Read Lengua Sur 2 Crónicas 14 Bible Online

2 Crónicas 14 - Lengua Sur bible

2 Crónicas 14

¹Apketsepmeyk axta Abiam, kélátawanyegwákxeyk axta m'a David Tegma Apwányam apagkok. Tén axta apyaqmagkassama apteme wesse' apwányam ma'a apketche Asá. Diez apyeyam axta weykmok ektaqmalma apheykha énxet'ák, neyseksa apteme wesse' apwányam.

²Leklamók axta apwáxok Dios Wesse' apagkok ektémakxa aqsok apkelane m'a Asá.

³Apkelyaqnegkásegkek axta élwatnamáxchexa nak aqsok kélpeykessamókxa axta chá'a m'a aqsok kéláyókxa éleñama nak mók nekha, cham'a ekpayho nak néten; nekha'a étkók axta aptemessásekxak ma'a meteymog élpagkanamaxche', apkelpáxqátekxeyk axta han ma'a kéleykmássesso nak Aserá.

⁴Apkeltamhók axta nahan elyo'ókxak Wesse' egegkok ma'a énxet'ák Judá, Dios apagkok axta m'a apyapmeyk nano', tén han elanagkok ma'a segánamakxa apagkok, keñe han ma'a apkeltémókxa nak chá'a etnahagkok.

⁵Apkelhaxyawásegkek axta kélpeykessamókxa nak chá'a aqsok kéláyókxa, tén han ma'a élwatnamáxchexa nak chá'a aqsok ma'a néten, cham'a apyókxoho tegma apkelyawe nak Judá. Tásek axta apheykha énxet'ák neyseksa apteme wesse' apwányam.

⁶Apkelyentómakpok axta apkeláneykegko tegma apkelyawe ekyennaqte kélhaxtegkáseyak nepyáwa Asá yókxexma Judá xa apyeyam nak, ektaqmalma axta apheykha m'a énxet'ák, megyempakhaya axta chá'a, hakte Wesse' egegkok axta apméssók ektaqmalma apheykha.

⁷Aptáhak axta apkeláneya énxet'ák Judá s'e: “Agyennaqtések sa' nélhaxtegkáseyak se'e tegma apkelyawe nak, anlanagkok sa' nepyáwa m'a neghaxtegkesso meteymog, tegma néten, atña'ák tén han negápeykekxexa nak chá'a ekyennaqte, nentáhakxa nak makham egagkok se'e negókxa nak. Hakte negye'eykekxeyk negko'o m'a Dios Wesse' egegkok, egméssegkek meyke ektáhakxa negheykha yetlo m'a apyókxoho apheykha nak neyáwa negheykegkaxa.” La'a appenchessama nak apkeláneykegkokxa m'a tegma apkelyennaqte nak kélhaxtegkáseyak nepyáwa'.

⁸Trescientos mil axta han apyókxoho sẽlpextétamo apagkok ma'a Asá, apkeleñama axta m'a Judá, yetlo apkeláhakkásamap tén han sawhéwa, keñe axta doscientos ochenta mil ma'a apkeleñama nak Benjamín, ekha axta han ma'a apkeláhakkásamap tén han yágke. Apkelánekpók axta m'a sẽlpextétamo megyeye nak elmahagkok eyesagkexa'.

⁹Apya'awak axta peya elnapakpok ma'a Zérah apkeñama nak Etiopía, yetlo un millón sẽlpextétamo apagkok, keñe han trescientos yátnáxeg apyenyawasso apkenchesso nak kempakhakma, apwa'ak axta m'a yókxexma nak Maresá.

¹⁰Apkelañexakmek axta m'a Asá, apkelánegwa'ak axta aptáhakxa yetlo sẽlpextétamo apagkok yaqwayam yempakhak ma'a ekyapwátegweykenxa xapop nak Sefata, nekha nak Maresá.

¹¹Apwóneyha axta Asá m'a Dios Wesse' apagkok, aptáhak axta s'e: “Wesse' egegkok, xép apwánxa apagkok apmopwána epasmok ma'a énxet ekha nak apyennaqte, tén han ma'a énxet apyelqamákpoho nak. ¡Hempásem negko'o, Dios Wesse' egegkok, hakte magya'ásseykmok negko'o exchep, yetlo nenxeyenma apwesey negko'o nélxegakmok peya ólnapaxchek se'e sẽlpextétamo nak! Xép apteme Dios Wesse' egegkok ¡Méko exchep awanchek kanmexekxa'!”

¹²Tén axta Wesse' egegkok apmallahanchesa m'a Asá yetlo énxet'ák Judá, nepyeseksa m'a etiopes; apkenyahágkek axta m'a.

¹³Apmenxenchek axta eyke Asá yetlo sẽlpextétamo apagkok ekweykekxoho m'a yókxexma Guerar, apsawheykpók axta aptekyawa m'a etiopes, kélnaqtawásegkók axta nápaqtók Wesse' egegkok tén han sẽlpextétamo apagkok, apkelmágkek axta han ekxámokma agko' ma'a aqsok apagkok axta m'a apkelenmexma.

¹⁴Tén axta apketámegko han ma'a apyókxoho tegma apkelyawe aphéyak axta m'a neyáwa yókxexma Guerar, hakte apcheykpek axta m'a Wesse' egegkok. Apkelmágkek axta aqsok apagkok ma'a énxet'ák Judá, hakte heykegkek axta ekxámokma aqsok ma'a.

¹⁵Apketámegkek axta han ma'a apkelpakxeneykegkaxa axta chá'a énxet'ák, élyáqtamakxa axta m'a kélnaqtósso, apnaqlákxeyk axta han apxámokma apagko' nepkések, tén han yányátnáxeg. Tén axta apkelmeyákxo makham ma'a Jerusalén.