Read Lengua Sur 2 Crónicas 27 Bible Online

2 Crónicas 27 - Lengua Sur bible

2 Crónicas 27

¹Veinticinco apyeyam apagkok axta weykmok apcheynamo apteme wesse' apwányam Jotam, dieciséis apyeyam axta apteme wesse' apwányam ma'a Jerusalén. Jerusá axta ekwesey egken, Sadoc axta apketche.

²Leklamók axta apwáxok Wesse' egegkok ektémakxa aqsok apkelane m'a Jotam, ektémakxa axta aqsok apkelane m'a Ozías, apyáp axta. Axta eyke etaxnók ma'a Wesse' egegkok tegma appagkanamap apagkok. Yágweykmók axta aqsa apkeláneyak apkeltémakxa élmasagcha'a m'a énxet'ák.

³Jotam axta apkelane m'a átog ekyetno nak néten ma'a Wesse' egegkok tegma appagkanamap apagkok, tén han ekxámokma aqsok ekhéyak nak ma'a néten kélhaxtegkesso nepyáwa nak ma'a Ófel.

⁴Apkeláneykegkek axta han tegma apkelyawe néten egkexe nak ma'a Judá, tén han tegma apkelwenaqte m'a naxma nak.

⁵Apkempakhayak axta m'a wesse' apwányam nak amonitas, apyaqmásekpek axta han. Cháxa eyeynókxa axta apyánmagkasa chá'a aqsok apkelméyak amonitas xa apyeyam nak, tres mil trescientos kilos sawo ekmope, dos millones doscientos mil kilos hótáhap, hawók axta han ekwánxa m'a pók aptémakxa hótáhap. Hawók axta han chá'a apkelmésso xama m'a apqánet apyeyam nak, ekweykmoho m'a pók apyeyam.

⁶Ekha kéláyo axta aptemék ma'a Jotam, hakte tásek axta aptémakxa nápaqtók Wesse' egegkok.

⁷Ektémakxa axta apweynchámeykha Jotam, tén han ekyókxoho ektémakxa apmahéyak chá'a kempakhakma, tén han aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel tén han Judá.

⁸Veinticinco apyeyam apagkok axta weykmok apcheynamo apteme wesse' apwányam Jotam, dieciséis apyeyam axta apteme wesse' apwányam ma'a Jerusalén.

⁹Xama axta apketsapma, kélátawanyegwákxeyk axta m'a kélátawanyamakxa axta apyapmeyk nano', cham'a David Tegma Apwányam apagkok. Tén axta apyaqmagkassama apteme wesse' apwányam ma'a apketche Ahaz.