Read Lengua Sur 2 Crónicas 35 Bible Online

2 Crónicas 35 - Lengua Sur bible

2 Crónicas 35

¹Apkelsawassásawok axta ekhem Pascua Josías ma'a Jerusalén, apkelánésa m'a Wesse' egegkok: Aptekyókek axta nepkések apketkók yaqwayam kólmaha kélessawássessamo ekhem catorce, apkemha apmonye' pelten la'a apyeyam.

²Apkeltennássek axta chá'a yaqwánxa eltemeykha m'a apkelmaxnéssesso Dios énxet'ák apagkok, apkelwasqakkásekxók axta chá'a apkeltamho elanagkok apkeltamheykha m'a Wesse' egegkok tegma appagkanamap apagkok.

³Keñe axta m'a levitas, aptáha axta chá'a apkelxekmowáseyak ma'a ekyókxoho Israel, apkelpagkanchásamap axta m'a Wesse' egegkok, aptáha apkeláneya s'e: “Kólpekkenwom sa' yántéseksek ekpagkanamaxche m'a tegma appagkanamap apkelane axta Salomón, David axta apketche, wesse' apwányam axta m'a Israel. Kamaskok sa' kólpatmaha kólsawha. Kóllanés aqsok Dios Wesse' kélagkok, tén han ma'a Israel, Wesse' egegkok énxet'ák apagkok.

⁴Kóllánekxa sa' chá'a kéltáhakxa kélnámakkok kélancha'awo nak chá'a, tén han yaqwánxa chá'a kólmekxak kéltamheykha, ekhawo ektémakxa axta appekkeneykekxa aptáxésso m'a David, wesse' apwányam axta Israel, tén han ma'a apketche Salomón.

⁵Exmakha sa' chá'a xama apkelxegexma'a apancha'awók levitas ma'a tegma appagkanamap, ektáhakxa nak chá'a aphawóxama apagko', yaqwayam epasmok chá'a m'a pók apkelyáxeg'a nak israelitas, apnámakkok nak.

⁶Kólaqha sa' nepkések apketkok apmatñamo nak chá'a ekhem Pascua, kólmópeyásekxa sa' kélyempe'ék, kóllánekxa sa' eyeyméxchexa nak, yaqwayam elanagkok kélnámakkok ma'a apkeltémo axta elanagkok ma'a Wesse' egegkok, eñama axta apkeltennasso m'a Moisés.”

⁷Tén axta Josías apkelmésa apnaqtósso apagko' ma'a apyókxoho énxet'ák apkelwayam axta m'a, yaqwayam elanagkok ma'a ekhem Pascua: treinta mil axta apyókxoho m'a nepkések apketkók tén han yát'ay apketkók, keñe axta tres mil ma'a weyke yágkelwán'ák.

⁸Apkelméssek axta han aqsok apagko' énxet'ák ma'a wesse' apwányam nak apkeláneykha, apmáheyo apagko' nak elmések, tén han ma'a apkelmaxnéssesso Dios énxet'ák apagkok, tén han levitas. Keñe axta Hilquías, tén han Zacarías, keñe han Jehiel, aptaqmelchesso axta chá'a m'a Dios tegma appagkanamap apagkok, apkelmésa apkelmaxnéssesso Dios énxet'ák apagkok dos mil seiscientos aqsok apnaqtósso yaqwayam elanagkok ekhem Pascua, keñe trescientos ma'a weyke yágkelwán'ák;

⁹tén han Conanías yetlo apkelxegexma'a, Semaías tén han Natanael, keñe han ma'a Hasabías, Jehiel, tén han Jozabad, apkelámha apmonye'e axta m'a levitas, apkelmésa cinco mil aqsok apnaqtósso yaqwayam elanagkok ekhem Pascua, keñe quinientos weyke yágkelwán'ák.

