Read Lengua Sur Nehemías 2 Bible Online

Nehemías 2 - Lengua Sur bible

Nehemías 2

¹Wesse' apwányam Artajerjes sekyátegkesso apyá axta ko'o. Xama ekhem axta, pelten kéltéma axta Nisán, ekweykmo axta veinte apyeyam apteme wesse' apwányam, apwet'ak axta ko'o wesse' apwányam ekyaqhápeyncha'a ewáxok neyseksa sekyátegkesso vino,

²aptáhak axta sélmaxneyáncha'a s'e: —¿Yaqsa ektáha ekyaqhápeyncha'a nak apwáxok? Máxa neykhe megyaháxekpo enxoho, yetnawók ektáhakxa exchep. Yetlókok axta han sekyegwakto ekwányam agko',

³ektáhak axta seyáneya wesse' apwányam se'e: —¡Megkamassegwomek sa' chá'a apha exchep wesse'! ¡Megkatnehek ko'o megkayaqhápeykha ewáxok, hakte cham'a tegma apwányam ekheykegkaxa nak takhaxpop apagkok ma'a ẽlyapmeyk nano', kéltawáseykha, kélwatneykekxeyk han ma'a atña'ák nak!

⁴—¿Háxko apkeltamhókxa atnéssesek xép? —axta aptáhak apkelmaxneyáncha'a wesse' apwányam. Tén axta sélmaxneya Dios apha nak néten,

⁵axta ektáhak seyátegmowágkokxo wesse' apwányam se'e: —Leyawok sa' agkok xép apwáxok wesse', ektaqmeleyncha'a enxoho apwáxok sélano, éltamhók heyáphaksek ma'a yókxexma Judá, tegma apwányam kélátawanyamakxa axta élyapmeyk nano', yaqwayam enxoho ko'o axátekhásekxak makham.

⁶Aptáhak axta seyátegmowágkokxo wesse' apwányam se'e: —¿Háxko sa' ekwánxa ekhem kammok apxega? ¿Yaqsa ekhem éxyók makham? Heyk axta han nekha aphakxa m'a aptáwa' ekteme axta wesse' ekwányam. Éltennássek axta ko'o ekhem yaqwánxa awaták makham, keñe axta apcha'awo axog.

⁷Tén axta sektáha seyáneya s'e: leyawók agkok xép apwáxok, hegkések sa' xama weykcha'áhak aptáxésso, yaqwayam sa' ko'o axekmósek ma'a apkeltaqmelchesso nak chá'a apkelókxa m'a teyp nak wátsam Éufrates, ekpayho nak ektaxnegwánxa ekhem, yaqwayam sa' heyeykhaksek aqsa awakxohok ma'a yókxexma Judá;

⁸hegkések sa' han mók weykcha'áhak aptáxésso, yaqwayam axekmósek ma'a Asaf, apkeláneseykha nak naxma apagkok ma'a wesse' apwányam, yaqwayam sa' hegkések yámet séláneykekxa m'a atña'ák nak tegma apyennaqte, apmasma nak ma'a tegma appagkanamap, tén han séláneykekxa m'a nepyáwa nak kélhaxtegkesso tegma apwányam, tén han ma'a tegma yaqwánxa sa' ko'o axek. Élméssek axta ko'o wesse' apwányam xa ekyókxoho nak, hakte epasmomchek axta ko'o m'a Dios ahagkok, ektaqmeleykha nak apwáxok henlano'.

⁹Xama axta ko'o sekwákxo m'a apheykegkaxa nak apkeláneykha apkelókxa m'a teyp Éufrates, ekpayho nak ektaxnegwánxa ekhem, ekméssek axta m'a weykcha'áhak wesse' apwányam aptáxésso, apkelaphássek axta nahan apkelchánte yátnáxeg yaqwayam etnehek sélxegexma'a, yetlo apkelámha apmonye'e sẽlpextétamo.

