ák levitas sa' aqsa chá'a apwanchek eswok Dios yántéseksek apagkok, hakte Wesse' egegkok axta apkelyéseykha xa énxet'ák nak, yaqwayam etnehek apseykha m'a yántéseksek Wesse' egegkok nak apagkok, yaqwayam enxoho megkamassegwomek apkeltamheykha m'a aphakxa nak.”

³Tén axta apchánchesákxo apyókxoho énxet'ák Israel ma'a Jerusalén, yaqwayam esanták Wesse' egegkok yántéseksek apagkok ma'a apkelánésakxa axta yaqwánxa keytek.

⁴Apchánchesákxeyk axta han ma'a Aarón axta aptawán'ák neptámen, keñe han ma'a levitas.

⁵Ciento veinte axta apyókxoho apchaqnákxo m'a Quehat aptawán'ák neptámen: Uriel axta apkemha apmonye' apagkok xa énxet'ák nak, tén han apnámakkok nak.

⁶Doscientos veinte axta apyókxoho m'a Merarí aptawán'ák neptámen: Asaías axta apkemha apmonye' apagkok xa énxet'ák nak, tén han apnámakkok nak.

⁷Ciento treinta axta apyókxoho m'a Guersón aptawán'ák neptámen: Joel axta apkemha apmonye' apagkok xa énxet'ák nak, tén han apnámakkok nak.

⁸Doscientos axta apyókxoho m'a Elisafán aptawán'ák neptámen: Semaías axta apkemha apmonye' apagkok xa énxet'ák nak, tén han apnámakkok nak.

⁹Ochenta axta apyókxoho m'a Hebrón aptawán'ák neptámen: Eliel axta apkemha apmonye' apagkok xa énxet'ák nak, tén han apnámakkok nak.

¹⁰Ciento doce axta apyókxoho m'a Uziel aptawán'ák neptámen: Aminadab axta apkemha apmonye' apagkok xa énxet'ák nak, tén han apnámakkok nak.

¹¹Keñe axta apkeláneyáncha'a David ma'a Sadoc tén han Abiatar, aptamhéyak axta apkelmaxnéssesso Dios énxet'ák apagkok, tén han ma'a levitas, Uriel, Asaías, Joel, Eliel tén han Aminadab,

¹²aptáhak axta apkeláneya s'e: “Kéxegke, kéltáha nak kélámha kélmonye'e m'a nepyeseksa nak kélhawóxama levitas, kólaxñásekxa sa' kélyempe'ék nápaqtók Wesse' egegkok, yetlo m'a kélteme nak kélnámakkok, yaqwayam enxoho kólewának kólsanták yántéseksek apagkok nak Wesse' egegkok, Dios apagkok nak Israel, cham'a yókxexma sélánesakxa axta yaqwánxa keytek;

¹³hakte háwe axta kéxegke kélseykenta m'a sekxók axta, axta keñamak apchaqhama Dios Wesse' egegkok xama nenxegexma axta negko'o, hakte axta ólmaxneyáha ekpayhawo neykhe antéhek.”

¹⁴Keñe axta apkelmaxnéssesso Dios énxet'ák apagkok tén han levitas, apkeláxñásekxo apyempe'ék nápaqtók Wesse' egegkok, yaqwayam elepwának esanták ma'a Wesse' egegkok yántéseksek apagkok, Dios apagkok nak ma'a Israel.

¹⁵Yámet axta eyke apkelatchásak chá'a nekhaw'ék appatmékxo, cham'a apkeltémókxa axta etnahágkok ma'a Moisés, Wesse' egegkok axta eyke ektáha chá'a apkeltémo etnehek.

¹⁶Apkeltamhók axta han David ma'a apkelámha apmonye'e nak levitas elyésha, yaqwayam etnahágkok apkelmeneykmasso m'a nepyeseksa nak énxet'ák apagkok, yetlo apkelpáwasso m'a arpa, yát'axpog, tén han ma'a ekho nak sokpayhe étkók élyaqye, yaqwayam elpáwaksek yetlo ekmátsa nak ageyxho'.

