Read Lengua Sur Éxodo 15 Bible Online

Éxodo 15 - Lengua Sur bible

Éxodo 15

¹Tén axta Moisés apmeneykmasa yetlo israelitas se'e negmeneykmasso nak, apkelsawassásawo m'a Wesse' egegkok. Aptáhak axta apkelmeneykmasso s'e: “Anneykmássesek sa' ko'o Wesse' egegkok, cham'a apmallana axta nepyeseksa apkelenmexma apkelweykeságko kañe' wátsam ekwányam ma'a yátnáxeg tén han ma'a apheykha nak apkap'ák.

²Wesse' egegkok keñamak sekmeneykmasso, hakte cham'a sénnaqtésso m'a, tén han sewagkasso teyp. Cham'a apteme Dios ahagkok ma'a, alpeykeshok sa'; táta Dios apagkok ma'a, atnéssesek sa' apcheymákpoho.

³Wesse' egegkok apteme xama kempakhakma yáp apwányam apagko'. Wesse' egegkok apwesey xa.

⁴Apkelweykásegkek axta Wesse' egegkok wátsam ekwányam ma'a yátnáxeg apkelyenyawasso tén han ma'a faraón sẽlpextétamo apagkok; ¡kelnapchek axta Wátsam Ekwányam Ekyexwase m'a sẽlpextétamo ektáha axta apkelyéseykha!

⁵Appallénteyk axta ekweykmoho m'a kañók agko', máxa axta aptamhágkok ma'a ektémól'a meteymog kapallenta', chápekxeyk axta m'a wátsam ekwányam ekmattawóneg nak.

⁶Wesse' egegkok, kayhek xép apmek apkelya'assamakxa, ekmowána nahan eghak, cham'a éltepelchawo axta m'a katnaha egnámakkok.

⁷“Yetlo ekyawe apmopwána axta exchep apkeltekpagágkok ma'a ektáha axta apkenmexeykekxa; aplókók apagko' axta exchep, apkelmetchek axta nahan ma'a, máxa axta aptamhágkok ma'a ektémól'a pa'at apák kalmétek.

⁸Apwátekhapchek axta exchep ekyennaqte agko', tén axta eyánchásekxo m'a yegmen; máxa axta entáhak meteymog kélhaxtal'a élmeyákxo néten ma'a élyaqyahayam nak; ¡tén ma'a neyseksa nak wátsam ekwányam ekmattawóneg, yetneyk axta aqsa meyke éltaqheheykha!

⁹Keñe m'a ektáha axta sẽlenmexma ektáha élchetamso apwáxok se'e: ‘Agmenxenek sa' ekwokmo néltahanyékxo, agmelaskok sa' nahan ma'a aqsok nélyementaméyak enxoho, ekwokmoho élpayhékxo egwáxok. Ólhexyawasagkok sa' sawo élwenaqte egagkok, tén sa' egmék kamasséssók ma'a apyókxoho.’

¹⁰Apwátekhapchek axta eyke exchep, tén axta élweykeságko m'a wátsam ekwányam nak; máxa axta aptamhágkok apkelweywegko m'a ektémól'a meteymog kapallenták neygmen aphagwokmo m'a kañók agko' nak wátsam.

¹¹“Wesse' egegkok, ¡méko pók dios egwanchek aghéshok xép! ¡Méko apwányam aphawo nak xeyep! ¡Xeyep apkelane chá'a m'a aqsok ekpelakkasso nak agweta' tén han ma'a ekpexchessamo nak egyempehek agweta'! ¡Payhawók xeyep kólteméssesek apcheymákpoho!

¹²¡Apyenyenteyk axta exchep apmopwána tén axta eksawhawo eyápeykxo xapop ma'a énxet'ák!

¹³Yetlo apkelásekhayo exchep apnaqleykha s'e énxet'ák apagkok apkelwagkasa nak teyp; yetlo apmopwána nahan apnaqleykekxak ma'a yókxexma ekpagkanamaxchexa apagkok nak.

