Read Lengua Sur Esdras 9 Bible Online

Esdras 9 - Lengua Sur bible

Esdras 9

¹Xama axta ekpenchásamaxko élánamáxche xa aqsok nak, elya'aweykteyk axta ko'o m'a apkelámha apmonye'e nak, peya etnehek heyának se'e: “Appáxaqxegkek aqsa israelitas tén han apkelmaxnéssesso Dios énxet'ák apagkok, tén han levitas se'e énxet'ák apheykha nak se'e apchókxa nak, cham'a cananeos, hititas, ferezeos, jebuseos, amonitas, moabitas, egipcios, tén han amorreos, neyseksa eykhe élmasagcha'a agko' apkeltémakxa melya'áseyak Dios.

²Apkelmeykegkek aptamheykegko apnaqteyegka'a apyapmeyk ekweykekxoho apketchek apkelennay'a apketchek kelwán'ák nak se'e énxet'ák nak; cháxa keñamak appaxqeykekxo nak Dios énxet'ák apagkok ma'a énxet'ák megkatnaha nak appeywomo xamo'. Apkelámha apmonye'e han chá'a sekxók apkeláneyak apmonye'e xa ektéma nak melya'assáxma, tén han ma'a apkeltaqmelchesso nak chá'a apchókxa.”

³Xama axta sekleg'a ko'o xa amya'a nak, élyepteyk axta sektaxno, eyepteyk axta han éwa', tén han áwa' ahátog, magkenatchesso seklegágkoho ekyentaxno ewáxok, ekheyk axta aqsa yetlo ekyaqhapmo ewáxok.

⁴Épetchegwa'akteyk axta ko'o apyókxoho m'a apkeye axta Dios nak Israel senlegassáseykegkoho, eñama melya'assáxma m'a apkelweykta axta makham kélnaqleykekxa axta megkatnahakxa apkelókxa; ekheyk axta eyke aqsa ko'o yetlo ekyaqhapmo ewáxok ekweykmoho taxnám ektekyómakxal'a aqsok kélnaqtósso.

⁵Cháxa ekmassakxa axta han ko'o ekyaqhapmo ewáxok, apkelyeptamap axta eyke makham ma'a sektaxno, élmaxnakkek axta m'a Dios Wesse' egegkok,

⁶sektáha s'e: “Dios ahagkok, ekmegqakkek ahagko' ko'o, may'ásegkok sektáhakxa, mowanchek sekmako alanok xép. Yeykhágwokmok agko' ma'a ektémakxa nak negko'o mólya'assáxma, weykmók néten ma'a nentémakxa nélsexnánémaxche'.

⁷Nanók negko'o nentémakxa ekmaso agko' mólya'assáxma, ekwokmoho makham se'e kaxwo' nak, élmasagcha'a nentémakxa keñamak negko'o sẽlméssama m'a kelwesse'e mók apkelókxa, negko'o tén han ma'a kelwesse'e apkelwányam egagkok, tén han ma'a apkelmaxnéssesso nak Dios énxet'ák apagkok. Nanók ektémakxa negko'o sẽlyensasso chá'a, sẽlnaqleykekxa megkatnahakxa negókxa, sẽlmenyexchesso aqsok egagkok, tén han sẽlwanyeykha, cháxa sentémakxa nak makham se'e kaxwo' nak.

⁸Segásekhayo eyke keñamak xép Dios Wesse' egagkok, apkeltémo elmallánek neghekha negko'o, tén han hegwetaksek negko'o negheykegkaxa m'a xapop ekpagkanamaxche nak; egmeyásekxeyk makham xép axnagkok negweteykekxa', egméssek makham ketsék néllókasso nélyampe neyseksa nenteme sẽlásenneykha naqsa.

⁹Sẽlásenneykha naqsa eykhe negko'o, makke hegyenseykmok xép neyseksa sẽlásenneykha naqsa; enxekmóssegkek segásekhayo nápaqta'awók ma'a kelwesse'e apkelwányam nak Persia, egméssegkek nélyennaqte yaqwayam anxátekhásekxak tegma appagkanamap apagkok nak xép, neyseksa aptamheykekxa nápakha'a apketkók, ¡egméssegkek yaqwayam ólmeyawaxchek se'e Judá nak, tén han Jerusalén!

¹⁰“Keñe kaxwo', Dios egagkok, ¿háxko antéhek agának kaxwók xép natámen nenlane xa ekyókxoho nak? Manlaneyk negko'o m'a apkeltémókxa nak antéhek,

¹¹apkeltémo axta exchep anlána', apkelásenneykekxo axta m'a apkellegasso nak appeywa, apteme nak apkeláneykha. Ẽltennassegkek axta exchep, cham'a apchókxa negmáheyókxa axta ólántexek, tén han negmáheyókxa axta agmok, ektawásamáxko eñama apkeltémakxa ekmaso énxet'ák apheykha nak ma'a, apsawheyáseykekxók axta apkeltémakxa ekmanyása yetlo m'a apkeltémakxa axta ekmaso agko' melya'áseyak Dios.

¹²Ẽltennassegkek axta han apkeltémo mólmésagkehek egketchek kelwán'ák ma'a apketchek apkelennay'a nak ma'a, tén han móghók kalmagkok apketchek kelwán'ák nak ma'a egketchek nak negko'o apkelennay'a, apkeltémók axta han mantegyesha meyke ektáhakxa apheykha xa énxet'ák nak, tén han magwetaksek ektaqmalma aqsok apkeláneyak, yaqwayam enxoho ólyennák negko'o, tén han ólmaha aqsok éltaqmela ekhéyak nak apchókxa, tén han ampekkenchásekxak natámen ma'a entawán'ák nentámen yaqwayam etnehek apagkok meyke néxa.

¹³“Mólya'assáxma negko'o keñamak sentéma ekyókxoho xa, tén han ekyawe agko' nélsexnánémaxche'. Mehẽllegassáseykegkohok negko'o exchep Dios egagkok, ekpayhawo nak eykhe hẽllegássesagkohok negko'o, ẽlmallanchessegkek aqsa ektémakxa nak aqsok ekyentaxno.

¹⁴¿Egwanchek enxeykel'a mólyahakxeyk negko'o makham ma'a apkeltémókxa nak antéhek, tén han ampaxqaha m'a énxet'ák ektaqnómaxko agko' nak apkeltémakxa? ¿Mehẽltaqnaweygkeheya sa' negko'o nentáha enxoho xa ektáha nak? ¿Mehegmasséssemeya sa' ekwokmoho mageymexko enxama enxoho?

¹⁵“Wesse', Dios nak Israel, péwók negko'o nenteméssessamakxa exchep, apchahayók xép eleymakpok neghekha meletsapma, negwet'a nak makham se'e kaxwo' nak. Naqsók negko'o nélsexnánémaxko nápaqtók xép; cháxa keñamak magkegwagko nak ólwakxak ma'a aphakxa nak.”