Read Lengua Sur 1 Crónicas 2 Bible Online

1 Crónicas 2 - Lengua Sur bible

1 Crónicas 2

¹Keso Israel apketchek axta s'e: Rubén, Simeón, Leví, Judá, Isacar, Zabulón,

²Dan, José, Benjamín, Neftalí, Gad tén han Aser.

³Judá apketchek: Er, Onán tén han Selá. Súa apketche kelwána axta étchek xa apqántánxo nak, ekteme axta cananea. Asagko' agko' axta eyke aptémakxa m'a Er, apketche átnaha apketkok axta Judá, la'a apchaqheykekxo axta Wesse' egegkok.

⁴Apqánet axta étchek ma'a Tamar, cham'a Fares tén han Zérah, Judá axta aptánegken. Cinco axta apyókxoho apketchek ma'a Judá.

⁵Fares apketchek: Hesrón tén han Hamul.

⁶Zérah apketchek: Zimrí, Etán, Hemán, Calcol tén han Dardá, cinco axta apyókxoho.

⁷Carmí axta apketche m'a Acar, apkelsexnenagkama axta eyáhapwaya ekmaso apheykha m'a énxet'ák Israel, apkelmoma axta m'a aqsok apkeltémo axta kólmasséssók ekyókxoho m'a Dios.

⁸Etán axta apketche m'a Azarías.

⁹Hesrón apketchek: Jerahmeel, Ram tén han Quelubai.

¹⁰Ram axta apyáp ma'a Aminadab, keñe axta Nahasón apyáp ma'a Aminadab, apteme axta apkemha apmonye' apagkok ma'a Judá aptawán'ák neptámen.

¹¹Nahasón axta apyáp ma'a Salmá, keñe axta Booz apyáp ma'a Salmá,

¹²Booz axta apyáp ma'a Obed, keñe axta Jesé apyáp ma'a Obed,

¹³Jesé axta apyáp ma'a Eliab, apwete apmonye' apketche axta; keñe axta aptétéyak ma'a Abinadab, tén han Simá;

¹⁴tén han Natanael; tén han Radai;

¹⁵tén han Ósem, keñe axta axayók agko' ma'a David, aptáhakxa axta siete apketchek.

¹⁶Keso apkelyáxeg kelwán'ák axta s'e: Seruiá tén han Abigail. Apqántánxo axta étchek ma'a Seruiá: Abisai, Joab tén han Asael.

¹⁷Xama axta étche m'a Abigail apwesey axta Amasá, apyáp axta m'a Jéter, apteme axta ismaelita.

¹⁸Caleb, Hesrón apketche, aptáwa' axta ekwesey Azubá, weteyak axta xama étche apwesey axta Jeriot. Tén axta han pók étchek se'e: Jéser, Sobab tén han Ardón.

¹⁹Xama axta étsapma Azubá, keñe Caleb apmeykekxo aptéma aptáwa' m'a Efrata, apwetassegkek axta han xama étche: cham'a Hur.

²⁰Hur axta apyáp ma'a Urí, keñe axta Besalel apyáp ma'a Urí.

²¹Sesenta apyeyam apagkok axta Hesrón élyamhopma apmoma m'a Maquir apketchek kelwána, apyáp axta m'a Galaad, apwetassegkek axta han xama étche: cham'a Segub.

²²Segub axta apyáp ma'a Jaír, cham'a apheykegko axta han veintitrés tegma apkelyawe apagkok ma'a yókxexma nak Galaad.

²³Keñe axta Guesur tén han Aram apkelmoma m'a apkelpakxeneykegkaxa axta Jaír, tén han ma'a Quenat yetlo m'a tegma apketkók agkok; sesenta axta apyókxoho m'a tegma apkelyawe. Maquir aptawán'ák neptámen axta han apagkok xa apyókxoho nak, Galaad axta apyáp.

²⁴Natámen apketsapma axta Hesrón, keñe Caleb apmeykekxo m'a Efrata, aptáwa' axta m'a apyáp Hesrón, apwetassegkek axta han xama étche: cham'a Ashur, cháxa aptáha axta han apyáp ma'a Tecoa.

²⁵Keso apketchek axta Jerahmeel, apketche átnaha apketkok axta m'a Hesrón: Ram, apteme axta átnaha apketkok, Buná, Oren, Ósem tén han Ahías.

²⁶Yetneyk axta han mók kelán'a aptáwa' m'a Jerahmeel, ekwesey axta Atará, egken axta m'a Onam.

