Read Lengua Sur Esdras 5 Bible Online

Esdras 5 - Lengua Sur bible

Esdras 5

¹Aplegassegkek axta amya'a eñama nak Wesse' egegkok, Dios nak Israel ma'a Dios appeywa aplegasso Hageo tén han Zacarías, Idó axta apketche, cham'a judíos apheykencha'a axta m'a Judá tén han Jerusalén.

²Keñe axta m'a Zorobabel Salatiel axta apketche, tén han Josué, Josadac axta apketche, apkelchampákxoho makham apkeltamheykha apxátekháseykekxa Dios tegma appagkanamap apagkok ma'a Jerusalén, axta han apkelxegexma'a m'a Dios appeywa apkellegasso nak yaqwayam epasmaha.

³Keñe m'a Tatenai, apteme axta apkeláneykha apchókxa halep nak wátsam Éufrates ekpayho nak ektaxnegwánxa ekhem, tén han ma'a Setar-boznai, yetlo apkelxegexma'a, apkelya'aweykxo aptáha apkeláneya s'e: “¿Yaqsa éltémo kólxátekhásekxak makham se'e tegma appagkanamap nak, tén han kólhaxtegkásekxak yántéseksek? ¿Háxko apkelwesey apxátekháseykekxa nak makham se'e tegma nak?”

⁵Apkeláneykha axta eyke Dios ma'a apkelámha apmonye'e axta judíos, axta eyke emássessekmok sekxók makham apkeltamheykha, apcháphássessek axta sekxók amya'a m'a Darío apkelhaxna yaqwánxa etnehek apchátegmowéyak.

⁶Keso weykcha'áhak aptáxéssesso axta apcháphássesso wesse' apwányam Darío m'a Tatenai, apkeláneykha axta apchókxa m'a halep nak wátsam Éufrates ekpayho nak ektaxnegwánxa ekhem, tén han Setar-boznai, yetlo m'a apkelxegexma'a aptamhéyak axta wesse' apwányam apkeláneykha m'a halep nak wátsam Éufrates ekpayho nak ektaxnegwánxa ekhem.

⁷Axta entemék kéltáxésso s'e: “Negáphássessek negko'o ekxeyenma egwáxok xép wesse', néltamhók anlegaksek nélmahágko axta negko'o m'a yókxexma nak Judá, tén han ma'a tegma appagkanamap apagkok nak Dios meyke ekhémo, kélxátekhásekxexa axta makham kélnegkenágko m'a meteymog élyawe kélyaqtennéyak nak. Kélhaxtamákxeyk han yántéseksek ma'a nápakhaw'ék, hakte yahamók apkeltamheykha, tásek han ekmáheyo katyapok apkeltamheykha.

⁹Nélmaxneyáha axta negko'o m'a apkelámha apmonye'e nak judíos, néltamho agya'asagkohok yaqsa énxet apmésso yaqwayam exátekhásekxak ma'a tegma appagkanamap, tén han yahaxtemekxak ma'a yántéseksek,

¹⁰tén han nélmaxneyáncha'a apkelwesey m'a ektáha nak apkelámha apmonye'e, yaqwayam enxoho negko'o annaqtáxésagkok apkelwesey, keñe óltennaksek xép wesse'.

¹¹Keñe aptáha sẽlátegmowágkokxo s'e: Neykhe m'a apkelpeykessamo nak Dios apha nak néten, tén han keso náxop, apkelánekxeyk ma'a tegma appagkanamap nanók agko' apkelánamap axta, apkelane axta m'a wesse' apwányam nak Israel.

¹²Apkelxénchek axta han aplókassama Dios apha nak néten nanók axta m'a apyapmeyk nano', apméssama yaqwayam elmok ma'a Nabucodonosor, wesse' apwányam axta m'a Babilonia, apteme axta Caldeos, apteme axta han apmassésseyam xa tegma appagkanamap, keñe han apnaqleykekxa axta Babilonia.

¹³Xama apyeyam axta temék apteme wesse' apwányam Ciro m'a Babilonia, apkeltamhók axta kólxátekhásekxak ma'a Dios tegma appagkanamap apagkok.

¹⁴“Ẽltennássek axta han apkelweykekxo wesse' apwányam Ciro m'a aqsok kélmeykegkaxa sawo ekyátekto élmomnáwa, tén han sawo ekmope élmomnáwa, apkelwayam axta Nabucodonosor ma'a Dios tegma appagkanamap apagkok nak Jerusalén, apxátaweykekxa axta m'a ekheykegkaxa nak aqsok apcháyókxa m'a Babilonia, apkelmeyáseykekxo m'a Sesbasar, apteméssessama axta apkeláneykha apchókxa.

¹⁵Apkeltémók axta Ciro yánchásekxak Sesbasar ma'a aqsok kélmeykegkaxa nak, exátawakxak makham ma'a tegma appagkanamap nak Jerusalén, tén han elánekxak ma'a apyetnamakxa axta m'a Dios tegma appagkanamap apagkok.

¹⁶Apwayak axta m'a Sesbasar, apnegkeneykegkek axta apowhók ma'a Dios tegma appagkanamap apagkok nak Jerusalén. Cháxa eyeynawo axta kélxátekháseykekxa xa, axta eyke epenchásamákpok makham.

¹⁷“Leyawók sa' agkok apwáxok xa wesse', yána sa' kólchetagkasek eknaqtáxésamaxche weykcha'áhak apagkok apkelwesse'e apkelwányam nak Babilonia, yaqwayam sa' kataxchek naqsók kexa apkeltémo kólxátekhásekxak Dios tegma appagkanamap apagkok Jerusalén ma'a wesse' apwányam Ciro, hẽltennés sa' negko'o ekxénakxa apwáxok etnéssesek xa, wesse'.”