Read Lengua Sur 1 Crónicas 27 Bible Online

1 Crónicas 27 - Lengua Sur bible

1 Crónicas 27

¹Keso aptáha axta apkelámha apmonye'e apagkok énxet'ák Israel se'e, apkelámha apmonye'e nak chá'a apnámakkok, apkelámha apmonye'e nak chá'a kempakhakma, tén han sẽlpextétamo, keñe han ma'a sẽlpextétamo apkelwesse'e apagkok axta m'a wesse' apwányam. Apkelyaqmagkásamap axta chá'a apkeltamheykha xama pelten, ekweykmoho xama apyeyam, veinticuatro mil énxet'ák axta chá'a emok apkeltamheykha peya enxoho eleyxmakha.

²Jasobeam, Zabdiel axta apketche, axta chá'a apkemha apmonye' sẽlpextétamo apkelhaxneykha axta chá'a apkemha apmonye' pelten,

³Fares axta aptáwen neptámen xa. Axta apteme apkemha apmonye' nepyeseksa m'a apyókxoho apkelámha apmonye'e nak chá'a sẽlpextétamo, ektáha axta apma apkeltamheykha m'a apkemha apmonye' nak pelten.

⁴Dodai, apteme axta ahotita, axta apteme apkemha apmonye' sẽlpextétamo apkelhaxneykha m'a aptáhakxa nak apqánet pelten.

⁵Benaías, apketche axta m'a apkemha apmonye' apagko' nak apkelmaxnéssesso Dios énxet'ák apagkok Joiadá, axta apteme apkemha apmonye' sẽlpextétamo, apkelhaxneykha aptáhakxa nak apqántánxo pelten,

⁶apteme axta xama apkeñama nepyeseksa m'a treinta megyeye axta elmahagkok eyesagkexa', apkemha apmonye' apagkok axta han xa énxet'ák nak. Apketche Amizabad axta eyke apyaqmagkassók apkeláneykha xa sẽlpextétamo nak.

⁷Asael, Joab apyáxeg, axta apkemha apmonye' apagkok ma'a sẽlpextétamo apkelhaxneykha axta chá'a m'a aptáhakxa nak cuatro pelten. Apketche Zebadías axta eyke apyaqmagkassók apkeláneykha xa sẽlpextétamo nak.

⁸Samhut, apteme axta izraíta, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak cinco pelten,

⁹Irá, Iqués axta apketche, apkeñama axta Tecoa, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak seis pelten.

¹⁰Heles, apteme axta paltita, apkemha apmonye' apagkok axta m'a sẽlpextétamo apkelhaxneykha axta chá'a aptáhakxa nak siete pelten, Efraín axta aptáwen neptámen.

¹¹Sibecai, apkeñama axta Husá, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak ocho pelten, Zérah axta aptáwen neptámen.

¹²Ebiézer, apkeñama axta Anatot, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak nueve pelten, Benjamín axta aptáwen neptámen.

¹³Maharai, apkeñama axta Netofá, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak diez pelten, Zérah axta aptáwen neptámen.

¹⁴Benaías, apkeñama axta Piratón, axta apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak once pelten, Efraín axta aptáwen neptámen.

¹⁵Heldai, apkeñama axta Netofá, axta apteme apkemha apmonye' apagkok ma'a sẽlpextétamo apkelhaxneykha axta chá'a aptáhakxa nak doce pelten, Otoniel axta aptáwen neptámen.

¹⁶Keso apkelámha apmonye'e apagkok axta énxet'ák Israel: Eliézer, apteme axta Rubén énxet'ák apagkok, Zicrí axta apketche; Sefatías, apteme axta Simeón énxet'ák apagkok, Maacá axta étche;

¹⁷Hasabías, Quemuel axta apketche, apteme axta Leví énxet'ák apagkok; Sadoc, Aarón axta aptáwen neptámen;

¹⁸Elihú, apteme axta Judá énxet'ák apagkok, apyáxeg axta m'a David; Omrí, apteme axta Isacar énxet'ák apagkok, Micael axta apketche;

¹⁹Ismaías, apteme axta Zabulón énxet'ák apagkok, Abdías axta apketche; Jerimot, apteme axta Neftalí énxet'ák apagkok, Azriel axta apketche;

²⁰Oseas, apteme axta Efraín énxet'ák apagkok, Azazías axta apketche; Joel, apteme axta Manasés nápakha énxet'ák apagkok, Pedaías axta apketche;

²¹Idó, apteme axta han apkeñama nepyeseksa nápakha énxet'ák apheykha axta Galaad, Zacarías axta apketche; Jaasiel, apteme axta Benjamín énxet'ák apagkok, Abner axta apketche;

²²Azarel, apteme axta Dan énxet'ák apagkok, Jeroham axta apketche. Cháxa aptamhéyak axta apkelámha apmonye'e apagkok ma'a énxet'ák Israel.

