Read Lengua Sur Ester 4 Bible Online

Ester 4 - Lengua Sur bible

Ester 4

¹Xama axta apleg'a Mardoqueo ekyókxoho m'a ektáhakxa axta, apkelyepteyk axta apkelnaqta magkenatchesso aplegágkoho ekyentaxno apwáxok, apkelántaxneykxeyk axta m'a apáwa sẽlwáxaqxamól'a, apkexpaqha'ak axta apqátek táhap tén axta apweynchámeyncha'a m'a tegma apwányam, axta yeyságkohok apkelekxagweyncha'a.

²Apkenegwákxeyk axta m'a átog nentaxnamakxa nak wesse' tegma apyawe apagkok, hakte megkólmenyeyk axta etxek xama énxet apkelántaxneykekxa enxoho xa aptéma nak apáwa.

³Tekkek axta ekwányam agkók éllegeykegkoho apkelwáxok nepyeseksa judíos ekyókxoho yókxexma ekweykenxa axta chá'a segánamakxa tén han appeywa m'a wesse' apwányam. Axta kalmayháseykegkok aptéyak ma'a élmayóseka apkelwáxok, tén han apkellekxagweykha tén han éllapwáméyak. Apxámok axta nahan chá'a aphéyak ma'a néten táhap tén han apkelántaxneykekxa chá'a m'a apáwa sẽlwáxaqxamól'a.

⁴Keltennássékxeyk axta ektáhakxa éláneykha m'a wesse' ekwányam Ester tén han ma'a énxet'ák aptaqmelchesso axta chá'a. Teyekmek axta awáxok ekleg'a m'a wesse' ekwányam, keláphássessek axta apáwa m'a Mardoqueo yaqwayam enxoho eyaqmagkasek pók ma'a apáwa sẽlwáxaqxamo apkelántaxneykekxa nak, axta eyke elyahákxoho.

⁵Tén axta Ester eyáneyeyncha'a m'a Hatac, apteme axta énxet yágkelwána apchásenneykha m'a wesse' apwányam éltamho etyánegwomhok ma'a Mardoqueo elmaxneyha ektáhakxa, yaqsa ektáha aptáha nak xa ektáha nak.

⁶Apyo'ókmek axta Hatac appaqhetchessekmo m'a Mardoqueo, cham'a aphakxa axta m'a apheykegkaxa axta chá'a énxet ma'a tegma apwányam, ekpayho axta m'a átog nak wesse' apwányam apxagkok apyawe,

⁷tén axta Mardoqueo apkeltennáseyncha'a ektáhakxa, apkeltennasa nahan ekwánxa sawo ekmope élmomnáwa apmako exátawók Amán ma'a kélxátegkessamakxa nak chá'a aqsok élmomnáwa apagkok ma'a wesse', ekyaqmageykekxa yaqwayam kólmasséssók ma'a apyókxoho judíos.

⁸Apméssek axta nahan xama weykcha'áhak ektáxésamaxche ekxeyenma axta kélmáheyo kólmasséssók judíos élyetsátexko axta m'a Susa, yaqwayam egkések ma'a Ester, keñe kay'asagkohok ekyókxoho m'a ektáhakxa. Apkeltamhók axta nahan kay'ókxohok agko' kapaqhetchessekxak Ester ma'a wesse' apwányam tén han kalmaxnak yának megkólmasséssemek ma'a ekpeywomo xamo' nak.

⁹Aptaqháwók axta Hatac apkeltennásekxo Ester aptáhakxa apkeltennáseykha m'a Mardoqueo.

¹⁰Tén axta Ester eyápháseykxo makham ma'a Hatac éltamho etnehek yának Mardoqueo eyáphássesa ekpeywa s'e:

¹¹“Apyókxoho énxet ektáha nak chá'a apkeláneykha m'a wesse' apwányam, tén han ma'a apheykha nak ma'a apchókxa aptémakxa nak chá'a wesse', apkelya'ásegkók ekyetna xama segánamakxa kéltémo chá'a etekyewekxak apyókxoho énxet tén han kelán'a aptaxnegwayam enxoho m'a kañe' nak tegma apyawe yaqwayam emhagkok ma'a aphakxa nak wesse' megkatnaha enxoho chá'a apcháneyeykha. Wánxa eyke aqsa chá'a ewagkasakpok teyp apya'asa enxoho chá'a ekpayhókxa apkenmágkaxa énxet ma'a sawo ekyátekto ekmomnáwa ekwenaqte apagkok nak. Ko'o eyke treinta ekhem entáhak meltémo amhagkok ma'a aphakxa nak wesse' apwányam.”

¹²Xama axta apleg'a Mardoqueo m'a ektáhakxa axta ekpeywa eyáphassáseykekxa m'a Ester,

¹³apcháphássásekxeyk axta makham mók apchátegmoweykegkokxa. Aptáhak axta s'e: “Nágkána aqsa exche' kawagkasaxchek teyp axakko' nepyeseksa judíos eñama ekha m'a wesse' tegma apyawe apagkok nak.

¹⁴Wanmeyákxeyk sa' agkok se'e kaxwo' nak, megkapaqmeta enxoho xama enxoho, mók nekha sa' kañék apkelwayam teyp ma'a judíos, keñe sa' xe' katsapok ekweykekxoho m'a yáp apnámakkok nak. ¡Temegkek axta exche' wesse' ekwányam yaqwayam hempasmok sentáha enxoho s'e sentáhakxa nak!”

¹⁵Tén axta Ester eyaphassásékxo makham ekpeywa Mardoqueo. Axta entáhak eyáneya s'e:

¹⁶“Exeg, yánchásekxa sa' apyókxoho judíos apheykha nak ma'a Susa, yaqwayam sa' metawagkehek aptéyak hélmaxnéssesek ko'o. Metawagkehek sa' aptéyak ekweykmoho ántánxo ekhem tén han ántánxo axta'a, ménagkek sa' nahan ma'a apyenéyak nak. Antamhagkok sa' eyke negko'óxa xa ektáha nak, cham'a séláneykha nak, tén sa' ko'o axog ay'ókxak ma'a wesse' apwányam, énmexma eykhe segánamakxa m'a sekmakókxa nak atnehek. Apkeltamhók sa' agkok amátog, tásek amátog.”

¹⁷Tén axta apxega m'a Mardoqueo. Apkelanak axta nahan ekyókxoho m'a éltamhókxa axta etnehek ma'a Ester.