¹⁰Xama axta apleg'a Sambalat, aphama axta m'a Horón, tén han Tobías, apteme axta wesse' apwányam apkeláneykha amonita, axta kalchak apkelwáxok, hakte apkelwa'ak axta apmáheyo epasmok ma'a israelitas.

¹¹Ekwákxeyk axta ko'o m'a Jerusalén. Ántánxo ekhem axta entáhak sekheykekxa m'a,

¹²ekxátekha'ak axta axta'a, yetlo sélxegexma'a m'a nápakha énxet'ák, axta eyke altennásak xama enxoho apkeltamhókxa ko'o Dios atnéssesek ma'a Jerusalén. Wánxa axta aqsa sekyentama ko'o m'a seyánte seyánta axta.

¹³Cháxa axta'a sektepakxa axta ko'o m'a átog éltamhomaxko nak Ekyapwátegweykenxa Xapop, sekpéwo m'a ámay ekteyapmakxa nak yegmen éltamhomaxko nak Yéwa Ekwányam, tén han ma'a átog éltamhomaxko nak Kélchexakhamakxa Aqsok Apák, élanawók axta m'a kélhaxtegkesso nak Jerusalén, cham'a kélyaqnegkáseyak axta, tén han ma'a atña'ák kélwatneykekxa axta.

¹⁴Tén axta sekxegákxo makham, sekpéwo m'a átog éltamhomaxchexa nak Ekteyapmakxa Yegmen, tén han ma'a yámelchet éltamhomaxchexa nak Wesse' Apwányam, yawanchek axta eyke ekyeyk'a seyánte m'a.

¹⁵Axta'a axta makham sekyetlawa axta ko'o m'a yegmen ényé nak, keñe axta sekpenchesa sélányo m'a kélhaxtegkesso nak nepyáwa tegma, séxyekmo makham sektaxnegwa'akto m'a átog éltamhomaxchexa nak Ekyapwátegweykenxa Xapop.

¹⁶Axta elya'ásegkok ko'o sekmahágkaxa m'a apkeltaqmelchesso nak apkelókxa, axta han elya'ásegkok sélana. Axta han ko'óxa altennásak ma'a judíos, cham'a apkelmaxnéssesso nak Dios énxet'ák apagkok, tén han ma'a apkelwesse'e nak, apkeltaqmelchesso apkelókxa, tén han ma'a nápakha énxet'ák apmáheyo nak yaqwayam sa' epasmok ma'a apkelánamap nak tegma.

¹⁷Axta ektáhak séláneya s'e: —Kélya'ásegkok kéxegke ekyentaxnamo sentémakxa, hakte kéltawáseykha m'a Jerusalén nak, kélwatneykekxeyk ma'a atña'ák nak. Kólchempoho, anlánekxak sa' kélhaxtegkesso nak nepyáwa Jerusalén, tén sa' mólasmésaxcheyk chá'a kaxwo'.

¹⁸Xama axta ko'o séltennasa ektémakxa sepasmo Dios, tén han aptémakxa axta appeywa seyánagkama m'a wesse' apwányam, aptáhak axta seyátegmowágko s'e: —¡Ageynhok sa' nenláneykekxa tegma! Apkelwasqakkásekpekxók axta yetlo apmáyheykegkoho eltemeykha.

¹⁹Xama axta apleg'a Sambalat, aphama axta m'a Horón, tén han Tobías, apteme axta wesse' apwányam apkeláneykha amonita, tén han ma'a Guésem apteme nak árabe, ẽlasméssek axta negko'o. Aptáhak axta sẽláneya yetlo sẽlwanyeykha s'e: —¿Yaqsa kélmako kóllának kéxegke? ¿Xénchek enxeykel'a kélwáxok kólenmexekxak wesse' apwányam?

²⁰Axta ektáhak ko'o seyátegmowágko s'e: —Dios apha nak néten sa' hentaqmelchessesek negko'o ekteyapma aqsok nenlane. Ageynhok sa' negko'o nenláneykekxa tegma, negko'o nentáha nak apkeláneykha, méko xapop kélagkok kéxegke s'e, megkapayhawok kaxének kélwáxok Jerusalén.