¹⁷Axta aptemessásak levitas ma'a Hemán, apketche nak Joel, tén han Asaf, apketche nak Berequías, apteme apnámakkok nak Hemán; Merarí aptawán'ák neptámen, keñe han ma'a apteme apnámakkok apmonye'e axta, cham'a Etán, apketche nak Cusaías;

¹⁸axta han aptemessásegkok ma'a pók apteme apnámakkok apmonye'e axta, ektáhakxa nak kóneg apkeltamheykha: Zacarías, Jaaziel, Semiramot, Jehiel, Uní, Eliab, Benaías, Maaseías, Matatías, Elifelehu, Mecneías, kenhan ma'a ektáha nak apkeltaqmelchesso átog, cham'a Obed-edom tén han ma'a Jeiel.

¹⁹Keso ektáha axta apkelmeneykmasso, kélyéseykha axta chá'a yaqwayam elaqtáwaksek ma'a ekho nak sokpayhe étkók élyaqye, élánamáxche nak sawo ekyexwase: Hemán, Asaf tén han Etán.

²⁰Zacarías, Aziel, Semiramot, Jehiel, Uní, Eliab, Maaseías tén han Benaías, cháxa ektáha axta apkelpáwasso chá'a m'a yát'axpog ektáhakxa nak netna'awók apkelpáwá, ektémól'a chá'a elpáwaksek ma'a elamitas,

²¹keñe m'a Matatías, Elifelehu, Mecneías, Obed-edom, Jeiel tén han Azazías, axta ektáha kélyéseykha apkelpáwasso chá'a m'a arpas náxap'awo nak apkelpáwá, ektémól'a chá'a elpáwaksek ma'a siminitas, yaqwayam exegkesek ma'a kélmeneykmasso nak.

²²Quenanías, apkemha apmonye' apagkok axta levitas, apxegkesso axta chá'a negmeneykmasso, hakte apya'ásegkok axta ektémakxa'.

²³Berequías tén han Elcaná, axta ektáha aptaqmelchesso m'a ekyetnamakxa nak yántéseksek.

²⁴Keñe m'a apkelmaxnéssesso Dios énxet'ák apagkok, Sebanías, Josafat, Natanael, Amasai, Zacarías, Benaías tén han Eliézer, cháxa ektáha axta apkelpáwasso chá'a m'a apkelaqkahasso ekpayhókxa nak Dios yántéseksek apagkok. Obed-edom tén han Jehías axta han ektáha aptaqmelchesso m'a ekyetnamakxa nak yántéseksek.

²⁵Keñe axta m'a David, tén han apkelámha apmonye'e nak Israel, keñe han ma'a sẽlpextétamo apkelwesse'e apagkok nak, apkelxega yetlo élpayheykekxa apkelwáxok apwákxo yántéseksek ma'a Obed-edom apxagkok, cham'a yántéseksek ekhémo mók nélpaqhetchásamáxkoho Wesse' egegkok.

²⁶Apkelnapchek axta han siete weyke yágkelwán'ák, tén han siete nepkések apkelennay'awók ma'a levitas ektáha axta apseykenta yántéseksek, hakte appasmeyk axta m'a Dios.

²⁷Xama apáwa apkeláxñe axta aptaxneykxak ma'a David, ekhawo han ma'a apyókxoho levitas ektáha axta apseykenta m'a yántéseksek nak, tén han ma'a apkelmeneykmasso, keñe han ma'a Quenanías, ektáha axta apxegkesso kélmeneykmasso; apáwa apyaqwate apkelyenma apkexyawe efod axta han aptaxnékxak ma'a David.

²⁸Apyókxoho énxet'ák Israel axta han appasmeynták kélsánto m'a yántéseksek ekhémo mók nélpaqhetchásamáxkoho Wesse' egegkok, yetlo apkelwóncháseykenta' eñama élpayheykekxoho apkelwáxok, keñe han apkelpáwasa m'a nepkések apkennawók apkepet'ák, apkelaqkahasso tén han ma'a ekho nak sokpayhe étkók élyaqye, keñe han apkelpáwasa m'a yát'axpog tén han arpa.

²⁹Xama axta ekwa'akto yántéseksek ekhémo mók nélpaqhetchásamáxkoho m'a Tegma Apwányam apagkok nak David, kelteyányáha axta átog étkok ma'a Mical, Saúl axta apketche; xama axta ekwet'a apneyweyncha'a yetlo ekpayheykekxoho apwáxok ma'a wesse' apwányam David, lókók agko' axta awáxok éláneyncha'a.