¹⁰Penchásexcheyk axta ekyókxoho aqsok yaqwayam kalanaxchek ma'a kélessawássessamo, apkelmeyákxeyk axta chá'a apkelmaxnéssesso Dios énxet'ák apagkok ma'a apkeltamheykegkaxa axta chá'a, keñe levitas apkelánekxo aptamhágkaxa ekweykenxa axta chá'a apmeykekxexa apkeltamheykha, apkeltémókxa axta chá'a etnahágkok ma'a wesse' apwányam.

¹¹Tén axta apkelnapa m'a aqsok kélnaqtósso ektekyómo axta chá'a ekhem Pascua, apkelexpaqháha axta ekwatnamáxchexa aqsok apkelmaxnéssesso Dios énxet'ák apagkok ma'a éma, apkelmésso axta chá'a m'a levitas, neyseksa apkelhaxyawáseyak émpe'ék ma'a aqsok ektekyawa.

¹²Keñe axta apkelhaxyawassásegko m'a pexmok agkok yaqwayam kalwatnaxche', apkelmésa chá'a xama xama m'a ektáhakxa nak chá'a aphawóxama apagko', yaqwayam enxoho elmések ma'a Wesse' egegkok, ekhawo éltémókxa nak ma'a Moisés weykcha'áhak apagkok; axta han aptemessásak ma'a weyke yágkelwán'ák nak.

¹³Apkelyaqxeygkek axta han ápetek yaqwayam elsawásseshok ma'a ekhem Pascua, ekhawo ektémakxa nak eknaqtáxésamaxche; tén axta m'a mók aqsok kélmésso naqsa élpagkanamaxche, aphánegko weygke, tén han yánsógweygke, keñe han ma'a kélpeykesso apto, apmelasseyk axta han ekpekhe agko' ma'a apyókxoho énxet'ák.

¹⁴Tén axta levitas aphánegko apagko' ma'a ektáha axta apagkok, tén han aphanchesa m'a apkelmaxnéssesso nak Dios énxet'ák apagkok, hakte wokmok axta axta'a apkelwatno aqsok ektekyawa, tén han pexmok agkok ma'a apkelmaxnéssesso nak Dios énxet'ák apagkok, Aarón axta aptawán'ák neptámen. Axta keñamak apháneykegkoho apagko' levitas ma'a ektáha axta apagkok, tén han aphanchessama m'a apkelmaxnéssesso Dios énxet'ák apagkok, Aarón axta aptawán'ák neptámen.

¹⁵Keñe han ma'a apkelmeneykmasso, Asaf axta aptawán'ák neptámen, apchaqnáha axta aqsa han ma'a apchaqneykegkaxa axta chá'a, apkeltémókxa axta chá'a katnehek ma'a David, Asaf, Hemán tén han Jedutún, apteme axta apwetayo aqsok apxekmósso Dios, wesse' apwányam apkeláneykha. Apchaqnáha axta aqsa han apkeltaqmelchesso nak átog ma'a apchaqneykegkaxa axta chá'a átog; apchaqnáha axta aqsa chá'a m'a apchaqneykegkaxa nak, hakte levitas axta aphanchessók chá'a aqsok ektekyawa ápetek ektáha nak apagkok, cham'a apkelxegexma'a nak.

¹⁶Cháxa ektémakxa axta élánamáxchekxo ekyókxoho nenlánésso nak aqsok Wesse' egegkok xa ekhem nak, yaqwayam kalanaxchek Pascua, tén han kólnegkenek aqsok élwatnamáxche m'a néten nak élwatnamáxchexa aqsok, Wesse' egegkok nak apagkok, apkeltémókxa axta katnehek ma'a wesse' apwányam Josías.

¹⁷Appásegweykmek axta israelitas élánamáxko axta ekhem Pascua m'a, tén han aptámákpo axta kelpasmaga meyke kempáseyak, ekweykmoho siete ekhem.

