Read Lengua Sur 2 Crónicas 21 Bible Online

2 Crónicas 21 - Lengua Sur bible

2 Crónicas 21

¹Apketsekkek axta Josafat keñe kélátawanyegwákxo m'a David Tegma Apwányam apagkok, apyapmeyk nanók axta. Tén axta apyaqmagkassama apteme wesse' apwányam ma'a apketche Joram.

²Keso apkelyáxeg axta Joram se'e, apketchek axta han ma'a Josafat: Azarías, Jehiel, Zacarías, Micael tén han Sefatías. Josafat axta apketchek xa apyókxoho nak, wesse' apwányam axta m'a Judá.

³Apkelméssegkek axta han apyáp ekxámokma agko' sawo élyátekto élmomnáwa, tén han sawo élmope élmomnáwa, keñe han mók aqsok nak élmomnáwa. Apkelméssegkek axta han tegma apkelyawe élyennaqte nak kélhaxtegkesso nepyáwa m'a Judá, keñe axta aptémakxa wesse' apwányam apmeyáseykekxo m'a Joram, eñama apteme apketche átnaha apketkok.

⁴Xama axta ekyennaqweykmo apteme wesse' apwányam Joram ma'a apyaqmagkassamakxa axta apteme wesse' apwányam ma'a apyáp, apkeltamhók axta kólnápekxak ma'a apyókxoho apkelyáxeg nak, keñe han nápakha m'a apkelámha apmonye'e nak Israel.

⁵Treinta y dos apyeyam apagkok axta weykmok apkeynamo apteme wesse' apwányam, ocho apyeyam axta apteme wesse' apwányam ma'a Jerusalén.

⁶Axta eyke aptemék ma'a apkeltémakxa axta apkelwesse'e apkelwányam axta m'a Israel, tén han ma'a Ahab axta aptawán'ák neptámen, hakte Ahab aptáwen neptámen axta m'a aptáwa'; asagkek axta aptémakxa nápaqtók Wesse' egegkok.

⁷Axta eyke emáheyók emasséssók Wesse' egegkok ma'a David axta aptawán'ák neptámen, eñama m'a apkelane axta ekhémo mók apkelpaqhetchásamákpoho m'a David, apkeltennassama axta megkamassegwomek chá'a aptamhéyak apkelwesse'e apkelwányam ma'a aptawán'ák neptámen.

⁸Apkenmexeykekxeyk axta Edom ma'a Judá, neyseksa apteme axta wesse' apwányam ma'a Joram, apkelyésáha axta xama wesse' apwányam apagkok apagko'.

⁹Tén axta Joram apxega yetlo sẽlpextétamo apkelámha apmonye'e apagkok, tén han ekyókxoho yátnáxeg apkelyenyawasso apagkok apkenchesso nak kempakhakma, axta'a axta apnaqxétekhágko m'a Joram yetlo sẽlpextétamo apkelámha apmonye'e apkelchánte nak yátnáxeg apkelyenyawasso apkenchesso kempakhakma, tén axta apketámegko m'a edomitas, ektáha axta apwakhegwayam.

¹⁰Apxakcha'awók axta kaxwók aptamhágkok ma'a énxet'ák Edom, massék axta aptáha apkeláneykha m'a Judá, ekwokmoho s'e kaxwo' nak. Apxakcha'awók axta han aptamheykegkok ma'a tegma apwányam Libná, hakte apyamasmeyk axta Wesse' egegkok ma'a Joram, Dios apagkok axta m'a apyapmeyk nano'.

¹¹Apkelánegkek axta han kélpeykessamókxa chá'a aqsok kéleykmássesso m'a egkexe nak Judá, axta keñamak han apkelwátessáseyak apkelyetleykha Wesse' egegkok ma'a énxet'ák apheykha nak Jerusalén, tén han apkelyetnakhásseyam ma'a énxet'ák nak Judá.

¹²Keñe axta Dios appeywa aplegasso Elías apcháphássesa weykcha'áhak aptáxésso m'a Joram, ektéma nak ekpeywa s'e: “Aptáhak apcháneya exchep Wesse' egegkok, Dios apagkok axta m'a David, apyáp nano' axta exchep: ‘Metnék xép ma'a aptémakxa axta Josafat, apyáp axta, metnék han ma'a aptémakxa axta Asá, wesse' apwányam axta m'a Judá,

¹³apyetlamchek aqsa m'a aptamheykegkaxa axta m'a apkelwesse'e apkelwányam axta m'a Israel, xeyep keñamak apkelwátessáseyak apkelyetleykha Wesse' egegkok ma'a énxet'ák apheykha nak Judá, tén han ma'a Jerusalén, aptamheykegko axta m'a Ahab axta apnámakkok. Apkelnapmeyk han ma'a apkelyáxeg, éltaqmalma axta apkeltémakxa mexnawo nak xép.

¹⁴Cháxa keñamak peya nak yahak xép Wesse' egegkok nenlegeykegkoho ekmaso m'a énxet'ák apagkok, tén han apketchek, apnaqteyegka'a keñe han ma'a ekyókxoho aqsok apagkok.

¹⁵Keñe sa' xép yahak ekxámokma agko' negmasse. Ekmáske apwáxok ekwenaqte sa' etnéssesek, ekwokmoho élántepa támpagkok.’”

¹⁶Tén axta Wesse' egegkok apkellókasa apkelwáxok ma'a filisteos tén han énxet'ák árabes, apheykha axta neyáwa apheykegkaxa m'a énxet'ák Cus, aptaqnawaya m'a Joram;

¹⁷apkelyo'ókmek axta m'a énxet'ák Judá, appayhekxeyk axta apkelántaxna m'a apchókxa nak, apkelsákxeyk axta ekyókxoho m'a aqsok apkelwetágwayam axta m'a tegma aptaqmalma wesse' apwányam nak apxagkok, wokmók axta apnaqleykekxa m'a apketchek, tén han ma'a apnaqteyegka'a. Joacaz axta aqsa apkeymekpok, apteme axta apsexyók apagko'.

¹⁸Aplegassásegkók axta Wesse' egegkok apcha'a negmasse mantaqmelwayam nak ekmáske egwáxok natámen xa.

¹⁹Apqánet apyeyam axta temék, keñe élántepa támpagkok eñama apháxamap, apketsekkek axta yetlo aplegeykegkoho ekmáske ekmaso agko'. Axta han yáléwássessók xama enxoho táxa m'a énxet'ák apagkok, apteméssessama axta chá'a m'a apyapmeyk nano'.

²⁰Treinta y dos apyeyam apagkok axta weykmok apkeynamo apteme wesse' apwányam, ocho apyeyam axta apteme wesse' apwányam ma'a Jerusalén. Axta han kallapwámeykegkok énxet'ák apketsapma. Kélátawanyegwákxeyk axta m'a David Tegma Apwányam apagkok, háwe axta eyke m'a kélátawanyamakxa axta chá'a apkelwesse'e apkelwányam.