Read Lengua Sur Esdras 7 Bible Online

Esdras 7 - Lengua Sur bible

Esdras 7

¹Wenaqtémók axta han natámen xa, aptémakxa axta wesse' apwányam Artajerjes ma'a Persia, aphegkek axta han xama énxet apwesey axta Esdras, apteme axta Seraías aptáwen neptámen, Azarías, Hilquías,

²Salum, Sadoc, Ahitub,

³Amarías, Azarías, Meraiot,

⁴Zeraías, Uzí, Buquí,

⁵Abisúa, Finees, Eleazar, tén han Aarón, apteme axta apteyapma apmonye' apteme apkelmaxnéssesso Dios énxet'ák apagkok.

⁶Esdras axta apteme apya'áseykegkoho apkelxekmósso ektémakxa nak segánamakxa, apmésso axta m'a Wesse' egegkok, Dios nak Israel, apchásenneykekxo axta m'a Moisés, appasmomchek axta m'a Wesse' egegkok. Axta keñamak wesse' apwányam Artajerjes apméssama chá'a ekyókxoho m'a apkelmaxneyakxa enxoho chá'a. Axta keñamak Esdras apteyapma m'a Babilonia,

⁷apmeyeykekxo m'a Jerusalén, yetlo apkelxegexma'a m'a israelitas, tén han apkelmaxnéssesso Dios énxet'ák apagkok, levitas, tén han ma'a apkelmeneykmassamo nak, tén han ma'a apkeltaqmelchesso nak átog, tén han ma'a apkeltamheykha nak tegma appagkanamap, cham'a ekweykmo axta siete apyeyam apteme wesse' apwányam ma'a Artajerjes.

⁸Appasmomchek axta yetlo ektaqmeleykha apwáxok Dios ma'a Esdras, apteyepmeyk axta Babilonia ekhem émha amonye' ekxegál'a apkemha apmonye' pelten, ekweykmo axta siete apyeyam apteme wesse' apwányam Artajerjes. Apweykekxeyk axta Jerusalén amonye' ekxega ekhem pelten cinco, cháxa apyeyam nak.

¹⁰Axta eyenseykmok ekxéneykha apwáxok Esdras yaqwayam eltámésakpok tén han elának ma'a Wesse' egegkok segánamakxa apagkok, tén han elxekmósek israelitas ma'a segánamakxa eñama nak Wesse' egegkok, tén han apchánamakxa nak antéhek.

¹¹Keso ektémakxa axta ekpeywa weykcha'áhak apmésso axta wesse' apwányam Artajerjes ma'a Esdras, apkelmaxnéssesso nak Dios énxet'ák apagkok, tén han apkelxekmósso apnámakkok, apkeltámésamap axta ekyókxoho m'a apkeltémókxa nak antéhek Dios, tén han Wesse' egegkok segánamakxa apagkok, apmésso axta Wesse' egegkok ma'a énxet'ák Israel:

¹²“Ko'o Artajerjes, sekteme nak wesse' apwányam, ekméssek ko'o exchep ekxeyenma ewáxok Esdras, aptáha nak apkelmaxnéssesso Dios énxet'ák apagkok, tén han apkelxekmósso, apkeltámésamap nak ma'a segánamakxa apagkok Dios apha nak néten.

¹³“Keso séltamhókxa nak ko'o katnehek se'e: Apyókxoho israelitas apmáheyo nak elyetlakxak xép ma'a Jerusalén apheykha nak se'e sektémakxa nak wesse' apwányam, apwanchek elxog, megkeyxek ma'a levitas, essenhan apkelmaxnéssesso nak Dios énxet'ák apagkok.

¹⁴Hakte ko'o wesse' apwányam, tén han ma'a siete séláneykha nak, negaphássek negko'o exchep yaqwayam elanok ektémakxa apheykha m'a énxet'ák Judá tén han Jerusalén, kélyeheykekxók kexa m'a Dios apagkok nak segánamakxa apagkok, apxawáya nak xép yaqwayam elána'.

¹⁵Elsakxoho sa' sawo ekmope élmomnáwa, tén han sawo ekyátekto élmomnáwa, ekxeyenma agko' nak negko'o egwáxok agmések ma'a Dios nak Israel, apha nak Jerusalén, ko'o sektáha nak wesse' apwányam, yetlo m'a sélxegexma'a nak,

¹⁶tén han ma'a ekyókxoho sawo ekmope élmomnáwa, tén han sawo ekyátekto élmomnáwa, ekwánxa enxoho apcháncheseykekxa s'e ekyókxoho yókxexma nak Babilonia, tén han ma'a apkelmésso naqsa nak chá'a m'a énxet'ák, tén han ekxeyenma agko' nak chá'a apkelwáxok elmések Dios tegma appagkanamap apagkok ma'a apkelmaxnéssesso Dios énxet'ák apagkok, apyetnama nak ma'a Jerusalén.