¹⁸Axta kalánamáxchek Israel xama enxoho ekhawo nak élánamáxche Pascua xa ekwánxa nak, wánxa axta aqsa m'a aphamakxa axta Dios appeywa aplegasso Samuel; méko axta xama enxoho kelwesse'e apkelwányam Israel apkelane Pascua, ekhawo nak apkelane m'a Josías, yetlo apkelxegexma'a m'a apkelmaxnéssesso Dios énxet'ák apagkok tén han levitas, keñe han ma'a énxet'ák nak Judá, tén han Israel ektáha axta appásegwayam, keñe han ma'a énxet'ák apheykha nak Jerusalén.

¹⁹Kelánamáxcheyk axta ekweykmo axta dieciocho apyeyam apteme wesse' apwányam Josías xa Pascua nak.

²⁰Wenaqtémók axta natámen apxátekháseykekxa axta Josías ma'a tegma appagkanamap, apmahágkek axta Necao ma'a ekpayho nak wátsam Éufrates, wesse' apwányam axta m'a Egipto, yaqwayam enxoho yempakhak ma'a Carquemis. Apkelanyexakmek axta m'a Josías;

²¹apkeláphássek axta eyke apkelápháseykha m'a Necao apkeltamho etnehek yának se'e: Ná hémpakha aqsa ko'o exchep, wesse' apwányam nak Judá. May'awak ko'o exchep yaqwayam wanmexek, mók apchókxa ko'o peyk wampakha', sélenmexma nak ko'o. Dios ko'o apkeltamhók apekhaksek sekxega; elwatés apmáheyo emasséssók yaqwánxa etnehek Dios, sepasma nak ko'o, keñe sa' tásek katnehek ektáhakxa exchep, memasséssemek sa'.

²²Axta eyke etaqhegwokmok ma'a Josías, apkelenxanakmek axta aqsa elnapakpok ma'a, axta elyahákxak aptáhakxa apchésso m'a Necao, amya'a eñama axta Dios. Apchampakha'ak axta ekyapwátegweykenxa nak xóp ma'a Meguido,

²³apkelyát'ak axta yágke, apkelmeykha nak yágke m'a wesse' apwányam Josías. Tén axta wesse' apwányam aptáha apkeláneya sẽlpextétamo apkelámha apmonye'e apagkok se'e: “¡Héltekkes ko'o s'e émpakháxchexa nak, tásek ko'o sekmaktamáxche'!”

²⁴Aptekkessek axta sẽlpextétamo apkelámha apmonye'e apagkok ma'a kañe' yátnáxeg apyenyawasso apagkok apkenchesso nak kempakhakma, apkenátchásekxeyk axta mók yátnáxeg apyenyawasso apagkok apyentamákxo m'a Jerusalén, cham'a apketsapwákxexa axta han ma'a. Kélátawanyeyk axta m'a kélátawanyamakxa axta apyapmeyk nano'. Apkellekxagweyha axta apyókxoho énxet'ák nak Judá tén han Jerusalén, eñama apketsapma m'a Josías.

²⁵Aptáxéssessek axta han Jeremías xama amya'a ekxeyenma nak senlapwayam, weykmók makham se'e negwánxa, élxeyenweykekxoho chá'a apkelwáxok apkelmeneykmasso, tén han kelán'a élmeneykmasso m'a Josías, negmeneykmasso ekxeyenma nak senlapwayam. Élmeneykmásamáxche han temék Israel xa negmeneykmasso nak, naqtáxésamaxcheyk han ma'a eknaqtáxésamaxchexa nak xa negmeneykmasso nak.

²⁶Hágkek eknaqtáxésamaxche, eknaqtáxésamaxchexa axta chá'a weykcha'áhak apagkok apkelwesse'e apkelwányam Israel tén han Judá m'a ektémakxa axta apha Josías, tén han aptamheykha eñama nak Dios, apkeláneya axta ektémakxa axta ekpeywa ektáxésamaxche m'a weykcha'áhak, Wesse' egegkok segánamakxa apagkok, tén han aqsok apkelane, eyeynmo m'a sekxók axta ekwokmoho apketsapa.