Read Lengua Sur 2 Crónicas 16 Bible Online

2 Crónicas 16 - Lengua Sur bible

2 Crónicas 16

¹Apketámegkek axta Judá m'a wesse' apwányam Israel, cham'a Baasá, ekwokmo axta treinta y seis apyeyam apteme wesse' apwányam ma'a Asá, aphaxtegkessegkek axta ekyennaqte m'a Ramá, yaqwayam enxoho megyohok chá'a kalántaxnaxchek aphakxa m'a wesse' apwányam Judá.

²Tén axta Asá apkelhaxyawasa sawo élyátekto élmomnáwa tén han sawo élmope élmomnáwa, ekheykegko axta m'a kélxátamakxa nak aqsok élmomnáwa apagkok ma'a Wesse' egegkok tegma appagkanamap apagkok, keñe han ma'a wesse' apwányam apxagkok apyawe, tén axta apkeláphássesa m'a Ben-hadad, wesse' apwányam axta m'a Siria, aphama axta m'a Damasco. Apcháphássessek axta han se'e appeywa nak:

³“Aghéshok sa' mók nélpaqhetchásamáxkoho, xép tén han ko'o, yaqwayam ólpasmaxkoho', aptamheykegko axta ẽlyapmeyk nano'. Keso séláphássesso sawo élyátekto élmomnáwa s'e tén han sawo élmope élmomnáwa. Elwatés sa' appasmo m'a Baasá, wesse' apwányam nak Israel, keñe sa' kamaskok ko'o sélya'assóxma'.”

⁴Apkelyahákxók axta Ben-hadad aptáhakxa apcháneya m'a wesse' apwányam Asá, keñe axta apkeláphasa sẽlpextétamo apkelwesse'e apagkok yaqwayam ektamagkok ma'a tegma apkelyawe nak Israel. Apkelmeyk axta m'a lión, Dan, Abel-maim tén han ma'a apyókxoho tegma apkelyawe nak Neftalí, ekheykegkaxa axta nento.

⁵Xama axta apleg'a amya'a Baasá, apkelwátessásegkek axta aphaxtegkesso meteymog nepyáwa Ramá m'a énxet'ák apagkok, apmássessekmek axta apkeltamheykha.

⁶Tén axta wesse' apwányam Asá apnaqlawa apyókxoho énxet'ák Judá, Ramá axta han keleñamak apkelsawa meteymog, tén han ma'a yámet apkelmeykha axta Baasá yaqwayam yahaxtamok nepyáwa tegma, cháxa apkelmáncha'a axta han aphaxtegkesa ekyennaqte nepyáwa m'a Gueba tén han Mispá.

⁷Cháxa ekhem apmahágkaxa axta han Dios appeywa aplegasso Hananí, aptáha meyk'a m'a Asá, wesse' apwányam nak Judá, peya etnehek yának se'e: “Mopwanchek xép kaxwók elmok ma'a sẽlpextétamo apagkok nak wesse' apwányam Siria, apkelegketákxe', hakte apchásenneykekxeyk axta exchep ma'a wesse' apwányam Siria, keñe megyásenneykekxo m'a Dios Wesse' apagkok.

⁸Apxámok apagko' axta exchep apya'áya m'a sẽlpextétamo apkelyennaqte nak ma'a etiopes, tén han libios. Apxámok axta han ma'a apkelchánte nak yátnáxeg, tén han yátnáxeg apkelyenyawasso apkenchesso nak kempakhakma, Wesse' egegkok axta eyke apméssók xeyep yaqwayam elmok ma'a, hakte apchásenneykekxeyk axta.

⁹Apkeláneykha Wesse' egegkok ekyókxoho ektémakxa nak chá'a keso nélwanmeygkaxa, yaqwayam egkések chá'a apkelyennaqte m'a ektáha nak chá'a apcháyo ekmámnaqso' agko'. ¡Máxa ekyeyháxma eyke aptáhak xép aptáha kaxwo' xa ektáha nak! Katepagkok sa' eyke exchep kaxwók apkempakhamap.”

¹⁰Aptaqnókkók apagko' axta Asá m'a Dios appeywa aplegasso, apkeltamhók axta kólaqxegkesek kañe' negmomaxchexa'. Asagkók agko' axta han apteméssesakxa nápakha énxet'ák apagkok ektáha xa ektáha nak.

¹¹Hágkek eknaqtáxésamaxche aptémakxa axta Asá m'a weykcha'áhak apkeltémakxa axta m'a apkelwesse'e apkelwányam ma'a Judá tén han Israel, eyeynmo m'a sekxók axta, ekwokmoho apketsapa.

¹²Kelmássegkek axta apmagkok Asá, ekweykmo axta treinta y nueve apyeyam apteme wesse' apwányam; axta eyke yásenneykekxak Wesse' egegkok neyseksa apháxamap, wánxa axta aqsa apkeltémo epasmok ma'a pánaqte yapmeyk.

¹³Cuarenta y un apyeyam axta entáhak apteme wesse' apwányam apketsapa,

¹⁴tén axta kélátawanyegwákxo m'a takhaxpop apkeltémo axta kóllanaksek ma'a David Tegma Apwányam apagkok. Kélpekkenchek axta néten taháno, yetlo sokmátsa, tén han ma'a mók ektémakxa nak chá'a pánaqte áwa' élmátsa nak élpaqneyam kéltaqmelchessamo nak kéllane. Tén axta kéláléwássesa ekyawe agko' táxa.