Read Lengua Sur 2 Crónicas 13 Bible Online

2 Crónicas 13 - Lengua Sur bible

2 Crónicas 13

¹Apkeynamók axta apteme wesse' apwányam Abiam ma'a Judá, ekweykmo axta dieciocho apyeyam apteme wesse' apwányam ma'a Jeroboam.

²Apqántánxo apyeyam axta apteme wesse' apwányam ma'a Jerusalén. Micaías axta ekwesey egken, Uriel apketche kelwána, apkeñama axta Guibeá. Apkelnápeykpek axta Abiam ma'a Jeroboam.

³Cuatrocientos mil sẽlpextétamo apagkok axta sekxók apkeynawo apkempakha'a m'a Abiam, apkelyéseykha axta. Keñe axta Jeroboam apkelyéseyncha'a ochocientos mil sẽlpextétamo yaqwayam yempakha'.

⁴Apkenegwokmek axta Abiam ma'a néten egkexe nak Semaraim, émhakxa nak ma'a egkexe Efraín. Aptáhak axta apyennaqtésawo appeywa s'e: “¡Jeroboam tén han apyókxoho énxet'ák nak Israel, kóleyxho sekpeywa!

⁵¿Yagkólya'ásegkok kéxegke apméssama apchókxa David ma'a Wesse' egegkok, Dios nak Israel, tén han ma'a aptawán'ák neptámen nak, yaqwayam etnahagkok chá'a apkelwesse'e apkelwányam meyke néxa, eñama m'a ekhémo mók apkelpaqhetchásamákpoho megkólmowána nak kólmasséssók?

⁶Apkenmexeykekxeyk axta eyke wesse' apagkok ma'a Jeroboam, Nabat axta apketche, Salomón axta apkeláneykha, cham'a Salomón David axta apketche.

⁷Apkelyepetchákxeyk axta m'a énxet'ák mékoho tén han élmasagcha'a nak apkeltémakxa, eltennaksek axta chá'a apkeltamhókxa enxoho etnehek ma'a Roboam, Salomón axta apketche, hakte apketkok apagko' axta makham, yelqáxkók axta apwáxok. Mopwanchek axta etaqheksohok chá'a aptáhakxa enxoho chá'a apkelpeywa m'a énxet'ák nak.

⁸Kéltamhók kaxwók kéxegke kólenmexekxak ma'a énxet apkelyéseykha nak Wesse' egegkok, appekkenchesso axta m'a David aptawán'ák neptámen, kélásennagkamchek kéxegke kélxámokma, tén han ekyetnama m'a weyke étkók kéleykmássesso sawo ekyátekto ekmomnáwa, apkelánesso axta m'a Jeroboam yaqwayam kóltéhek chá'a aqsok kéláyókxa'.

⁹¡Kélántekkessegkek axta han kéxegke m'a Wesse' egegkok nak apkelmaxnéssesso énxet'ák apagkok, Aarón aptawán'ák neptámen, tén han ma'a levitas, kéltegyeykegkek axta kéxegke kélagkok kélagko' apkelmaxnéssesso aqsok kéláyókxa, aptamheykegko nak chá'a m'a pók énxet'ák melya'áseyak nak Dios! ¡Énxet apmáheyo enxoho chá'a esanták xama weyke étkok kéleykmássesso, tén han siete nepkések apkelennay'a, kólteméssesek chá'a apkelmaxnéssesso m'a aqsok kéláyókxa élmowancha'a amya'a nak!

¹⁰Negko'o eyke Dios egagkok ma'a Wesse' egegkok, magyamasmak han. Aarón aptawán'ák neptámen ma'a apkelmaxnéssesso nak Dios énxet'ák apagkok apkeltemessáseykha nak chá'a m'a Wesse' egegkok, levitas akke m'a appasmeykha nak chá'a apkeltamheykha.

