Read Lengua Sur 2 Crónicas 3 Bible Online

2 Crónicas 3 - Lengua Sur bible

2 Crónicas 3

¹Apcheynamók axta apkelánesso Salomón Wesse' egegkok tegma appagkanamap apagkok ma'a Jerusalén, cham'a egkexe nak Moria, apxekmowásamákpexa axta Wesse' egegkok ma'a David, apyáp axta, cham'a apkelyessáseykegkaxa axta yaqwayam étek ma'a David, apkexakkassamakxa axta chá'a apyempe'ék hótáhap apaktek ma'a Ornán, apteme axta jebuseo.

²Apcheynamók axta apkelane tegma ektáhakxa axta ánet ekhem ekxega m'a apqánet pelten, ekweykmo axta cuatro apyeyam apteme wesse' apwányam.

³Keso ekwánxa axta chá'a élwenaqte apnegkenchesso tegma apowhók apkelane Salomón se'e: veintisiete metros axta m'a ekwegqakxa', keñe nueve metros ma'a ekpayhakxa'.

⁴Nueve metros axta ekwenaqte m'a apwáxok émha amonye' nentaxnamakxa nak tegma appagkanamap, hawók axta m'a appayhakxa nak tegma, keñe axta han nueve metros ma'a ekmahéyak nak néten. Apkelyepetchessek axta han Salomón sawo ekyátekto ekmomnáwa agko' ma'a nentaxnamakxa nak apwáxok,

⁵apkelyepetchessek axta han yántéseksek pino m'a apwáxok neyseksa nak tegma, tén axta apkelyepetchásekxo han ma'a sawo ekyátekto ekmomnáwa ektaqmalma, apkeleykmassáseykha axta han áxa m'a, tén han cadenas kéleykmássesso,

⁶apkelyepetchessek axta han apkelnáxegkáseyncha'a m'a meteymog éltaqmalma nak. Keltássók agko' axta han ma'a sawo ekyátekto ekmomnáwa apkelmeykha axta.

⁷Apkelyepetchessegkek axta sawo ekyátekto ekmomnáwa ekyókxoho m'a kañe' apwáxok nak tegma: cham'a éltegyésso nak, tén han ma'a nekhaw'ék átog nak, nápakhaw'ék tén han ma'a atña'ák nak, apkelqahássek axta han apkeleykmassáseyncha'a Dios apkelásenneykha ekha apxempenák ma'a nápakhaw'ék nak tegma.

⁸Apkelanak axta han Kañe' Ekpagkanamaxchexa agko'. Nueve metros axta ekwegqakxa', hawók axta m'a appayhakxa nak tegma appagkanamap, nueve metros axta han ma'a appayhakxa nak. Tén axta apkelyepetchesa han ma'a sawo ekyátekto ekmomnáwa ektaqmalma, veinte mil kilos axta apmáha apkelyepetchesa xa ekyókxoho nak.

⁹Quinientos cincuenta gramos axta chá'a ekwánxa ekyentaxno xama m'a láwa. Apkelyepetchessek axta han sawo ekyátekto ekmomnáwa m'a tegma néten apwáxok nak.

¹⁰Apkeltamhók axta kóleykmássesha apqánet Dios apkelásenneykha ekha apxempenák ma'a Kañe' Ekpagkanamaxchexa agko' nak, sawo ekyátekto ekmomnáwa axta han kélyepetchásak ma'a.

¹¹Nueve metros axta ekwenaqte ekyókxoho apxempenák ma'a Dios apkelásenneykha ekha nak apxempenák; dos metros veinticinco centímetros axta chá'a xama apxempenek ektekxekweykmoho m'a nápakha tegma nak, keñe axta m'a mók nak, hawók axta han ma'a ekwánxa nak, ektekxekweykekxoho axta chá'a naw'a m'a mók apxempenek nak Dios apchásenneykha ekha apxempenák.

¹²Hawók axta han ma'a pók Dios apchásenneykha axta apxempenák, hawók axta m'a ekwánxa axta élwenaqte, ektekxekweykmoho axta chá'a m'a nápakha tegma nak, hawók axta han ekwenaqte m'a mók apxempenek, ektekxekweykmoho axta han apxempenek naw'a m'a pók Dios apchásenneykha ekha apxempenák.

¹³Apchaqneykha axta han chá'a xa Dios apkelásenneykha ekha apxempenák nak, ekwayam nak nueve metros apxempenák ekyókxoho, apkelpayhémok axta apkelenmexmo m'a neyseksa apwáxok tegma nak.

¹⁴Apkelanak axta han apáwa kélmakheyáseykha appesyam-apyexwase, hómáyok tén han ma'a apkeláxñeyo nak, apkeltamhók axta han kólótek kólyepetchesek kéleykmassáseykha Dios apkelásenneykha ekha apxempenák nápakha'.

¹⁵Apkeláneyak axta Salomón ánet élámha, dieciséis metros élwenaqte élmahéyak néten, yaqwayam elánchesek ma'a apmonye' nak tegma appagkanamap. Dos metros veinticinco centímetros axta élwenaqte m'a apqatkok.

¹⁶Apkeláneyak axta han cadena ekho kélnatanma, keñe axta apkelchexnágko m'a néten nak élámha; apkeláneyak axta han cien yántakyexna kéleykmássesso, apkelchexnágkek axta chá'a m'a neyseksa nak cadenas.

¹⁷Apkelánchásegkek axta élámha m'a apmonye' nak tegma appagkanamap, xama axta m'a nélya'assamakxa', keñe axta mók ma'a nepsagqalwa. Jaquín axta aptemessásak ekwesey m'a émha nak nélya'assamakxa', keñe axta Boaz ma'a émha nak nepsagqalwa.