Read Lengua Sur Ester 2 Bible Online

Ester 2 - Lengua Sur bible

Ester 2

¹Wenaqtémók axta natámen, massegkek axta aplo m'a wesse' apwányam Asuero, xénwákxók axta apwáxok ekteméssessamakxa axta m'a Vasti, tén han kéltémókxa axta kólteméssesek.

²Tén axta m'a apkeláneykha apheykha axta chá'a xamók ma'a aphakxa nak aptáha apcháneya s'e: —Wesse' apwányam, kéméxcheyk xép kóltegyesha kelán'a étkók éltaqmalma meyke nak kélteméssesseykmohóxma.

³Wesse' apwányam, enegkenek sa' xép énxet, apkelyéseykha kelán'a étkók ma'a ekyókxoho apchókxa aptémakxa nak chá'a wesse' apwányam, yaqwayam sa' enaqlanták ekyókxoho m'a tegma apyawe agkok nak ma'a kelán'ák, appekkenmakxa nak xép tegma apyennaqte apagkok ma'a Susa. Sa' kólteméssesek nahan apkeltaqmelchesso m'a Hegai, énxet yágkelwána apkeláneykha nak ma'a wesse', apkeltaqmelchesso nak chá'a m'a kelán'ák. Hegai sa' nahan elmésagkok ma'a pánaqte yaqwayam enxoho katnahagkok éltaqmalma agko',

⁴keñe sa' ma'a kelán'a étkok ekleyókxa agko' enxoho apwáxok xép wesse', etnéssesek wesse' ekwányam, ekyaqmagkasso m'a Vasti. Leyawók axta apwáxok wesse' apwányam ma'a yaqwánxa axta etnahagkok, tén axta ektáha xa ektáha nak.

⁵Aphegkek axta nahan xama judío m'a tegma apyennaqte nak Susa apwesey axta Mardoqueo, Jaír axta apketche, Simí axta aptáwen neptámen tén han Quis, apteme axta apkeñama nepyeseksa m'a Benjamín énxet'ák apagkok.

⁶Apmomakpoho axta nahan xamók ma'a énxet apxámokma, apkelmoma axta wesse' apwányam Babilonia Nabucodonosor apkelántekkessama m'a Jerusalén yetlo m'a Jeconías, wesse' apwányam axta m'a Judá.

⁷Yetneyk axta nahan xama apwánegkesso apyaha' apketche kelwána ekyéheykha m'a Mardoqueo, apketsepmeyk axta m'a yáp tén han egken, apmomchek axta nahan aptéma apketche apagko' ma'a sekxók axta ekmassegweykmo m'a chána. Hadasá axta nahan ekwesey m'a, mók ekwesey axta Ester. Tásók agko' axta nahan ma'a, tásek axta nahan ekyókxa.

⁸Xama axta élyetsátexko m'a wesse' apwányam Asuero segánamakxa apagkok nak, xámok agko' axta kelán'a étkók kélanchásekxo m'a wesse' tegma apyawe apagkok nak, cham'a tegma apyennaqte nak Susa, kélteméssessek axta nahan apkeltaqmelchesso m'a Hegai, apkeláneykha axta chá'a m'a kelán'ák. Ester axta nahan kélyentamak ma'a.

⁹Leyawók agko' axta nahan apwáxok apkelano Hegai ma'a kelán'a étkok nak, apchápeyha axta, ekmanyehe agko' axta nahan apkeltamhók kóltexnássesagkok émpehek ma'a pánaqte ektaqmelchessamo nak egyempehek, apkeltamhók axta nahan kólagkok ma'a nento éltaqmalma agko' nak; apteméssessek axta nahan yaqwayam katnehek chá'a éláneykha m'a siete kelán'a étkók kélyéseykha axta, ekheykencha'a axta m'a kañe' tegma apyawe wesse' apwányam apxagkok nak, tén axta aphéssekmo m'a kañe' ektaqmelakxa agko' nak apwáxok tegma apyawe agkok ma'a kelán'ák yetlo m'a kelán'a étkók nak.

¹⁰Axta nahan kaxeyenmak xama enxoho éñamakxa m'a Ester tén han ma'a námakkok enxoho, hakte axta eltémók kaxének ma'a Mardoqueo.

¹¹Apweynchámeykha axta nahan chá'a Mardoqueo yókxoho ekhem ma'a ekpayho nak nepyáwa m'a kelán'a tegma apyawe agkok, yaqwayam enxoho ey'asagkohok chá'a ektáhakxa ekha m'a Ester, tén han kélteméssessamakxa chá'a.

¹²Doce pelten axta nahan kéltexnassáséyak émpe'ék pánaqte néltexnémaxche ektaqmelchessamo nak egyempehek xa ekyókxoho kelán'a étkók nak. Sekxók axta émha amonye' seis pelten kéltexnassáseykegko émpe'ék ma'a aqsok ánek ekmátsa nak ekpaqneyam pexmok agkok tén axta makham pók seis pelten kéltexneykegkokxo m'a sokmátsa tén han ma'a pexmok néltexnémaxche ekmátsa nak ekpaqneyam élmeykegkól'a chá'a m'a kelán'ák. Wokmek axta néxa élxawéyak ma'a pánaqte, kélyentamákxeyk axta chá'a xama kelán'a étkok ma'a aphakxa nak wesse' apwányam Asuero.

