Read Lengua Sur 2 Crónicas 30 Bible Online

2 Crónicas 30 - Lengua Sur bible

2 Crónicas 30

¹Apkeltamhók axta kóltennasagkok Ezequías apyókxoho m'a énxet'ák apheykha nak Israel tén han Judá, apcháphássessek axta han weykcha'áhak ma'a énxet'ák nak Efraín tén han Manasés, yaqwayam elmeyenták Wesse' egegkok tegma appagkanamap apagkok ekpayho nak Jerusalén, elánesseták apkelsawássessamo Wesse' egegkok ekhem Pascua, Dios apagkok nak Israel.

²Tén axta wesse' apwányam apkeltamho chá'a kalanaxchek kélessawássessamo ekhem Pascua, ektáhakxa nak chá'a apqánet pelten, natámen apkelmaxneyeykha m'a apkeláneykha tén han ma'a apyókxoho énxet'ák nak Jerusalén,

³hakte yawanchek axta chá'a kalanaxchek eyaqhawo enxoho chá'a ekhem élánamáxchexa, hakte apqántawók axta chá'a etnehek ma'a apkelmaxnéssesso Dios énxet'ák apagkok élmópeyo apyempe'ék, megyaqnekxeyk axta han chá'a énxet'ák ma'a Jerusalén.

⁴Leyawok axta apwáxok wesse' apwányam yaqwánxa axta etnahágkok, tén han ma'a apyókxoho énxet'ák nak,

⁵keñe axta apkeltamho kóltennasagkok ma'a apyókxoho énxet'ák Israel, eyeynókxa m'a Beerseba ekweykekxoho m'a Dan, yaqwayam elmeyenták elánesseták Wesse' egegkok, Dios nak Israel ekhem Pascua m'a Jerusalén. Hakte mexámhek axta chá'a apkeláneyak ma'a nano' axta, ekhawo ektémakxa nak ektáxésamaxche'.

⁶Tén axta apkelxega m'a apkelseykha axta weykcha'áhak apkelweynchámeyncha'a m'a yókxexma Israel, keñe han ma'a Judá, yetlo m'a wesse' apwányam axta aptáxésso tén han ma'a apkeláneykha nak, yaqwayam eltennasagkok apkeltamhókxa etnahágkok chá'a m'a wesse' apwányam, aptáha axta appeywa s'e: “Israelitas, kólyo'ókxa makham Wesse' egegkok, Dios apagkok axta m'a Abraham, Isaac tén han Israel, keñe sa' ey'óták nahan kéxegkáxa m'a, kéxegke kéleymomáxche axta kélqántawo', apkelegketma axta m'a kelwesse'e apkelwányam Asiria.

⁷Nágkólteme aptamheykegkaxa axta kélyapmeyk nano', tén han ma'a kélnámakkok, apkeltémo axta kólmasséssók Wesse' egegkok, Dios apagkok axta kélyapmeyk nano', eñama apkelyenseyam apkelyetleykha ekhawo kélwet'a nak kéxegke.

⁸Nágkólteme élyennaqte kélwáxok, aptamheykegko axta m'a kélyapmeyk nano'; kólya'assásekxa kélmék Wesse' egegkok, yaqwayam enxoho kóllánekxak ekhémo mók kélpaqhetchásamáxkoho, kólmeyenta m'a tegma appagkanamap apagkok nak, apteméssessama axta appagkanamap meyke néxa. Kóllána apkeltémo nak chá'a kóllának ma'a Dios Wesse' kélagkok, keñe sa' kamaskok eltaqnaweygkok kéxegke.

⁹Kélya'aweykteyk sa' agkok makham kéxegke m'a Wesse' egegkok, elepyóshok sa' elanok katnaha nak kélnámakkok ma'a kélnámakkok nak kéxegke, tén han kélketchek, apkelmoma axta, keñe sa' yohok elmeyenták makham se'e apchókxa nak, hakte apyósek henlanok ma'a Dios Wesse' kélagkok nak, hegemlekxohok nahan, meltaqheksók sa' han kéxegke kélya'aweykto enxoho.”

¹⁰Apkelweynchámeyha axta apkelseykha weykcha'áhak ma'a ekyókxoho xapop nak Efraín tén han Manasés, apsawhawók axta apkelweynchámeyncha'a m'a tegma nak, ekwokmoho apkelwokmo m'a Zabulón. Apkelesméssek axta eyke aqsa chá'a m'a énxet'ák, apkelwanyawók axta chá'a.

¹¹Nápakha Aser énxet'ák apagkok, tén han Manasés, keñe han Zabulón axta aqsa apkelyélaqteyásak chá'a apkelwáxok nápaqtók Dios, apkelmeyánteyk axta m'a Jerusalén.

¹²Dios axta han apkelánésawok apkelwáxok ma'a énxet'ák Judá, yaqwayam enxoho kaxhok mók ekleklamo apkelwáxok elanagkok ma'a apkeltémókxa axta etnahagkok ma'a wesse' apwányam, tén han ma'a apkelámha apmonye'e, apkeltémókxa axta etnahagkok ma'a Wesse' egegkok.

¹³Apchaqnákxeyk axta Jerusalén aptáhakxa nak apqánet pelten, apxámokma apagko' énxet, yaqwayam enxoho elanagkok apkelsawássessamo kelpasmaga meyke kempáseyak.

¹⁴Amonye' axta apkelhaxyawásegkok ekyókxoho nak élwatnamáxchexa aqsok, tén han ma'a élwatnamáxche axta chá'a aqsok ekmátsa nak ekpaqneyam éten agkok, ekhéyak axta m'a Jerusalén, apkexakhagwokmek axta m'a alwáta nak Cedrón.

