Read Lengua Sur Nehemías 6 Bible Online

Nehemías 6 - Lengua Sur bible

Nehemías 6

¹Xama axta apkelleg'a amya'a m'a Sambalat, Tobías, Guésem apteme nak árabe, tén han ma'a pók nélenmexma nak, sekxátekhásekxo ko'o m'a kélhaxta nak nepyáwa tegma, meyke seyáyam élyagqáxeykha (axta eyke anegkeneykegkok makham atña'ák ma'a sekmáheyókxa axta chá'a anegkenek),

²keñe axta Sambalat, tén han Guésem seyaphássesa ko'o amya'a, yaqwayam enxoho agaqnekxak xama yókxexma m'a ekyapwátegweykenxa nak xapop ma'a Onó. Xénchek axta eyke apwáxok hetnéssessamhok exma ekmaso.

³Keñe axta séláphasa ko'o sélápháseykha séltamho eltennaksek méko ekhem ahagkok, eñama sélane sektamheykha ekyawe, tén han mowanchek axog, keytnamok nentamheykha m'a sekxega enxoho ay'ammok.

⁴Cuatro axta temék seyaphássesso xa ektéma nak, axta eyke ko'o ayaqmagkasseykmok mók sektémakxa axta chá'a sekpeywa.

⁵Keñe axta Sambalat seyaphassásekxo makham mók ekhémo xa amya'a nak, cinco axta wokmok seyaphássesso, weykcha'áhak meyke kélpextete ekyennaqte axta eyke m'a, apkeláneykha axta apcháphásak hesókásegma'.

⁶Axta temék se'e: “Weynchámeyha amya'a nepyeseksa énxet'ák, apxénchek xép Guésem, tén han ma'a judíos, apkelánekxo apkelpeywa peya yenmexek, la'a apxátekháseykekxo m'a kélhaxtegkesso nak nepyáwa tegma. Xép héxta etnehek wesse' apwányam axta táhak amya'a,

⁷apkelyésáha exnek han kaxwók ma'a apkellegasso Dios appeywa, yaqwayam hek xép etnéssesek wesse' apwányam ma'a Jerusalén, tén han elxének apha kaxwók wesse' apwányam ma'a Judá. Eñak sa' wesse' apwányam Artajerjes xa amya'a nak. Nók, ólpaqmétek sa' egqántánxo.”

⁸Tén axta ko'o seyaphassásekxo seyátegmowéyak, séltennasa háwe naqsók xa amya'a nak, ekteyapma agko' apwáxok.

⁹Apkeltamhók axta hẽlyegwakkasek, ekxéna apwáxok hẽlháxexchássók mampenaksek ma'a néltamheykha, ekyánchessekmók axta eyke aqsa ko'o sekwasqapma sektamheykha.

¹⁰Tén axta sekmeyákxo m'a Semaías apxagkok, Delaías axta apketche, Mehetabel axta aptáwen, metyapma axta kañe' apxagkok, aptáhak axta seyáneya s'e: “Agaqnekxak sa' ma'a Dios tegma appagkanamap apagkok, kañe' ekpagkanamaxchexa agko' nak, ólápegkokxohok sa' atña'ák, hakte xénchek apwáxok exegmak se'e axta'a nak yaqwayam yaqhek.”

¹¹Axta ektáhak ko'o seyátegmowágko s'e: “Háwe ko'o m'a énxet apyexanmomól'a chá'a, tén han aptaxnegweykekxohol'a tegma appagkanamap yaqwayam ewagkasapok teyp, matxehek ko'o m'a.”

¹²Ekyekpelchawók axta han ko'o mexéna m'a amya'a eñama nak Dios, aptemék axta seyáneya ekyókxoho xa ektáha nak yaqwayam hénmexek, hakte apyánmagkassek axta Sambalat, tén han Tobías yaqwayam hetnéssesek xa ektáha nak;

¹³apyánmagkassek axta apkeltamho hégwakkasek, yaqwayam enxoho alának may'assáxma. Keñe axénaxchek ko'o ekmaso, kamaskok han sélháxenmo.

¹⁴Tén axta ko'o sektáha sélmaxneya Dios ahagkok se'e: ¡Dios ahagkok, kaxén sa' apwáxok aptamhágkaxa nak Sambalat, tén han ma'a Tobías! Nágkalwánaqma han ma'a Noadías ekteme nak eklegasso appeywa exchep, tén han ma'a pók apkellegasso nak xép appeywa, apkeltémo nak ko'o hégwakkasek.

¹⁵Penchásexcheyk axta élánamáxche tegma kélhaxtegkesso ekhem veinticinco, pelten kéltéma axta Elul, cincuenta y dos ekhem axta weykmok élánamáxche.

¹⁶Apkellegayak axta m'a nélenmexma nak, apkelyegwaktegkek axta han ma'a apyókxoho énxet'ák apheykha axta neyáwa negheykegkaxa', massegkek axta éleymáxkoho apkelwáxok, hakte apkelya'ásegweykmek axta ekpenchásamaxko xa nentamheykha nak, yetlo sempasmo m'a Dios egagkok.

¹⁷Xámok axta weykcha'áhak eknaqtáxésamaxche, apnaqtáxésso axta m'a Tobías, tén han ma'a énxet'ák ekha kéláyo axta m'a Judá,

¹⁸hakte apxámok axta énxet'ák Judá apteméssesso naqsók melyenyawha m'a Tobías, hakte Secanías axta apepháyem ma'a, Árah axta apketche, hakte apmomchek axta apketche Johanán, apketche kelwána m'a Mesulam, Berequías axta apketche.

¹⁹Apxéneykha axta chá'a ektaqmela nahaqtók ko'o, apkeltennáseykha axta chá'a m'a sektémakxa axta chá'a seyenagkama. Eyáphássessegkek axta ko'o weykcha'áhak apkeltémo hégwakkasek ma'a Tobías.