Read Lengua Sur 1 Crónicas 5 Bible Online

1 Crónicas 5 - Lengua Sur bible

1 Crónicas 5

¹ Keso Rubén apketchek axta s'e, átnaha apketkok apketche axta m'a Israel: Hanoc, Falú, Hesrón tén han Carmí. Rubén axta apteme átnaha apketkok apagko', massegkek axta eyke ekpayhémo apteme kélketche átnaha apketkok, eñama appathetcháséyak axta m'a apyáp aptáwa', José axta apxaweykekxak xa ekpayhémo axta m'a Rubén, pók apketche axta m'a Israel. Keñe axta aptéma ekha kéláyo m'a Judá nepyeseksa apkelyáxeg'a, cháxa aptepakxa axta han xama apkemha apmonye'; José axta eyke apxaweykekxak ma'a ekpayhémo nak apteme átnaha apketkok kélketche.

⁴Keso Joel axta aptawán'ák neptámen apkelánamákpoho s'e: Semaías, Gog, Simí, Micaías, Reaías, Baal tén han Beerá, apkemha apmonye' apagkok axta m'a Rubén énxet'ák apagkok, kélyentameykekxo axta apmomakpo, apmoma m'a Tiglat-piléser, wesse' apwányam axta Asiria.

⁷Keso Beerá apkelyáxeg'a eknaqtáxésamaxche axta apkelwesey apnámakkok apancha'awo': Jeiel, apteme axta apmonye', Zacarías

⁸tén han Bela, Azaz axta apketche, Sema axta aptáwen, Joel axta apketche. Aphegkek axta Bela m'a Aroer, weykmók axta xapop apagkok ma'a Nebo tén han Baal-meón.

⁹Axta maheykegkok han ma'a ekpayho nak ekteyapmakxa ekhem, ekweykekxoho m'a neyáwa nak yókxexma meykexa énxet, ekmahéyak axta m'a wátsam Éufrates, hakte xámeykekxók agko' axta apnaqtósso weyke m'a yókxexma nak Galaad.

¹⁰Apkempakhayak axta han Rubén énxet'ák apagkok ma'a agarenos, neyseksa apteme wesse' apwányam axta m'a Saúl, apmenxenmeyk axta han, keñe apkelheykmo m'a ekpayho nak ekteyapmakxa ekhem ma'a yókxexma Galaad.

¹¹Keso Gad axta aptawán'ák neptámen, apheykencha'a axta m'a ekpayhókxa nak apheykegkaxa m'a Rubén énxet'ák apagkok, ekpayho nak yókxexma Basán, ekweykekxoho m'a tegma apwányam Salcá:

¹²Joel axta apteme apmonye', keñe axta aptétéyak ma'a Safán, tén axta m'a Jaanai, keñe axta axayók agko' ma'a Safat.

¹³Keso apnámakkok apancha'awók axta s'e: Micael, Mesulam, Sebá, Jorai, Jacán, Zía tén han Éber, siete axta apyókxoho.

¹⁴Keso Abihail axta apketchek se'e, Hurí axta apketche, cham'a Hurí, Jaróah axta apketche, cham'a Jaróah, Galaad axta apketche, cham'a Galaad, Micael axta apketche, cham'a Micael, Jesisai axta apketche, cham'a Jesisai, Jahdó axta apketche, cham'a Jahdó, Buz axta apketche.

¹⁵Axta apkemha apmonye' nepyeseksa apnámakkok Ahí, Abdiel axta apketche, Guní axta aptáwen.

¹⁶Apyókxoho axta apheykha m'a Galaad, ekpayho nak Basán tén han ma'a tegma apketkók, keñe han ma'a yókxexma émhakxa nak pa'at ma'a Sarón, ekweykekxoho m'a néxa nak.

¹⁷Apyókxoho axta kélnaqtáxeseykegkok apkelwesey xa énxet'ák nak, ektáhakxa nak chá'a aphawóxama, aphamakxa axta Jotam, wesse' apwányam axta Judá, tén han Jeroboam, wesse' apwányam axta Israel.

¹⁸Sẽlpextétamo apkelyennaqte axta m'a Rubén aptawán'ák neptámen tén han Gad, keñe han ma'a nápakha nak Manasés énxet'ák apagkok, apkelmeykha axta m'a apkeláhakkásamap, sókwenaqte tén han yágke, appencháseykegkek axta aptamheykegkaxa yaqwayam elempakha'. Cuarenta y cuatro mil setecientos sesenta axta apyókxoho m'a énxet'ák apmopwancha'a axta elempakha'.

¹⁹Keñe axta apkelnápomákpo apkelenmexa m'a agarenos, tén han Jetur, Nafís tén han ma'a Nodab;

²⁰appasmomchek axta eyke m'a Dios, apkelmomakpek axta m'a agarenos yetlo m'a apkelxegexma'a axta, hakte apkelmaxneyeykegkek axta apkeltémo epasmok Dios neyseksa apkelnápomap. Appasmomchek axta han ma'a Dios, hakte axta elya'ásseykmok.

²¹Keñe axta apkelmoma apnaqtósso m'a katnaha nak apnámakkok, cincuenta mil axta apyókxoho yányátnáxeg, doscientos cincuenta mil nepkések, keñe dos mil ma'a yámelyeheykok. Apkelmomchek axta han cien mil énxet'ák.

²²Apxámok axta apkeletsapma m'a katnaha nak apnámakkok, hakte Dios axta keñamak xa kempakhakma nak. Keñe axta apkelheykmo xa yókxexma nak, ekweykmoho m'a apkelmomakpo axta kélnaqleykekxo megkatnahakxa apkelókxa.

²³Axta apheykha Manasés nápakha énxet'ák apagkok aptawán'ák neptámen ma'a yókxexma ekmahéyak axta m'a Basán, ekweykekxoho m'a Baal-hermón, Senir tén han ma'a egkexe nak Hermón, hakte apxámok apagko' axta m'a.

²⁴Keso apkelámha apmonye'e axta chá'a apnámakkok se'e: Éfer, Isí, Eliel, Azriel, Jeremías, Hodavías tén han Jahdiel, sẽlpextétamo apkelyennaqte axta han xa apyókxoho nak, apkelxénamap ekyókxoho yókxexma, tén han apkelámha apmonye'e aphawóxama.

²⁵Apkenmexeykekxeyk axta eyke m'a Dios apagkok axta apyapmeyk nano', massegkek axta apkelyetleykha apkelpeykessamo m'a aqsok apkeláyókxa axta énxet'ák, apmassésseykmo axta Dios apmonye'e, tén han apkelántekkessama.

²⁶Axta keñamak, Dios apagkok nak Israel, apyáteyeykegkoho m'a Pul, wesse' apwányam nak Asiria, cham'a Tiglat-piléser, ektáha axta apkelántekkesso apkelókxa m'a Rubén énxet'ák apagkok, tén han Gad, tén han nápakha Manasés énxet'ák apagkok; apnaqleykekxeyk axta m'a yókxexma Halah, Habor, Hará tén han ma'a wátsam nak Gozán, cham'a apheykegkaxa nak makham se'e kaxwo' nak.