²⁷Keso apketchek axta Ram, átnaha apketkok apketche axta m'a Jerahmeel: Maas, Jamín tén han Équer.

²⁸Onam apketchek: Samai tén han Jadá. Samai apketchek: Nadab tén han Abisur.

²⁹Abihail axta ekwesey aptáwa' m'a Abisur, cha'a egken axta m'a Ahbán tén han Molid.

³⁰Nadab apketchek: Séled tén han Apaim. Apketsepmeyk axta Séled meykexho apketchek.

³¹Apaim axta apyáp ma'a Isí. Isí axta apyáp ma'a Sesán. Sesán axta apyáp ma'a Ahlai.

³²Keso Jadá axta apketchek, Samai axta apyáxeg: Jéter tén han Jonatán. Apketsepmeyk axta Jéter meykexho apketchek.

³³Jonatán apketchek: Pélet tén han Zazá. Cháxa Jerahmeel axta aptawán'ák neptámen xa.

³⁴Axta eteyk apketchek apkelennay'a m'a Sesán: kelwán'ák axta aqsa. Yetneyk axta eyke apchásenneykha naqsa egipcio apwesey axta Jarhá,

³⁵cháxa apméssama axta xama apketche yaqwayam etnehek aptáwa', apwetassama axta han xama étche apkenna apwesey axta Atai.

³⁶Atai axta apyáp ma'a Natán, Natán axta apyáp ma'a Zabad,

³⁷Zabad axta apyáp ma'a Eflal, Eflal axta apyáp ma'a Obed,

³⁸Obed axta apyáp ma'a Jehú, Jehú axta apyáp ma'a Azarías,

³⁹Azarías axta apyáp ma'a Heles, Heles axta apyáp ma'a Elasá,

⁴⁰Elasá axta apyáp ma'a Sismai, Sismai axta apyáp ma'a Salum,

⁴¹Salum axta apyáp ma'a Jecamías, keñe axta Jecamías apyáp ma'a Elisamá.

⁴²Keso Caleb axta apketchek, apyáxeg axta m'a Jerahmeel: Mesá, apteme axta átnaha apketkok, apyáp axta m'a Zif, tén han Maresá, apteme axta pók apketche, apyáp axta m'a Hebrón.

⁴³Hebrón apketchek: Coré, Tapúah, Réquem tén han Sema.

⁴⁴Sema axta apyáp ma'a Ráham, apyáp axta m'a Jorcoam; tén han Réquem, apyáp axta m'a Samai.

⁴⁵Samai axta apketche m'a Maón, apyáp axta m'a Bet-sur.

⁴⁶Efá axta egken ma'a Harán, Mosá tén han Gazez, kelán'a apmeykha naqsa axta m'a Caleb. Harán axta apyáp ma'a Gazez.

⁴⁷Keso Jahdai axta apketchek se'e: Réguem, Jotam, Guesán, Pélet, Efá tén han Sáaf.

⁴⁸Maacá axta ekwesey egken ma'a Séber tén han Tirhaná, kelán'a apmeykha naqsa axta m'a Caleb.

⁴⁹Sáaf axta han egken ma'a, apyáp nak ma'a Madmaná, tén han Sevá, apyáp nak ma'a Macbená tén han Guibeá. Yetneyk axta han xama apketche kelwána m'a Caleb ekwesey axta Acsa.

⁵⁰Keso Caleb axta aptawán'ák neptámen se'e. Hur axta apketchek se'e, étche átnaha apketkok axta m'a Efrata: Sobal, apyáp nak Quiriat-jearim;

⁵¹Salmá, Belén apyáp; tén han Haref, Bet-gader apyáp.

⁵²Keso Sobal axta apketchek, apyáp nak Quiriat-jearim: Reaías, manahetitas axta nápakha',

⁵³keñe han Quiriat-jearim axta apnámakkok: cham'a itritas, futitas, sumatitas tén han misraítas, apkeleñamakxa axta apkelánteyapma m'a soratitas tén han ma'a estaolitas.

⁵⁴Salmá apketchek: Belén, netofatitas, Atrot-bet-joab, nápakha' axta han ma'a manahetitas, tén han ma'a soreítas,

⁵⁵tén han soferitas axta apnámakkok, apheykencha'a axta m'a Jabés, cham'a tirateos, simateos tén han sucateos. Cháxa quenitas, Hamat axta aptawán'ák neptámen, apyáp axta m'a Bet-recab.