¹⁵Apkelnapchek axta nepkések apketkok aptekyómo axta chá'a ekhem Pascua, ekhem catorce, aptáhakxa nak apqánet pelten. Apkelmegqásekpekxók apagko' axta m'a apkelmaxnéssesso Dios énxet'ák apagkok, tén han levitas, apkelmópesákxeyk axta apyempe'ék, apnaqlákxeyk axta aqsok kélnaqtósso yaqwayam kólwatnek ma'a Wesse' egegkok nak tegma appagkanamap apagkok.

¹⁶Tén axta apchaqnágweykxo chá'a m'a apkeltamheykegkaxa axta chá'a, ekhawo ektémakxa nak ekxeyenma Moisés segánamakxa apagkok, apteme axta Dios énxet apagkok. Apkexpaqháha axta aqsok apkelmaxnéssesso Dios énxet'ák apagkok ma'a éma, apkelmésso axta m'a levitas.

¹⁷Apkelnáhakkassek axta levitas aqsok kélnaqtósso, yaqwayam elanaksek ekhem Pascua xa apyókxoho melmópeyáseykekxa nak makham apyempe'ék, yaqwayam kólpagkanchesek Wesse' egegkok, hakte apxámok axta énxet melmópeyáseykekxa makham apyempe'ék.

¹⁸Apxámok apagko' axta Efraín énxet'ák apagkok, tén han Manasés, keñe han Isacar tén han Zabulón énxet'ák apagkok aptókagko m'a ektámáxche axta ekhem Pascua, axta eyke etnaheykegkok ma'a ektémakxa nak eknaqtáxésamaxche, hakte axta elmópeyáseykekxak apyempe'ék. Apkelmaxnéssessek axta eyke Ezequías ma'a énxet'ák nak, axta aptáhak se'e: “Wesse', ektaqmeleykha nak apwáxok henlano', elásekhekxoho apyókxoho énxet'ák, apteméssesso nak ekmámnaqsoho apketamso exchep,

¹⁹oh Wesse', Dios apagkok nak xa énxet'ák nak, elásekhekxoho neyseksa eykhe melmópeyáseykekxa apyempe'ék, ekhawo éltémókxa nak antéhek segánamakxa m'a tegma appagkanamap.”

²⁰Apleg'ak axta Wesse' egegkok apkelmaxnagko m'a Ezequías, tén axta meyaqmagkásekxo apkeltémakxa ekmaso m'a énxet'ák.

²¹Apkelánegkek axta yetlo élpayheykekxoho agko' apkelwáxok apkelsawássessamo kelpasmaga meyke kempáseyak, ekweykmoho siete ekhem ma'a israelitas, apheykha axta m'a Jerusalén. Keñe axta apkelpeykásawo Wesse' egegkok yókxoho ekhem ma'a apkelmaxnéssesso Dios énxet'ák apagkok, tén han levitas, yetlo apkelpáwasso m'a élyennaqte nak élpáwa, apkelpáwássesso m'a Wesse' egegkok.

²²Apkeltennássek axta Ezequías ekleyawo apwáxok aptamhágkaxa m'a levitas, eñama apxekmósso ektaqmalma apkeltemessáseykha m'a Wesse' egegkok. Aptókagkek axta natámen apkelmésso m'a aqsok ektekyawa segwetassamo nak sẽlásekheykekxoho ekweykmoho siete ekhem, tén han natámen apkelpeykessamo m'a Wesse' egegkok, Dios apagkok axta m'a apyapmeyk nano',

²³apyókxoho énxet'ák axta han apmakók ewenaqtésagkok ma'a kélessawássessamo nak, ekweykmoho makham siete ekhem, apkelánegkek axta yetlo élpayheykekxa apkelwáxok;

²⁴hakte apkelméssegkek axta énxet'ák mil weyke étkók kelennay'awók ma'a Ezequías, wesse' apwányam axta m'a Judá, tén han siete mil nepkések, tén axta han apkelámha apmonye'e apkelmeyásegko mil weyke étkók kelennay'awók ma'a énxet'ák, keñe han diez mil nepkések. Apxámok axta apkelmaxnéssesso Dios énxet'ák apagkok apkelmópeyásekxo apyempe'ék.

²⁵Kelpayhekxeyk axta apkelwáxok ma'a apyókxoho énxet'ák Judá, hawók axta han ma'a apkelmaxnéssesso nak Dios énxet'ák apagkok, tén han levitas, ekweykekxoho m'a apyókxoho énxet'ák apkeleñama axta apkelxegayam ma'a Israel, tén han énxet'ák apkeleñama nak mók nekha, apkelwe axta m'a Israel, tén han ma'a apheykencha'a axta m'a Judá.

²⁶Awanhók agko' axta élpayheykekxa apkelwáxok énxet'ák ma'a Jerusalén, hakte nanók axta megkatnaheykekxa Jerusalén xa ekhawo nak, wánxa axta aqsa m'a aphamakxa axta Salomón, David axta apketche, wesse' apwányam axta m'a Israel.

²⁷Tén axta apkelchampákxo néten ma'a apkelmaxnéssesso Dios énxet'ák apagkok tén han levitas, apkelmaxnéssesa aqsok éltaqmela m'a énxet'ák; aphaxnawok axta han ma'a Wesse' egegkok, wákxók axta han néten ma'a apkelmaxneyéyak, aphakxa nak ma'a Dios appagkanamap.