¹⁷Sa' elmok weyke kelennay'awók étkók xa selyaqye nak, tén han nepkések apkelennay'awo', tén han nepkések apketkók, ekyetlómo m'a kélmésso naqsa nak aqsok aktek ekyexna kélcheneykekxa, tén han vino, yaqwayam sa' kólnegkenwakxak ma'a néten nak ekwatnamáxchexa aqsok tegma appagkanamap apagkok ma'a Dios kélagkok nak kéxegke, cham'a Jerusalén.

¹⁸Keñe sa' ma'a sawo ekyátekto élmomnáwa, tén han sawo ekmope élmomnáwa éleymomáxche nak, etnéssesek sa' apmakókxa enxoho etnéssesek xép, tén han ma'a apkelxegexma'a nak, ektémakxa nak chá'a apmopmenyého m'a Dios.

¹⁹Keñe sa' ma'a aqsok kélmeykegkaxa apkelxaweykekxa nak xép, kélmeykha nak chá'a kólpeykeshok Dios ma'a tegma appagkanamap apagkok nak ma'a Dios apagkok, xeyep apagko' sa' elmeyásekxak ma'a Dios apha nak Jerusalén.

²⁰“Yetneyk sa' agkok mók aqsok apmopmenyého yaqwayam kólmaha m'a Dios apagkok nak tegma appagkanamap apagkok, sa' etegyágwakxak chá'a m'a kélxátamakxa nak aqsok élmomnáwa ahagkok.

²¹Ko'o Artajerjes, sekteme nak wesse' apwányam, éltamhók ko'o elmések Esdras, apteme nak apkelmaxnéssesso Dios énxet'ák apagkok, apkelxekmósso apkeltámésamap nak ma'a segánamakxa apagkok nak Dios apha nak néten, ekyókxoho aqsok apkelmaxneyakxa enxoho chá'a m'a apkeltaqmelchesso nak aqsok élmomnáwa, apheykha nak ma'a teyp wátsam Éufrates, ekpayho nak ektaxnegwánxa ekhem,

²²ekméssek ko'o néxa yaqwayam kólmések chá'a tres mil trescientos kilos sawo ekmope ekmomnáwa, tén han veintidós mil kilos ma'a hótáhap apaktek, dos mil doscientos litros vino, tén han dos mil doscientos litros pexmok égmenek, tén han ekyókxoho yásek apkelmaxneyakxa enxoho.

²³“Ekyókxoho aqsok apkelmaxneyakxa enxoho chá'a m'a Dios apha nak néten, kólmések sa' chá'a ekmanyehe agko', yaqwayam sa' megkáhapweyk kéllegassáseykegkoho m'a étchek nak ko'o, sektáha nak wesse' apwányam, essenhan ma'a sektémakxa nak wesse' apwányam.

²⁴Éltamhók nahan kólya'asagkohok megkapayhawo kólának enegkenagkok selyaqye m'a apkelmaxnéssesso nak Dios énxet'ák apagkok, levitas, tén han apkelmeneykmassamo nak, tén han apkeltaqmelchesso nak átog, tén han ma'a apkeltamheykha nak tegma appagkanamap, essenhan ma'a pók énxet apkeltamheykha nak chá'a m'a Dios tegma appagkanamap apagkok.

²⁵“Keñe sa' xép Esdras, elyésha sa' énxet'ák segyekpelchémo, tén han apkeltaqmelchesso nak chá'a apchókxa', yaqwayam sa' etaqmelchessásekxak chá'a apheykha apyókxoho énxet'ák apheykha nak yókxexma teyp nak wátsam Éufrates, ekpayho nak ektaxnegwánxa ekhem, emha sa' ma'a ektémakxa nak apmésso apya'ásegwayam Dios apagkok, cham'a apyókxoho apkelya'áseyak nak ma'a segánamakxa apagkok nak Dios apagkok; keñe sa' ma'a melya'áseyak nak, elxekmós sa'.

²⁶Keñe sa' ma'a melane nak segánamakxa apagkok ma'a Dios apagkok, tén han ma'a segánamakxa ahagkok nak ko'o, sektáha nak wesse' apwányam, kólának sa' ematñekxa', kólának sa' kóláphaksek megkatnahakxa apchókxa', essenhan kólának eyánmagkasek, essenhan kólának emakpok.”

²⁷Yetlókok axta han apteme apkelmaxnagko Esdras se'e: “Apcheymákpoho sa' chá'a kólteméssesek Wesse' egegkok, Dios apagkok nak ma'a ẽlyapmeyk, hakte appaknegkessekmók apwáxok wesse' apwányam apteméssesa xa ektáha nak, apmésa yaqwayam etnehek apcháyo m'a Wesse' egegkok nak tegma appagkanamap apagkok, apyetnama nak Jerusalén,

²⁸hakte exekmósek ektémakxa seyásekhayo nápaqtók wesse' apwányam, tén han ma'a apkeláneykha, tén han ma'a énxet'ák ekyawe nak kéláyo m'a aphakxa nak, ewasqakkásekxók han, sepasmo han keñamak seyewagko wánchásekxak ma'a apkelámha apmonye'e nak israelitas, yaqwayam enxoho hélyetlakxak makham ataqhoho'.”