Read Lengua Sur 1 Crónicas 28 Bible Online

1 Crónicas 28 - Lengua Sur bible

1 Crónicas 28

¹Apchánchesákxeyk axta David apyókxoho apkelámha apmonye'e Israel ma'a Jerusalén: apkelámha apmonye'e apagkok nak chá'a m'a énxet'ák, apkelámha apmonye'e apagkok nak chá'a sẽlpextétamo ma'a wesse' apwányam, apkelámha apmonye'e nak chá'a kempakhakma, tén han ma'a sẽlpextétamo, keñe han ma'a apkeláneseykha nak chá'a ekyókxoho xapop apagkok, tén han ekyókxoho apnaqtósso nak wesse' apwányam yetlo m'a apketchek nak, apkelwesse'e ekyawe axta chá'a kéláyo, keñe han ma'a kempakhakma yapmeyk ekyawe nak kéláyo.

²Apkempákxeyk axta néten David aptáha appaqmeta s'e: “Kóleyxho sekpeywa, énámakkok tén han énxet'ák ahagkok: Xeyenmeyk axta ko'o ewáxok alanaksek xama tegma yaqweykenxa keytek meyke néxa m'a yántéseksek ekhémo mók nélpaqhetchásamáxkoho Wesse' egegkok, yaqwayam enxoho etnehek aphamakxa m'a Dios egagkok nak, ekpenchessegkek axta han séláneykekxa yaqwayam elanakpok.

³Axta eyke aptemék seyánagkama Dios se'e: ‘Háwe exchep yaqwayam etnehek sélánésso xama tegma, hakte kempakhakma yáp xép, apxámok énxet apkelnapma.’

⁴Élyéseykha axta eyke ko'o m'a Dios Wesse' apagkok nak Israel, nepyeseksa m'a énámakkok yaqwayam hetnéssesek wesse' apwányam megkatnégwayam néxa m'a Israel. Apkelyéseykha axta m'a apkeleñama nak Judá énxet'ák apagkok, yaqwayam etnahagkok apkelámha apmonye'e nepyeseksa apnámakkok; keñe apkelyésancha'a énámakkok ahagko' nak ko'o, apteme nak Judá énxet'ák apagkok; keñe ko'o sélyésancha'a nepyeseksa m'a élyapma nak, yaqwayam atnehek wesse' apwányam ma'a ekyókxoho nak Israel.

⁵Keñe m'a nepyeseksa nak apyókxoho étchek, hakte apxámok axta sélmésso m'a Wesse' egegkok, apkelyésancha'a m'a hatte Salomón, yaqwayam etnehek wesse' apwányam ma'a Israel, cham'a aptémakxa nak wesse' apwányam ma'a Wesse' egegkok.

⁶Axta aptemék han Wesse' egegkok seyánagkama s'e: ‘Xép apketche Salomón sa' etnehek apkelane tegma appagkanamap ahagkok, tén han ma'a kélhaxtegkesso nak, hakte élyéseykha ko'o yaqwayam atnehek hatte m'a, keñe sa' ko'o hetnehek apyáp ma'a,

⁷mamasséssemek sa' apteme wesse' apwányam, apwasqápeykxoho enxoho elának ma'a segánamakxa ahagkok nak, keñe han séltémókxa nak etnehek, ekhawo aptémakxa nak chá'a apkeláneya s'e negwánxa nak.’

⁸“Kaxwo', kélyókxoho énxet'ák nak Israel, kélaqnákxo nak nápaqtók Wesse' egegkok, cham'a Dios egagkok aphaxnawo nak nélpeywa, kóltaqmelchesho sa' kéllane ekyókxoho segánamakxa apagkok Wesse' egegkok, cham'a Dios kélagkok nak kéxegke, yaqwayam sa' katnahagkok chá'a kélagkok kéxegke s'e apchókxa ektaqmalma nak, yaqwayam kólmeyásekxak han meyke néxa m'a kélketchek nak.

⁹Keñe sa' xép, hatte Salomón, ey'asagkoho sa' Dios apagkok nak apyáp, elána' sa' chá'a ekweykmoho kañók agko' apwáxok ma'a apkeltémókxa nak etnehek, tén han yetlo ekmáheyo apwáxok, hakte elanok chá'a Wesse' egegkok ma'a ektémakxa nak egwáxok, ékpelkohok han ma'a ektáhakxa enxoho chá'a ekmámenyého egwáxok, tén han élchetamso egwáxok. Apketamchek sa' agkok chá'a exchep ma'a, megkatnehek sa' chá'a méteyeykekxa'; apyenyókek sa' agkok xép ma'a, eyenyók sa' megkatnégwayam néxa m'a.

¹⁰Ey'asagkoho exchep apkelyéseykencha'a m'a Wesse' egegkok, yaqwayam elanaksek tegma appagkanamap apagkok. ¡Ewasqápekxoho, etneykha kaxwo'!”

