Read Lengua Sur 2 Crónicas 11 Bible Online

2 Crónicas 11 - Lengua Sur bible

2 Crónicas 11

¹Xama axta apwákxo Roboam ma'a Jerusalén, apchánchesákxeyk axta ciento ochenta mil sẽlpextétamo, ektáha axta kélyéseykha nepyeseksa m'a apyókxoho Judá apnámakkok, tén han ma'a Benjamín apnámakkok, yaqwayam elnapakpok ma'a énxet'ák Israel, tén emekxak ma'a apchókxa'.

²Appaqhetchessek axta eyke Wesse' egegkok ma'a Semaías, apteme axta Dios énxet apagkok. Aptáhak axta apcháneya s'e:

³“Eltennés sa' Roboam, apketche nak Salomón, wesse' apwányam nak yókxexma Judá, tén han ma'a apyókxoho israelitas apheykha nak Judá tén han ma'a Benjamín apchókxa,

⁴séltamho ko'o melnapakpehek ma'a apkelpeywomo xamo' nak. Tásek eltaqhekxak aqsa apxanák ma'a apyókxoho nak, hakte cháxa séltamhókxa nak ko'o etnahágkok xa.” Xama axta apkelleg'a aptáhakxa apkeláneya m'a Wesse' egegkok, apkeltaqhákxeyk axta apxanák, massék axta apmáheyo elnapakpok ma'a Jeroboam aphawóxama.

⁵Apheykmek axta Roboam ma'a Jerusalén, keñe apkeláneykekxo tegma apkelyawe élyennaqte kélhaxtegkesso nepyáwa m'a Judá.

⁶Apkelánekxeyk axta Belén, Etam, Tecoa,

⁷Bet-sur, Socó, Adulam,

⁸Gat, Maresá, Zif,

⁹Adoraim, Laquis, Azecá,

¹⁰Sorá, Aialón tén han ma'a Hebrón, cháxa tegma apkelyawe élyennaqte axta kélhaxtegkesso m'a Judá tén han Benjamín apchókxa.

¹¹Apkelánekxeyk axta kélhaxtegkesso élyennaqte, apkelyésáha axta han chá'a apkelámha apmonye'e yaqwayam elanha m'a, apxatmeyk axta han ma'a nento, pexmok égmenek tén han anmen yámet égmenek.

¹²Apkelmeyásegkek axta han kéláhakkásamáxche' yetlo sawhéwa m'a apyókxoho tegma apkelyawe, ekyennaqte agko' kélláneykha axta aptemessásak. Apagkok axta aptamhákxak Roboam ma'a Judá tén han Benjamín.

¹³Apyókxoho axta apkelwa'ak apkelmaxnéssesso Dios énxet'ák apagkok tén han levitas, apkeleñama mók nekha, apheykha nak ma'a Israel, yaqwayam epasmekxak ma'a,

¹⁴hakte apyamasmeyk axta xapop apagkok ma'a levitas ektaqmelakxa axta pa'at, tén han ma'a mók xapop apagkok, apmáheyo elmahagkok ma'a Jerusalén tén han ma'a mók yókxexma nak Judá, hakte apkelwátessáseykegkek axta Jeroboam, tén han ma'a yaqwayam nak eyaqmagkasek apteme wesse' apkelwányam, apkeltamheykha aptamhéyak apkelmaxnéssesso Wesse' egegkok énxet'ák apagkok.

¹⁵Apkelyéseykha axta han Jeroboam yaqwayam etnahagkok apkelmaxnéssesso aqsok kéláyókxa m'a kélpeykessamókxa nak, tén han kélpeykessamókxa m'a kelyekhama', keñe han ma'a weyke étkók kéleykmássesso apkeltémo axta kóllanaksek.

¹⁶Keñe m'a apteméssesso axta naqsók apmáheyo ektamok ma'a Wesse' egegkok, Dios apagkok nak Israel, aptamheykegko m'a aptamheykegkaxa axta apkelmaxnéssesso Dios énxet'ák apagkok, tén han levitas, apkelmeyákxeyk axta m'a Jerusalén, yaqwayam elmések aqsok apkelnapma m'a Wesse' egegkok, Dios apagkok axta m'a apyapmeyk nano'.

¹⁷Cháxa apyennaqteyáseykekxo axta apchókxa Judá, appasmeykekxo m'a Roboam, Salomón axta apketche, ekweykmoho apqántánxo apyeyam, hakte apqántánxo apyeyam axta apkelyetleykekxak ma'a aptémakxa axta David tén han Salomón.

¹⁸Apmomchek axta Roboam aptéma aptáwa' m'a Mahalat, Jerimot axta apketche kelwána, cham'a Jerimot David axta apketche tén han Abihail, apketche kelwána axta m'a Eliab, Jesé axta aptáwen kelwána.

¹⁹Keso apketchek axta Roboam tén han Mahalat se'e: Jehús, Semarías tén han Záham.

²⁰Keñe axta apmoma han ma'a Maacá, Absalón axta apketche kelwána, keso apketchek axta s'e: Abiam, Atai, Zizá tén han Selomit.

²¹Dieciocho axta ekyókxoho apnaqteyegka'a m'a Roboam, keñe sesenta m'a apkelmeykha naqsa, Maacá axta eyke aqsa chá'a apchásekhayók apagko', neyseksa m'a ekyókxoho nak. Veintiocho axta apyókxoho apketchek apkelennay'a, keñe sesenta m'a apketchek kelwán'ák.

²²Abiam axta apteméssessók apkemha apmonye' Roboam nepyeseksa m'a apketchek, étche apkenna nak Maacá, hakte apmenyeyk axta etnéssesek wesse' apwányam.

²³Apya'áseykegkók axta han apmáheyókxa etnéssesek yexpánchesek apketchek ma'a ekyókxoho kañe' xapop nak Judá, tén han Benjamín, keñe han ma'a nepyeseksa nak apyókxoho tegma apkelyawe élyennaqte nak kélhaxtegkáseyak nepyáwa', apkelmeyáseykegkek axta ekxámokma aptéyak, apkelwetassegkek axta han ekxámokma m'a apnaqteyegka'a.