²³Axta elyetsáteykekxak David ma'a mewayam axta chá'a veinte apyeyam apagkok, hakte apxeyenmeyk axta Wesse' egegkok exámásekxak ma'a israelitas ekhawo nak apxámokma m'a yaw'a aphéyak nak néten.

²⁴Apkeynamók axta apkelyetsáteykekxo énxet'ák ma'a Joab, axta eyke esawhomo', hakte aqsok ekmaso axta tekkessók ma'a kañe' Israel. Cháxa keñamak megkeytnama nak apwánxa apyókxoho eknaqtáxésamaxche apkelwesey m'a weykcha'áhak eknaqtáxésamaxchexa axta chá'a aqsok apkelane m'a wesse' apwányam David.

²⁵Azmávet axta apteme apkeltaqmelchesso m'a aqsok élmomnáwa apagkok nak wesse' apwányam, Adiel axta apketche, keñe Jonatán, Ozías axta apketche, apteme apkeltaqmelchesso m'a kélxátamakxa axta chá'a aqsok, ekhéyak axta m'a yókxexma, tén han apkelyawakxa nak tegma, keñe han ma'a nepyáwa nak tegma, tén han ma'a néxa nak chá'a xapop apagkok.

²⁶Ezrí, Quelub axta apketche, axta apteme apkemha apmonye' nepyeseksa m'a apkeltamheykha apkeneykekxa axta chá'a aqsok.

²⁷Simí, apkeñama axta Ramat, axta apkeltaqmelchesso m'a anmen yámet kélcheneykekxa nak, keñe m'a Zabdí, Sefam axta apketche, apteme apkelyetméyak chá'a anmen yámet égmenek ma'a kélyetmeykegkaxa axta chá'a.

²⁸Baal-hanán, apkeñama axta Guéder, axta aptaqmelchesso m'a élámhakxa nak olivo yámet, keñe han ma'a naxma élámhakxa axta higo yámet, élaqneykegko axta m'a ekpayhegweykenxa nak xapop, keñe axta Joás apkeltaqmelchesso m'a kélyetmeykegkaxa axta pexmok égmenek.

²⁹Sitrai, apkeñama axta Sarón, axta apkeltaqmelchesso weyke kélyáqkasseykmo nak kéleykegko pa'at ma'a Sarón agko' nak. Keñe Safat, Adlai axta apketche, apteme apkeltaqmelchesso m'a weyke kélágwayam axta pa'at ma'a ekyapwátegweykenxa nak xapop.

³⁰Obil, apteme axta ismaelita, axta apkeltaqmelchesso m'a yányátnáxeg; keñe Jehedías, apkeñama axta Meronot, axta apkeltaqmelchesso m'a yámelyeheykok kelwán'ák nak;

³¹keñe Jaziz, apteme axta agareno, apkeltaqmelchesso m'a nepkések. Cháxa apkelánéseykekxo axta chá'a aqsok apagkok wesse' apwányam David xa apyókxoho nak.

³²Énxet apya'áseykegkoho aqsok axta tén han ektaqmalma kélxekmósso axta m'a Jonatán, David axta apyaha', énxet ektaqmalma apmésso appeywa pók axta m'a, keñe axta Jehiel, Hacmoní axta apketche, apteme apkelxegexma'a m'a wesse' apwányam apketchek.

³³Énxet ektaqmalma apmésso appeywa wesse' apwányam axta han ma'a Ahitófel, keñe m'a Husai, apteme axta énxet arquita, apteme axta chá'a wánxa apháxenmo aptáhakxa appeywa m'a wesse' apwányam.

³⁴Apteyepmeyk axta aptamheykha m'a Ahitófel, keñe apyaqmagkassama m'a Joiadá, Benaías axta apketche, tén han Abiatar. Joab axta apteme apkemha apmonye' sẽlpextétamo apagkok ma'a wesse' apwányam.