Read Lengua Sur Esdras 8 Bible Online

Esdras 8 - Lengua Sur bible

Esdras 8

¹Keso apkelwesey axta apkelámha apmonye'e nepyeseksa apnámakkok, ektémakxa axta chá'a eknaqtáxésamaxche apkelwesey xama ektáhakxa nak chá'a apnámakkok, apkeltaqhémo axta apkeleñama m'a Babilonia yetlo Esdras, aptémakxa axta wesse' apwányam ma'a Artajerjes.

²Guersón, apkeñama axta nepyeseksa m'a Finees aptawán'ák neptámen; tén han Daniel, apkeñama axta nepyeseksa m'a Itamar aptawán'ák neptámen; tén han Hatús, Secanías axta apketche, apkeñama axta nepyeseksa David aptawán'ák neptámen; tén han Zacarías, apkeñama axta nepyeseksa m'a Parós aptawán'ák neptámen, yetlo apkelxegexma'a ciento cincuenta énxet'ák apnaqtáxéseyak apkelwesey;

⁴tén han Eliehoenai, Zeraías axta apketche, apkeñama axta nepyeseksa m'a Pahat-moab aptawán'ák neptámen, yetlo doscientos énxet'ák apkelxegexma'a;

⁵tén han Secanías, Jahaziel axta apketche, apkeñama axta nepyeseksa m'a Zatú aptawán'ák neptámen, yetlo trescientos énxet'ák apkelxegexma'a;

⁶tén han Ébed, Jonatán axta apketche, apkeñama axta nepyeseksa m'a Adín aptawán'ák neptámen, yetlo cincuenta énxet'ák apkelxegexma'a,

⁷tén han Isaías, Atalías axta apketche, apkeñama axta nepyeseksa m'a Elam aptawán'ák neptámen, yetlo setenta énxet'ák apkelxegexma'a,

⁸tén han Zebadías, Micael axta apketche, apkeñama axta nepyeseksa m'a Sefatías aptawán'ák neptámen, yetlo ochenta énxet'ák apkelxegexma'a;

⁹tén han Abdías, Jehiel axta apketche, apkeñama axta nepyeseksa m'a Joab aptawán'ák neptámen, yetlo doscientos dieciocho énxet'ák apkelxegexma'a;

¹⁰tén han Selomit, Josifías axta apketche, apkeñama axta nepyeseksa m'a Baní aptawán'ák neptámen, yetlo ciento sesenta énxet'ák apkelxegexma'a;

¹¹tén han Zacarías, Bebai axta apketche, apkeñama axta nepyeseksa m'a Bebai aptawán'ák neptámen, yetlo veintiocho énxet'ák apkelxegexma'a;

¹²tén han Johanán, Hacatán axta apketche, apkeñama axta nepyeseksa m'a Azgad aptawán'ák neptámen, yetlo ciento diez énxet'ák apkelxegexma'a;

¹³tén han Elifélet, Jeiel, Semaías, néxa aptawán'ák neptámen axta m'a Adonicam, yetlo sesenta énxet'ák apkelxegexma'a, apkeltaqhémo axta axayo'.

¹⁴Tén han Utai, tén han Zabud, apkeleñama axta nepyeseksa m'a Bigvai aptawán'ák neptámen, yetlo setenta énxet'ák apkelxegexma'a.

¹⁵Ko'o Esdras, eyánchásekxeyk axta apyókxoho xa énxet'ák nak, cham'a nekha nak yegmen atamnek ekmahéyak nak ma'a wátsam Ahavá, negheykmek axta han ántánxo ekhem ma'a. Xama axta sélyetseta énxet'ák, tén han apkelmaxnéssesso Dios énxet'ák apagkok, axta ót'ak xama enxoho levitas.