¹¹Tén axta David apmésa apketche Salomón apwánxa appayhakxa yaqwayam elának apwáxok kélhaxtegkesso m'a nentaxnamakxa nak tegma appagkanamap, tén han ma'a tegma kélxátamakxa nak chá'a aqsok, keñe han ma'a kañe' netno' nak, tén han ma'a kañe' apwáxok, tén han ma'a Ekpagkanamaxchexa agko' nak.

¹²Apméssek axta han ekyókxoho m'a ektémakxa axta ekxeyenma apwáxok yaqwánxa etnehek elának ma'a apwáxok nak tegma appagkanamap, keñe han ma'a kañe' yaqwayam nak kaxnagkok ma'a nepyáwa', keñe han ma'a ekheykegkaxa nak aqsok élmomnáwa, tén han yaqwánxa sa' kólxatmok ma'a aqsok kélmésso naqsa Dios,

¹³tén han ma'a kañe' tegma yaqwánxa sa' chá'a elyaqmagkasakpok apkeltamheykha m'a appasmo nak apkelmaxnéssesso Dios énxet'ák apagkok, keñe han levitas, tén han ma'a ekyókxoho aqsok élánamáxche nak chá'a m'a tegma appagkanamap nak, keñe han ma'a yaqwánxa sa' chá'a kólxatmok ma'a aqsok kélmeykegkaxa nak.

¹⁴Apkelméssek axta han sawo ekyátekto élmomnáwa, tén han ma'a sawo élmope élmomnáwa, yaqwayam kalanaxchek ekyókxoho m'a aqsok kélmeykegkaxa nak chá'a m'a tegma appagkanamap nak;

¹⁵aphésawók axta han chá'a mók apkelmésso ekwánxa chá'a ekyentaxno m'a sawo ekyátekto ekmomnáwa, tén han sawo ekmope ekmomnáwa, yaqwánxa chá'a kaxhok ekyentaxno xama m'a cháléwasso élyawe nak, tén han ma'a cháléwasso étkók agkok nak;

¹⁶axta han aptemessásak yaqwayam kalanaxchek xama xama m'a mésa nak, sawo ekyátekto ekmomnáwa, tén han sawo ekmope ekmomnáwa, yaqwánxa sa' chá'a kóleykásekxak kélnegkenéyak néten ma'a pán apkelpagkanamap nak.

¹⁷Apkelméssek axta han sawo ekyátekto élmomnáwa yaqwayam kalanaxchek ma'a kelyetxaqxo apto, sokpayhe élyawe, keñe han ma'a kélyekwe yegmen élyawe nak, apkelméssek axta han sawo ekyátekto ekmomnáwa, tén han ma'a sawo ekmope ekmomnáwa yaqwayam kaxhok kalanaxchek ma'a egheykok, ekwánxa enxoho chá'a ekyentaxno m'a xama.

¹⁸Apkelméssek axta han sawo élyátekto élmomnáwa éltaqmalma yaqwayam kalanaxchek ma'a ekwatnamáxchexa nak aqsok ekmátsa ekpaqneyam éten agkok, apkelméssek axta han sawo élyátekto élmomnáwa yaqwayam kalanaxchek kélyenyawáseykha ekha nak amagkok, yaqwayam kólánchesha néten ma'a Dios apkelásenneykha ekha nak apxempenák, yaqwayam enxoho eláhakkasek apxempenák ma'a yántéseksek ekhémo mók nélpaqhetchásamáxkoho apagkok nak Wesse' egegkok.

¹⁹Wesse' egegkok axta apxekmósso David ekyókxoho xa, naqtáxésamaxcheyk axta apkeltémókxa axta katnehek aqsok élánamáxche'.

²⁰Aptáhak axta David apcháneya m'a Salomón: “¡Ewasqápekxoho ná eyelqáp, etneykha kaxwo'! ¡Nágkaleklágwom aqsa, nágkatneykha han apwáxok, hakte Dios Wesse' ahagkok nak ko'o sa' etnehek apxegexma exchep! Meyenyewek sa' xép ma'a, ekwokmoho appenchásekpo apkelánamap ma'a tegma appagkanamap nak.

²¹Keso appasmo apkelmaxnéssesso Dios énxet'ák apagkok, tén han levitas, yaqwayam sa' elanagkok chá'a apkeltamheykha m'a tegma appagkanamap nak; apxámok sa' nahan chá'a etnehek appásegwe apkeltamheykha, apmopwancha'a nak ekyókxoho ektémakxa apkeltamheykha; elanagkok sa' nahan chá'a aptáhakxa enxoho exchep apkeláneya m'a apkelámha apmonye'e nak, tén han ma'a apyókxoho énxet'ák.”