Read Lengua Sur 1 Crónicas 18 Bible Online

1 Crónicas 18 - Lengua Sur bible

1 Crónicas 18

¹Keñe axta natámen xa, apmenxena David ma'a filisteos, kóneg axta aptemessásekxa', apyementamákxeyk axta m'a tegma apwányam Gat, yetlo m'a tegma apketkók apagkok.

²Apmenxenmeyk axta han ma'a moabitas, apkelmomchek axta han David xa énxet'ák nak, keñe apyánmagkassama chá'a m'a apkelmaxneyakxa enxoho chá'a.

³Apyaqmassegkek axta han David ma'a Hadad-ézer, wesse' apwányam axta m'a Sobá, ekpayho nak Hamat, apmeyeykekxo axta apmáheyo eykhe etnekxak makham aptaqmelchesso m'a yókxexma, ekyetnama nak nekha wátsam Éufrates.

⁴Apkelyementamomchek axta David mil yátnáxeg apyenyawasso apkenchesso kempakhakma apagkok xa énxet'ák nak, apkelmomchek axta han siete mil sẽlpextétamo yátnáxeg apkelchánte, tén han veinte mil ma'a apkelxega nak náxop; apkelekkexchessegkek axta han apexchakkok ma'a yátnáxeg kélnaqtehetchesso axta m'a apkelyenyawasso apkenchesso nak kempakhakma, wánxa axta aqsa apkeláyekmo yátnáxeg yaqwayam kólnaqtehetchesek cien apkelyenyawasso nak.

⁵Apkelweykmek axta han sirios apkeleñama Damasco apmáheyo epasmok ma'a Hadad-ézer, wesse' apwányam axta m'a Sobá, apmenxenmeyk axta eyke han David xa énxet'ák nak, veintidós mil axta apkelnapmak.

⁶Keñe axta David apkelhésseykmo sẽlpextétamo apagkok yókxexma Siria, cham'a Damasco, yaqwayam elanha, kóneg axta han aptemessáseykekxak ma'a Siria, apkeltémók axta han chá'a eyánmagkasek apkelmaxneyakxa enxoho chá'a aqsok. Cháxa ektémakxa axta chá'a apmallahanchessama Wesse' egegkok apmahágkaxa enxoho chá'a m'a David.

⁷Tén axta apkelmoma David ma'a apkeláhakkásamap élánamáxche axta sawo ekyátekto ekmomnáwa, apkelmeykha axta m'a Hadad-ézer axta sẽlpextétamo apkelwesse'e apagkok, keñe apkelseykekxo m'a Jerusalén.

⁸Xámok agko' axta han apkelma sawo élyexwase ekhéyak axta m'a Tibhat tén han ma'a Cun, tegma apkelyawe apagkok axta m'a Hadad-ézer. Cháxa apkeláneya axta han natámen Salomón ekyawe agko' kélyátamakxa yegmen xa sawo élyexwase nak, tén han ma'a élámha nak, keñe han ma'a aqsok kélmeykegkaxa nak chá'a m'a tegma appagkanamap nak, kelánexkók axta sawo élyexwase.

⁹Xama axta aplegaya amya'a m'a Toi, wesse' apwányam axta m'a Hamat, apmenxenma apyókxoho David ma'a sẽlpextétamo apagkok axta Hadad-ézer, wesse' apwányam axta Sobá,

¹⁰keñe axta apcháphassama m'a apketche apwesey axta Adoram yetlo m'a mók ektémakxa nak aqsok, sawo ekyátekto ekmomnáwa, sawo ekmope ekmomnáwa, tén han ma'a sawo ekyexwase, yaqwayam egkések ekxeyenma apwáxok elsawásseshok ma'a wesse' apwányam David, eñama apkelnápomap ma'a Hadad-ézer tén han apyaqmassama, hakte apkempakhayak axta han Toi ma'a Hadad-ézer.

¹¹Apkelpagkanchessegkek axta David ekyókxoho Wesse' egegkok xa aqsok nak, yetlo m'a sawo ekyátekto ekmomnáwa, tén han sawo ekmope ekmomnáwa, ektáha axta apkelyementaméyak ma'a pók aptémakxa énxet'ák, cham'a énxet'ák Edom, Moab, amonitas, filisteos tén han ma'a amalecitas.

¹²Tén ma'a Abisai, Seruiá axta étche, apmenxenma han dieciocho mil edomitas ma'a éltamhomaxchexa nak Ekyapwátegweykenxa Yásek Xapop.

¹³Tén axta apkelhésseykmo han David sẽlpextétamo apagkok ma'a Edom yaqwayam elanha, apkeláneykha axta han aptemék ma'a apyókxoho edomitas; hakte Wesse' egegkok axta chá'a emallanchesek David ma'a apmahágkaxa enxoho chá'a.

¹⁴Aptemegkek axta wesse' apwányam David ma'a ekyókxoho nak Israel, aptaqmelchessamók axta han chá'a apkeláneykha m'a apyókxoho énxet'ák apagkok, meyke apteméssesso m'a megkapayhawo nak chá'a etnéssesek.

¹⁵Joab axta apteme sẽlpextétamo apkemha apmonye', Seruiá axta étche; tén han Josafat, Ahilud axta apketche, apteme axta appasmeykha aptamheykha wesse' apwányam.

¹⁶Apkelmaxnéssesso Dios énxet'ák apagkok axta eyke m'a Sadoc, Ahitub axta apketche, tén han ma'a Ahimélec, Abiatar axta apketche; Savsá axta eyke apnaqtáxéseyak chá'a weykcha'áhak ektémakxa axta chá'a apwete,

¹⁷keñe axta Benaías, Joiadá axta apketche, apteme apkemha apmonye' m'a sẽlpextétamo nak quereteos tén han peleteos. David apketchek axta eyke apkeltamheykha m'a ekyawakxa nak kéláyo.