Read Lengua Sur 2 Crónicas 12 Bible Online

2 Crónicas 12 - Lengua Sur bible

2 Crónicas 12

¹Xama axta ekyennaqwokmo apteme wesse' apwányam Roboam, apyensakmek axta apkelane Wesse' egegkok segánamakxa apagkok, keñe han ma'a apyókxoho énxet'ák nak Israel.

²Cinco apyeyam axta weykmok apteme wesse' apwányam Roboam, keñe apketámegko Jerusalén ma'a Sisac, wesse' apwányam nak Egipto, hakte apyenseykmek axta Wesse' egegkok ma'a énxet'ák nak,

³mil doscientos axta ekyókxoho m'a yátnáxeg apyenyawasso apkenchesso nak kempakhakma, sesenta mil sẽlpextétamo apkelchánte nak yátnáxeg, apxámok apagko' axta han apkelyetlókmo m'a sẽlpextétamo apkeleñama m'a Egipto: cham'a libios, suquienos tén han etiopes.

⁴Apkelmeyk axta m'a tegma apkelyawe élyennaqte nak kélhaxtegkesso nepyáwa m'a Judá, apwokmók axta m'a Jerusalén.

⁵Tén axta Semaías, apteme axta Dios appeywa aplegasso, apya'aweykxo m'a Roboam, tén han ma'a apkelámha apmonye'e nak Judá, ektáha axta apchaqneykekxa m'a Jerusalén apkenyehéyak apmonye' m'a Sisac. Aptáhak axta apkeláneya s'e: —Apxénchek kéxegke kélyámasma m'a Wesse' egegkok, cháxa keñamak apyenyawa nak han kaxwók kéxegke apcha'awo peya elmok ma'a Sisac.

⁶Kelnapchek axta apkelwáxok apkelya'ásegwokmo apkeláneykegko melya'assáxma m'a apkelámha apmonye'e nak Israel, tén han ma'a wesse' apwányam nak. Aptáhak axta apkelpaqmeta s'e: —¡Naqsók xa aptáhakxa nak Wesse' egegkok!

⁷Xama axta apwet'a Wesse' egegkok élnapa apkelwáxok apkeláneykegko melya'assáxma m'a énxet'ák nak, aptáhak axta apcháneya m'a Semaías: “Mamasséssemek sa' eñama élnapma apkelwáxok apkeláneyak melya'assáxma, kaxwók sa' almallahanchesek ekmaso apheykha, magwásenneykxeyk sa' Sisac yaqwayam ayenyenták seklo m'a Jerusalén;

⁸apkeláneykha sa' etnehek kéxegke m'a, keñe sa' kólya'ásegwók ektémakxa hélyetlawha ko'o, tén han ektémakxa kólyetlawha m'a pók apkelwesse'e apkelwányam nak keso náxop.”

⁹Apketámegkek axta Jerusalén ma'a Sisac, wesse' apwányam axta Egipto, apkelmomchek axta m'a aqsok élmomnáwa ekheykegko axta m'a Wesse' egegkok tegma appagkanamap apagkok, tén han ma'a wesse' apwányam apxagkok. Apsawhomók axta apkelmoma aqsok, apkelseykekxeyk axta han ma'a kéláhakkásamáxche' sawo élyátekto élmomnáwa, Salomón axta apkelane.

¹⁰Apkelánekxeyk axta Roboam kéláhakkásamáxche' m'a sawo ekyexwase ekyaqmagkasso m'a mók axta, apkelméssek axta han yaqwayam eltaqmelchesek ma'a sẽlpextétamo kelwesse'e, apkeláneykha axta chá'a m'a átog nak wesse' apwányam apxagkok.

¹¹Apmeyákxeyk axta agkok chá'a wesse' apwányam ma'a Wesse' egegkok nak tegma appagkanamap apagkok, elxog axta han chá'a m'a sẽlpextétamo apkeláneykha nak tegma, elsók axta han chá'a kéláhakkásamáxche' nak. Apkelwa'akteyk axta agkok chá'a m'a, exatmekxak axta chá'a m'a apheykegkaxa axta apkeltaqmelchesso tegma.

¹²Massék axta aptaqnawaya Wesse' egegkok ma'a Roboam, hakte axta ñókxa eyaqha apwáxok ma'a apkelane mey'assáxma, axta emasséssekmok. Yetnegkek axta eyke han aqsok ektaqmela m'a kañe' Judá.

¹³Yágweykmók axta aqsa ekyennaqte apteme wesse' apwányam Roboam ma'a Jerusalén, aptemegkek axta makham wesse' apwányam. Cuarenta y un apyeyam apagkok axta weykmok apkeynamo apteme wesse' apwányam, diecisiete apyeyam axta han apteme wesse' apwányam ma'a Jerusalén, cham'a tegma apwányam apkelyéseykegkaxa axta Wesse' egegkok nepyeseksa m'a pók aptémakxa nak énxet'ák Israel, yaqwayam etnehek aphamakxa chá'a. Naamá axta ekwesey egken ma'a Roboam, eñama axta m'a Amón.

¹⁴Asagkek axta aqsok apkelane m'a, axta kaxeyenmak apwáxok ektamok ekmámnaqso' agko' ma'a Wesse' egegkok.

¹⁵Hágkek eknaqtáxésamaxche aptémakxa axta Roboam ma'a eknaqtáxésamaxchexa axta ektémakxa apheykha m'a Dios appeywa apkellegasso, Semaías tén han Iddo, weykcha'áhak apagkok nak ma'a apyapmeyk nano', eyeynamo m'a sekxók axta, ekwokmoho néxa apha.

¹⁶Axta kamassegweykmok apkelnápomap Roboam ma'a Jeroboam.

¹⁷Xama axta apketsapma Roboam, kélátawanyegwákxeyk axta m'a David Tegma Apwányam apagkok. Keñe axta apyaqmagkasa apteme wesse' apwányam ma'a apketche Abiam.