¹⁶Keñe axta séláphasa m'a Eliézer, Ariel, Semaías, Elnatán, Jarib, Elnatán, Natán, Zacarías, tén han Mesulam, aptamhéyak axta énxet'ák ekha kélyeheykekxoho, tén han ma'a apkelxekmósso nak apnámakkok, cham'a Joiarib, tén han Elnatán,

¹⁷séltamho ey'ammok ma'a Idó, apteme axta apkemha apmonye' m'a yókxexma ekwesey nak Casifiá, éltennássek axta ekyókxoho séltamhókxa etnehek yának ma'a Idó, yetlo apkelxegexma'a, tén han ma'a apkeltamheykha nak tegma appagkanamap, apheykencha'a nak ma'a Casifiá, yaqwayam enxoho hennaqlantagkasek énxet sempasmo néltamheykha m'a Dios egagkok nak tegma appagkanamap apagkok.

¹⁸Dios axta keñamak segyentegkásento m'a Serebías, énxet apmopwána axta aqsok, aptáwen neptámen axta m'a levita apwesey axta Mahli, yetlo apketchek tén han apkelyáxeg'a, dieciocho axta apyókxoho.

¹⁹Ennaqlántegkessek axta han ma'a Hasabías, tén han Isaías, Merarí axta aptawán'ák neptámen, yetlo apketchek, tén han apkelyáxeg'a, veinte axta apyókxoho.

²⁰Doscientos veinte axta apyókxoho apkeltamheykha axta chá'a m'a tegma appagkanamap, apnegkenma axta m'a David, tén han ma'a apkelámha apmonye'e axta chá'a yaqwayam epasmok apkeltamheykha m'a levitas, naqtáxésamaxcheyk axta han apkelwesey xa apyókxoho nak.

²¹Keñe axta ko'o séltamho metawagkehek aptéyak énxet'ák ma'a nekha nak wátsam Ahavá, yaqwayam enxoho ólya'ásegwakxohok aqsok magaqhémo nápaqto' Dios egagkok, tén han yaqwayam ólmaxnak yaqwayam hentaqmelchessesek negheykha, tén han egnámakkok, tén han ma'a aqsok egagkok nak.

²²Hakte ekmegqaktegkek axta ko'o almaxnak sẽlpextétamo apkelchánte nak yátnáxeg ma'a wesse' apwányam, yaqwayam enxoho hẽltaqmelchesek neyseksa nélxega hegaksek ma'a sẽlenmexma nak, hakte néltennassegkek axta negko'o wesse' apwányam, apkeltaqmelchessama chá'a Dios ma'a apyókxoho ektáha nak chá'a apkelya'eykekxa', keñe yehekxak chá'a apmopwána tén han aplo m'a apyókxoho ektáha nak chá'a apyamasma.

²³Axta antókagkok negko'o nentéyak, nélmaxnakkek axta Dios xa ekyókxoho nak, aphaxnawók axta han ma'a nélmaxnagko.

²⁴Keñe axta sélyésancha'a doce apkelámha apmonye'e nak apkelmaxnéssesso Dios énxet'ák apagkok: cham'a Serebías, Hasabías, yetlo m'a diez apkelxegexma'a nak,

²⁵keñe axta sélyetsetchásegko sawo ekmope ekmomnáwa, tén han sawo ekyátekto ekmomnáwa, tén han ma'a aqsok kélmeykegkaxa nak, apmésso axta wesse' apwányam ma'a Dios egagkok nak tegma appagkanamap apagkok, tén han apkelmésso axta m'a apkeláneykha, tén han ma'a apkelámha apmonye'e apagkok nak, tén han ma'a apyókxoho israelitas apkelwayam axta m'a.

²⁶Élyetsetchásegkek axta, tén axta sélmésa veintiún mil cuatrocientos cincuenta kilos ma'a sawo élmope élmomnáwa, keñe cien ma'a aqsok kélmeykegkaxa élánamáxche nak sawo élmope élmomnáwa, tén han tres mil trescientos kilos ma'a sawo ekyátekto élmomnáwa,

²⁷tén han veinte egheykok élánamáxche nak sawo ekyátekto élmomnáwa, ocho kilos axta ekyókxoho, tén han ánet aqsok kélmeykegkaxa élánamáxche nak sawo ekyexwase, kéltaqmelchessamo nak kéláxñáseykekxoho, keltásek axta, hawók axta m'a sawo ekyátekto ekmomnáwa.