¹³Kél'awók axta nahan chá'a élsawa wesse' apwányam apxagkok ekyókxoho m'a aqsok élmaxneyakxa enxoho chá'a éleñama m'a kelán'a tegma apyawe agkok nak.

¹⁴Amonye' ekyáqtésso axta nahan chá'a kamyekxak xama m'a wesse' apwányam apxagkok nak, tén axta axto'o kamyekxak chá'a m'a pók apwáxok nak ma'a kelán'a tegma apyawe agkok, aptaqmelchessamakxa axta m'a Saasgaz, énxet yágkelwána wesse' apwányam apkeláneykha, apkeláneseykha axta chá'a m'a kelán'a apkelmeykha naqsa; keñe axta natámen megkawakxók chá'a m'a aphakxa nak wesse' apwányam, cham'a megyepmenyého enxoho chá'a tén han meltamho enxoho chá'a kólyentawakxések.

¹⁵Xama axta ekwákxo yaqwayam kamhagkok aphakxa wesse' apwányam ma'a Ester, Abihail axta apketche, apyaha axta m'a Mardoqueo, axta kategyáha ekseykha, wánxa axta aqsa eksawa m'a aptáhakxa axta apcháneya m'a Hegai, énxet yágkelwána wesse' apwányam apkeláneykha apkeltaqmelchesso axta chá'a m'a kelán'ák. Apchásekhayók axta nahan chá'a Ester apyókxoho m'a ektáha nak chá'a apkelwete.

¹⁶Kélyentegkek axta Ester wesse' apwányam apxagkok yaqwayam enxoho kamhagkok ma'a aphakxa nak wesse' apwányam Asuero, pelten diez, éltamhomaxko axta Tébet, ekweykmo axta siete apyeyam apteme wesse'.

¹⁷Apmenyeyk apagko' axta nahan apkelano wesse' apwányam Asuero m'a Ester, axta kaxnawok apmopmenyého chá'a ekwánxa apmopmenyého m'a mók kelán'a nak. Taqmeláha axta apwáxok apkelano m'a Asuero, cháxa ekmésa axta apchásekhayo apagko' neyseksa m'a ekyókxoho mók kelán'a étkók nak ektáha axta chá'a ekheykha xamo', apketchessessek axta akqátek ma'a élháxaqxo ektaqmalma, apteméssessek axta wesse' ekwányam ekyaqmagkasso m'a Vasti.

¹⁸Tén axta natámen apkelana ektámáxche ekyawe eñama m'a Ester, apkeláneyáha axta nahan epásegwók ma'a apyókxoho apkeláneykha tén han ma'a apkelpasmomákpoho nak chá'a ektémakxa apteme wesse'. Apweykásenteyk axta ekwánxa chá'a élmomaxche selyaqye m'a apchókxa apheykegkaxa nak chá'a énxet, apmelasseyk axta ekxámokma m'a aqsok apmelásekte naqsa, ekhawo ekpayhawo nak chá'a etnehek xama wesse' apwányam memasma aqsok apagkok.

¹⁹Apheyk axta nahan apátog wesse' apwányam apxagkok apyawe Mardoqueo m'a ekhem kélnaqleykekxexa axta chá'a mók apwáxok tegma apyawe agkok ma'a kelán'a étkók.

²⁰Axta eyke kaxeyenmak xama enxoho éñamakxa m'a Ester tén han ma'a námakkok enxoho, ekhawo m'a apkeltémókxa axta katnehek ma'a Mardoqueo, axta kalwátesseykmok ekteme m'a apkeltémókxa axta katnehek, cham'a aptémakxa axta aptaqmelchesso.

²¹Apleg'ak axta nahan apkelpaqmeta Mardoqueo Bigtán tén han Teres neyseksa apha m'a apátog nak wesse' apwányam apxagkok apyawe, apqánet sẽlpextétamo kelwesse'e apagkok axta m'a wesse' apwányam, apchaqneykha axta chá'a apkelhaxneykha m'a átog nentaxnamakxa nak tegma apyawe aptaqmalma. Apkellókók apagko' axta apxéna yaqhek ma'a wesse' apwányam Asuero.

²²Xama axta apleg'a Mardoqueo xa ektáhakxa axta apkelpaqmeyesma, apkeltennáseyha axta m'a wesse' ekwányam Ester, tén axta Ester éltennáseyncha'a wesse' apwányam Asuero ektáhakxa aplege m'a Mardoqueo.

²³Tegyáxcheyk axta amya'a xa ektáhakxa axta eklegamaxche', xama axta ekwetáxko ektáha naqso' xa, kélmakheyáseyha axta néten kélnaqtehetchesa apyespa'ák táma aptekyawákxo m'a apqánet sẽlpextétamo kelwesse'e nak. Cháxa aqsok élánamáxche nak, kélpekkenákxeyk axta kéltáxésso m'a aphakxa nak wesse' apwányam, cham'a weykcha'áhak eknaqtáxésamaxchexa axta chá'a amya'a ektémakxa nanók ma'a apchókxa.