Read Lengua Sur 2 Crónicas 19 Bible Online

2 Crónicas 19 - Lengua Sur bible

2 Crónicas 19

¹Méko axta ektáhakxa apwákxo makham apxagkok ma'a Josafat, wesse' apwányam nak Judá, cham'a Jerusalén, tásek axta apweykekxa'.

²Apkelanyexágkek axta eyke m'a Dios appeywa aplegasso Jehú, apketche nak Hananí, aptáhak axta apkelmaxneyáncha'a s'e: “¿Yaqsa ektáha appasma nak énxet'ák élmasagcha'a apkeltémakxa? ¿Yaqsa ektáha apkelásekha'awo nak ma'a apkelenmexma nak chá'a Wesse' egegkok? Aptaqnókek xép Wesse' egegkok eñama apteme xa.

³Yetneyk eyke han mók aqsok ektaqmela ekwetamaxche apkelane exchep, hakte apmasséssekmek axta m'a kéleykmássesso nak Aserá, ekhéyak axta s'e negókxa nak, xeyenmeyk axta apwáxok ektamok ma'a Dios.”

⁴Jerusalén axta aphak ma'a Josafat, etnohok axta eyke chá'a meyk'a m'a énxet'ák apagkok, eyeynókxa m'a Beerseba, ekweykekxoho m'a egkexe nak Efraín, yaqwayam yának chá'a elyo'ókxak ma'a Wesse' egegkok, Dios apagkok axta m'a apyapmeyk nano'.

⁵Apkelheyáseykha axta han chá'a énxet segyekpelchémo m'a apyókxoho tegma apkelyawe élyennaqte nak kélhaxtegkáseyak nepyáwa m'a Judá, meyke apkeymomap xama tegma apwányam.

⁶Aptáhak axta apkeláneya énxet segyekpelchémo s'e: “Kóltaqmelchesho sa' chá'a kéllányo aqsok kéllane, hakte háwe sa' yaqwayam kañék énxet ma'a ektémakxa nak kélyekpelchémo kélnámakkok, wánxa sa' aqsa m'a Wesse' egegkok apwesey, peya sa' chá'a etnehek apkelxegexma'a kélxéna enxoho chá'a yaqwánxa kólteméssesek énxet.

⁷Kóláwho sa' chá'a Wesse' egegkok, kóllanagkoho sa' chá'a m'a aqsok kéllanakxa enxoho, hakte mopmenyék agko' Dios Wesse' egegkok ma'a aqsok megkapéwomo nak, tén han apyeykhamap nak anlanok pók egmók, tén han nenxawe nak selyaqye yaqwayam manxének ekpayhawo nak eykhe anxének.”

⁸Apkelheyáseykha axta han Josafat Jerusalén nápakha levitas, tén han apkelmaxnéssesso Dios énxet'ák apagkok, keñe han apkelámha apmonye'e nak chá'a aphawóxama kañe' Israel, yaqwayam etnahagkok apkeltamheykha segyekpelchémo, apkeláneykekxa chá'a megkalánamáxche m'a Dios segánamakxa apagkok, tén han elánekxések chá'a ektémakxa apkelenmexamap ma'a énxet'ák apheykha nak Jerusalén.

⁹Tén axta apkeltennasa yaqwánxa chá'a etnahágkok: “Kóllána sa' chá'a kéltamheykha yetlo kéláyo Wesse' egegkok, yetlo ekmámnaqsoho, tén han meyke kéltémakxa.

¹⁰Apkelya'aweykteyk sa' agkok kéxegke kélpeywomo xamo' eltennásseták amya'a, cham'a apheykha nak apyókxoho tegma apkelyawe, cham'a apmatñà nak chá'a énxet, essenhan apketsapma naqsa nak chá'a yaqwayam kóllánekxések, yaqwayam enxoho kóltennaksek ma'a ektémakxa nak chá'a segánamakxa, tén han ektémakxa nak chá'a nélánémaxchexa antéhek. Kóltennés sa' chá'a megkólánhek etnehek megyaqhémo nápaqtók Wesse' egegkok, yaqwayam enxoho meltaqnaweygkehek kéxegke, tén han ma'a énxet'ák nak. Kéltemék sa' agkok xa, megkaphewakxeyk sa' kéxegke kélsexnánémaxche'.

¹¹Amarías apteme nak apkemha apmonye' apkelmaxnéssesso Dios énxet'ák apagkok, sa' etnehek apkemha apmonye' m'a ekyókxoho aqsok éleñama nak Wesse' egegkok, tén sa' Zebadías, apketche nak Ismael, apkemha apmonye' apagkok nak ma'a Judá énxet'ák apagkok, sa' etnehek apkemha apmonye' m'a ekyókxoho aqsok éleñama nak apkelwesse'e apkelwányam segánamakxa apagkok; tén sa' levitas etnehek appasmeykha kéltamheykha chá'a kéxegke, yaqwayam katnehek chá'a m'a kéltáhakxa enxoho. ¡Kólwasqápekxoho! ¡Kóltemeykha! ¡Wesse' egegkok sa' etnehek apkelxegexma kéllana enxoho aqsok ektaqmela!”