Read Lengua Sur 2 Crónicas 1 Bible Online

2 Crónicas 1 - Lengua Sur bible

2 Crónicas 1

¹Yennaqweykmek axta apteme wesse' apwányam Salomón ma'a aptémakxa axta wesse' apwányam, David axta apketche, hakte Wesse' egegkok axta appasmók, apyánchessáseykegkók axta han apteme apcheymákpoho.

²Apkeláneyáha axta apyókxoho énxet'ák Israel: cham'a apkelámha apmonye'e nak sẽlpextétamo, tén han ma'a apkeláneykha, keñe han ma'a apyókxoho apkelámha apmonye'e nak chá'a nepyeseksa aphawóxama, apteme nak chá'a ekha kéláyo m'a kañe' Israel.

³Keñe axta apmahágko m'a tegma appagkanamap apyetnama axta m'a Gabaón, yetlo apkelxegexma m'a apyókxoho énxet'ák apcháncheseykekxa axta, hakte axta apyetnók kélpakxanma apchaqneykekxa nak chá'a énxet'ák ma'a, Moisés axta apkelánegwayam ma'a yókxexma meykexa nak énxet, apteme axta Dios apkeláneykha.

⁴Keñe axta m'a yántéseksek ekpagkanamaxche Dios apagkok, apsama David eñama m'a Quiriat-jearim ekweykmoho m'a kéllánessamakxa axta yaqweykenxa keytek, hakte kélpakxenchessegkek axta m'a Jerusalén.

⁵Yetnegkek axta han Gabaón ekpayhókxa kélpakxanma apagkok Wesse' egegkok ma'a ekwatnamáxchexa aqsok, élánamáxche axta sawo ekyexwase, apkelane axta m'a Besalel, Urí axta apketche, Hur axta aptáwen. Apmaheykegkek axta Salomón ma'a tén han ma'a apyókxoho énxet'ák, yaqwayam elpaqhetchesakpohok Dios.

⁶Apmahágkek axta Salomón ma'a ekyetnamakxa axta m'a ekwatnamáxchexa aqsok élánamáxche nak sawo ekyexwase, ekyetnama nak nápaqtók Wesse' egegkok, ekpayho nak ma'a kélpakxanma apchaqneykekxexa nak chá'a énxet'ák, apnegkenchek axta han mil aqsok apkelwatno m'a néten nak ekwatnamáxchexa aqsok.

⁷Apxekmowásekpók axta han Dios Salomón xa axta'a nak, aptáhak axta apcháneya: “Hélmaxna sa' aqsok apmopmenyého, tén sa' agkések.”

⁸Apchátegmowágkek axta Salomón ma'a Dios: “Taqmeleykha agko' axta exchep apwáxok apkelányo m'a táta David, keñe ko'o setnéssesa wesse' apwányam sekyaqmagkasso m'a.

⁹Dios Wesse' ahagkok, elána sa' kaxwók ekyókxoho m'a apkeltennassama axta m'a táta David, hakte wesse' apwányam xép etnessásak nepyeseksa énxet'ák apxámokma, aphémo nak xapop ánek keso náxop.

¹⁰Hegkés sekya'áseyak tén han sekyekpelchémo yaqwayam altaqmelchesek ko'o s'e énxet'ák nak; hakte agkok ko'o hegkeyásak xa, ¡mowanchek alanha ko'o s'e énxet'ák apagkok apxámokma nak!”

¹¹Apchátegmowágkek axta Dios ma'a Salomón: “Agkések sa' xép apya'áseyak tén han apyekpelchémo, hakte mehelmaxneyk xép yaqwayam etnehek ekxámokma aqsok apagkok, keñe han ekha kéláyo, mehelmaxneyk han yaqwayam elnápok ma'a apkelenmexma, tén han ma'a ekwenaqte apha, wánxa aqsa sélmaxneya apya'áseykegkoho tén han apyekpelchémo, yaqwayam elanha m'a énxet'ák ahagkok, sekteméssesa nak xép wesse' apwányam apagkok. Almések sa' eyke han ma'a ekxámokma aqsok apagkok tén han ekha kéláyo, melweteya axta m'a kelwesse'e apkelwányam apmonye'e axta, metnamakxa axta exchep wesse' apwányam, melwetyehek sa' eyke han chá'a m'a aptamheykekxa nak chá'a wesse' apwányam neptámen xép.”

¹³Tén axta aptaqháwo makham Salomón ma'a Jerusalén, apkeñama m'a tegma appagkanamap apyetnama axta m'a Gabaón, aptemék axta wesse' apwányam Israel, natámen axta apmahéyak ma'a kélpakxanma apchaqneykekxexa nak chá'a énxet'ák.

¹⁴Apchánchesákxeyk axta Salomón yátnáxeg apyenyawasso yetlo m'a énxet'ák apkelchántamo nak yátnáxeg. Mil cuatrocientos axta ekyókxoho yátnáxeg apyenyawasso, keñe doce mil ma'a énxet'ák apkelchántamo nak yátnáxeg, apkexpánchessek axta apkelya'asa chá'a m'a kélnegkenmakxa axta chá'a yátnáxeg apkelyenyawasso kélanchesso nak kempakhakma, tén han ma'a apheykegkaxa axta chá'a wesse' apwányam sẽlpextétamo apagkok ma'a Jerusalén.

¹⁵Apxámassegkek apagko' axta sawo élmope élmomnáwa tén han sawo ekyátekto élmomnáwa wesse' apwányam ma'a Jerusalén, máxa aqsok apák kélchexeykha axta apteméssessók; apxámassegkek axta han cedro yámet, ektéma nak higo yámet élámha ekpayhegweykenxa nak xapop.

¹⁶Musri axta apkeleñamak kélnaqlókassama Salomón ma'a yátnáxeg tén han ma'a Cilicia, hakte axta apkeleñamak apkelma wesse' apkeláneykha m'a.

¹⁷Seiscientos sawók selyaqye axta ekyánmaga xama yátnáxeg apyenyawasso éleñama nak Egipto, keñe ciento cincuenta xama m'a yátnáxeg. Apyókxoho apkelwesse'e apkelwányam hititas, tén han sirios axta apkelmeykegkok chá'a apkelseykha m'a Salomón axta apkeláneykha.