Read Lengua Sur Ester 5 Bible Online

Ester 5 - Lengua Sur bible

Ester 5

¹Ántánxo ekhem axta entemék ekyeykhe, kelántaxneykxeyk axta Ester élnaqta élmeykegko nak chá'a ekteme wesse' ekwányam, taxnegwákxeyk axta m'a kélhaxtegkesso nak nepyáwa kañe' tegma apyawe. Kenegwákxeyk axta m'a ekpayhókxa axta chá'a aphakxa néten taháno ekyawe ektaqmalma m'a wesse' apwányam, ekyetnama axta m'a ekpayho nak átog.

²Xama axta apwet'a wesse' apwányam énegwa'akto wesse' ekwányam Ester ma'a yókxexma nak, taqmeláha axta apwáxok apwet'a, apya'ássek axta ekpayhókxa énmágkaxa m'a sawo ekyátekto ekmomnáwa ekwenaqte apmeykha axta. Yepetchegwokmók axta m'a Ester, mágwokmek axta naw'a m'a sawo ekyátekto ekwenaqte ekmomnáwa apagkok nak.

³Aptáhak axta apkelmaxneyáncha'a wesse' apwányam se'e: —¿Yaqsa ektáha, wesse' ekwányam Ester? ¿Yaqsa eyámenyého? ¡Élmaxnakkek sa' agkok nekha yókxexma sektémakxa nak wesse' apwányam, agkések sa'! Tén axta Ester eyátegmowágkokxo. Entáhak axta eyáneya s'e:

⁴—Wesse', leyawók sa' agkok apwáxok, éltamho eykhe epásegwók xépxa ektámaxche ekyawe sekmako nak ko'o alanaksek xép, éntamho sa' nahan ma'a Amán. Tén axta wesse' apkeltamho ektamakpok. Aptáhak axta s'e:

⁵—Kólchetam sa' heykxe ekmanyehe m'a Amán, tásek sa' elyahakxohok eyáneyeykha m'a wesse' ekwányam Ester. Tén axta apxega m'a wesse' apwányam yetlo Amán apyo'ókmo m'a ektámaxche ekyawe élane axta m'a wesse' ekwányam Ester.

⁶Aptáhak axta apcháneya wesse' apwányam Ester neyseksa ektámaxche nento s'e: —¡Hélmaxna sa' aqsok ekmámenyého, agkések sa'. Élmaxnakkek sa' agkok nekha m'a yókxexma sektémakxa nak ko'o wesse' apwányam, agkések sa'!

⁷Axta entáhak eyátegmowágkokxo Ester se'e: —Wánxa eyke aqsa ko'o seyámenyého tén han sekmako almaxnak xép,

⁸éxyók makham saka yetlo Amán epásegwaták makham mók ektámaxche ekyawe sélánésso nak xép, seyásekha'awo enxoho exchep wesse' tén han apkeltamho enxoho elának ma'a aqsok sekmámenyého tén han hegkések ma'a aqsok sélmaxneyakxa enxoho. Keñe sa' altennaksek ma'a aqsok sekmámenyého.

⁹Payhékxeyk axta apwáxok Amán aptepa m'a ektókaxchexa axta nento; aplókók apagkók axta eyke apwet'a Mardoqueo megyempákxo néten apyeyk'a m'a aphakxa axta apátog tegma apyawe, axta nahan eltaqhaháha apwet'a.

¹⁰Máxa metaqnawaya axta eyke aptáhak. Xama axta apwákxo m'a apxagkok apkeltamhók axta kólnaqlósawakxések ma'a apkelxegexma'a tén han ma'a aptáwa' ekwesey axta Zeres,

¹¹apkeltennáseyha axta nahan ma'a ektémakxa axta ekxámokma aqsok apagkok, tén han ekxámokma m'a apketchek, tén han ma'a apteméssessama axta wesse' apwányam mexnémo m'a apkeláneykha tén han ma'a apkelpasmomákpoho axta chá'a ektémakxa aptamheykha wesse', apteméssessama néten agko' kéláyo nepyeseksa m'a apyókxoho nak.

¹²Tén axta aptáha nahan se'e: —Ko'o eyke aqsa nahan wánxa exakkók seyáneyeyncha'a wesse' ekwányam Ester apásegwók ektámaxche ekyawe élánésa nak sakhem ma'a wesse' apwányam; tén seyáneyeyncha'a makham apásegwakxak mók ektámaxche ekyawe ekmako nak makham kalának ma'a saka.

¹³Megkapeykásekxeyk sa' eyke chá'a ko'o ewáxok ekyókxoho xa aqsok nak, sekwet'a enxoho chá'a exek apátog wesse' tegma apyawe apagkok ma'a Mardoqueo, judío nak.

¹⁴Tén axta m'a aptáwa' ektáha eyáneya s'e tén han ma'a apyókxoho apkelxegexma'a: —Yána sa' kólánchessesek yámet élwenaqte yetlo ektegyésso néten, ekweykmoho veintidós metros ekwenaqte ekmahéyak ma'a néten, tén sa' saka axto'o agko' elmaxnak wesse' apwányam kólmakhésha néten ma'a Mardoqueo. Keñe sa' apwanchek emhagkok yetlo meyke ektáhakxa apwáxok yetlo wesse' apwányam ma'a élánéxchexa nak ektámaxche ekyawe. Leyawók axta apwáxok Amán xa amya'a nak, apkeltamhók axta kalanaxchek ma'a yámet élwenaqte.