¹¹Egkéshok chá'a axto'o tén han taxnám Wesse' egegkok ma'a aqsok ekwatnamáxche, tén han ma'a aqsok ekmátsa nak ekpaqneyam éten agkok, enegkenchessekxak chá'a néten mésa ekmópeyo m'a pán kélpagkanchesso nak chá'a, elápogwatchásekxak han chá'a yókxoho taxnám ma'a cháléwasso étkók élápogwatmo nak chá'a m'a cháléwasso ekyawe sawo ekyátekto ekmomnáwa. Hakte nélyaheykekxók negko'o m'a apkeltémókxa nak antéhek ma'a Dios Wesse' egegkok, keñe kéxegke kélyamasma.

¹²Kólya'asagkoho chá'a apha Dios negaqta'awók negko'o, tén han ma'a appasmo nak apkelmaxnéssesso énxet'ák apagkok, penchásexcheyk yaqwayam kólaqkahaksek ma'a kélaqkahasso nak, yaqwayam ómpakhak negko'o kéxegke. Énxet'ák Israel, nágkólnapaxche aqsa Wesse' egegkok, Dios apagkok axta m'a kélyapmeyk nano', megkólxoho'.”

¹³Nanók axta eyke apkeltamho Jeroboam elmeyekxak neptámen nápakha sẽlpextétamo, yaqwayam enxoho ektamagkok ma'a neptámen, keñe axta m'a apxámakxa nak sẽlpextétamo apagkok nak Jeroboam, apchaqnáncha'a m'a apmonye'e nak Judá énxet'ák apagkok, neyseksa apketámeyak axta nápakha sẽlpextétamo m'a neptámen nak.

¹⁴Xama axta apkelenmexákxoho neptámen ma'a énxet'ák nak Judá, apkelwet'ak axta kélchetamakmo m'a ekpayho nak apmonye'e tén han neptámen. Tén axta apwónéncha'a Wesse' egegkok, yetlókok axta han apkelpáwasso apkelaqkahasso m'a apkelmaxnéssesso nak Dios énxet'ák apagkok.

¹⁵Xama axta apkelpáxameyncha'a ekyennaqte agko' apkempakha'a m'a énxet'ák Judá, apyaqmássek axta Dios ma'a Jeroboam yetlo m'a apyókxoho israelitas, nápaqtók ma'a Abiam, tén han Judá.

¹⁶Apkenyahágkek axta israelitas apmonye'e m'a énxet'ák Judá, hakte apméssek axta Dios yaqwayam elmok ma'a.

¹⁷Apxámok axta han apkelnapma énxet ma'a Abiam yetlo énxet'ák apagkok, apkeletsekkek axta quinientos mil sẽlpextétamo kélyéseykha axta m'a Israel.

¹⁸Cháxa ektáhakxa axta kélnaqtawásegkoho m'a israelitas, apmelyeyha'ak axta m'a énxet'ák nak Judá, hakte apkelásenneykxeyk axta m'a Wesse' egegkok, Dios apagkok axta m'a apyapmeyk nano'.

¹⁹Apyaqmássek axta Abiam ma'a Jeroboam, apkelyementegkek axta m'a tegma apkelyawe nak Betel, Jesaná tén han Efraín, yetlo m'a tegma apketkók aphéyak nak nepyáwa'.

²⁰Mopwanchek axta apmáheyo énnaqteyásekxak makham apteme wesse' apwányam Jeroboam, neyseksa apha axta makham ma'a Abiam. Tén axta aplegassásegkoho Wesse' egegkok, apketsekkek axta han ma'a Jeroboam.

²¹Yennaqweykmek axta apteme wesse' apwányam ma'a Abiam. Catorce axta ekyókxoho apnaqteyegka'a, veintidós axta apketchek apkelennay'a, keñe dieciséis ma'a apketchek kelwán'ák.

²²Hágkek eknaqtáxésamaxche aptémakxa axta Abiam, tén han ekyókxoho aqsok apkelane neyseksa apha, weykcha'áhak eknaqtáxésamaxchexa axta chá'a aptémakxa m'a Dios appeywa aplegasso apwesey axta Iddo.