²⁸Keñe axta sektáha séláneya s'e: “Kélpagkanchásexcheyk kéxegke m'a Wesse' egegkok, ekhawo han xa aqsok kélmeykegkaxa nak. Wesse' egegkok apagkok ma'a sawo ekmope élmomnáwa, tén han ma'a sawo élyátekto élmomnáwa nak, cham'a Dios apagkok nak ma'a ẽlyapmeyk.

²⁹Kóllanha sa', kóltaqmelches sa', ekwokmoho kélyetsátegkokxo makham nápaqta'awók ma'a apkelámha apmonye'e nak apkelmaxnéssesso Dios énxet'ák apagkok, tén han levitas, tén han ma'a apkelámha apmonye'e nak apnámakkok ma'a Israel, cham'a kañe' apwáxok nak Wesse' egegkok tegma appagkanamap apagkok, cham'a Jerusalén.”

³⁰Apkelxakak axta apkelmaxnéssesso Dios énxet'ák apagkok, tén han levitas ma'a sawo élmope élmomnáwa, tén han sawo ekyátekto élmomnáwa, tén han ma'a aqsok kélmeykegkaxa nak, kélyetsáteyak axta, apkelsákxeyk axta m'a Jerusalén, cham'a apyetnamakxa nak Dios egagkok tegma appagkanamap apagkok.

³¹Nélxegákxeyk axta néleñama m'a wátsam Ahavá, ekhem doce ektáhakxa axta apkemha apmonye' apxega pelten, nélmeyákxo m'a Jerusalén. Empasmeyk axta Dios egagkok neyseksa nélxega ámay, segésa m'a sẽlenmexma, tén han ma'a apkelmenyexeykegkoho nak.

³²Xama axta nélwákxo m'a Jerusalén, néllókassek axta nélyampe ekweykmoho ántánxo ekhem.

³³Keñe axta ekhem cuatro kélyetsátegko m'a sawo ekmope élmomnáwa, tén han sawo ekyátekto élmomnáwa, tén han ma'a aqsok kélmeykegkaxa nak Dios egagkok tegma appagkanamap apagkok, keñe axta kélmésa ekyókxoho m'a Meremot, apteme axta apkelmaxnéssesso Dios énxet'ák apagkok, Urías axta apketche. Eleazar axta han apxegexma m'a, Finees axta apketche, tén han ma'a levitas, cham'a Jozabad, Josué axta apketche, tén han Noadías, Binuy axta apketche.

³⁴Cháxa ekhem kélyetsátegkaxa axta, tén han kélyetsátekxexa axta ekyókxoho, táxésaxcheyk axta ekwánxa aqsok nélseykenta'.

³⁵Keñe axta m'a énxet'ák apkelweykta axta makham, kélnaqleykekxa axta megkatnahakxa apkelókxa', apkelmésa aqsok apkelwatno Dios nak Israel doce weyke étkók kelennay'awók apagkok ma'a apyókxoho israelitas, tén han noventa y seis nepkések apkelennay'awo', setenta y siete nepkések apketkók, keñe doce yát'ay, yaqwayam etnéssesek aqsok apmésso naqsa eñama ekyaqmageykekxa melya'assáxma. Ekyókxoho axta kélwatneyásak Wesse' egegkok xa aqsok nak.

³⁶Keñe axta kélmésa wesse' apwányam aptáxésso apkeltémókxa axta katnehek ma'a apkelámha apmonye'e nak ma'a apchókxa, tén han ma'a apkeltaqmelchesso nak chá'a apkelókxa, apheykha nak ma'a yókxexma teyp wátsam Éufrates, ekpayho nak ektaxnegwánxa ekhem, appasmo axta m'a énxet'ák, tén han ma'a Dios tegma appagkanamap apagkok.