¹⁴Elpexyennók sa' chá'a apkelleg'a enxoho m'a ekyókxoho apheykegkaxa nak chá'a énxet'ák, elektakpok sa' ellegagkohok ekmáske m'a filisteos,

¹⁵meyke apkelwasqapma sa' etnahagkok eñama apkelaye m'a apkelámha apmonye'e nak sẽlpextétamo yókxexma Edom, elpexyennók sa' apkelaye m'a apkelámha apmonye'e nak kempakhakma m'a yókxexma Moab, kamaskok sa' apkelyennaqte m'a apyókxoho énxet'ák Canaán.

¹⁶“Wesse' egegkok, ¡elyegwakkas!, ¡yána' yeygkok! ¡tásek exmakha aqsa ektémól'a kaxnagkok ma'a meteymog eñama xa apmopwána ekyennaqte nak, ekwokmoho sa' apkelyeyk'a m'a énxet'ák apagkok, cham'a énxet'ák apteme nak xeyep apagkok!

¹⁷Wesse' egegkok, hẽlye'és negko'o yaqwayam aghamok ma'a egkexe apagkok ekpagkanamaxche nak, cham'a yókxexma sẽlyessáseykegkaxa axta yaqwayam aghamok, apkeláneykxa axta tegma appagkanamap apagkok.

¹⁸“¡Katnahagkok sa' chá'a apteme Wesse' egegkok megkatnégwayam ennéxa!”

¹⁹Xama axta élántaxna yátnáxeg apkelyenyawasso tén han apkelchánte yátnáxeg apagkok faraón ma'a wátsam ekwányam awáxok, apkeltamhók axta kápekxak yegmen ma'a Wesse' egegkok; tén axta m'a israelitas apkelyeykhákxo aqsa ektémól'a keymáwhok exma xapop ma'a kañe' nak wátsam ekwányam awáxok.

²⁰Keñe axta m'a kelán'a ekxeyenmo axta chá'a Dios appeywa ekwesey María, apyáxeg axta m'a Aarón, ekma xama kélaqtawáseykha ekyaqyél'a, kelyetlókek axta nahan ekyókxoho m'a kelán'ák, neywegkek axta, kelpáwássek axta m'a aqsok élyaqye nélaqtawáseykha nak.

²¹Axta entáhak nahan éláneya neyseksa élmeneykmasso námakkok se'e: “Kólmeneykmásses Wesse' egegkok, cham'a apmallana axta nepyeseksa apkelenmexma, apkelweykeságko wátsam ekwányam ma'a yátnáxeg tén han ma'a apheykha nak apkap'ák.”

²²Apkeltamhók axta eyenyók apheykha israelitas Moisés ma'a nekha Wátsam Ekyexwase nak. Tén axta apkelmeyákxo m'a yókxexma meykexa nak énxet ekwesey nak Sur. Ántánxo ekhem axta entáhak apkelxega meyke apkelwetágwayam yegmen.

²³Xama axta apkelwokmo m'a yókxexma ekwesey nak Mará, mopwanchek axta apmako énagkok yegmen ekyetno axta m'a, hakte askohok agko' axta. Axta keñamak éltamhomaxko ekwesey Mará m'a yókxexma nak.

²⁴Apcheynawók axta nahan apkelpaqméteyncha'a ekmaso énxet'ák apxéna m'a Moisés. Aptáhak axta apkelmaxneyáncha'a s'e: “¿Yaqsa sa' agyenagkok?”

²⁵Tén axta Moisés apkelmaxneya m'a Wesse' egegkok apkeltamho epasmok, apxekmóssek axta nahan énmakxa xama yámet étkok. Apyenyókek axta neygmen Moisés ma'a yámet étkok nak, keñe axta eyátsékxo m'a yegmen nak. Cháxa apkelyepkeynakxa axta nahan sekxók Wesse' egegkok israelitas ma'a, apméssek axta nahan xama segánamakxa tén han xama sempékessáseyak nak ektémakxa nenxega.

²⁶Aptáhak axta apkeláneya s'e: “Kélhaxnawók agkok chá'a kéxegke meyke kéltawásseyo kóleyxhok ma'a sektáhakxa enxoho chá'a séláneya, ko'o sektáha nak Wesse' Dios kélagkok, tén han kéllana enxoho chá'a m'a ekpeykeseykekxoho nak chá'a ko'o ewáxok, kélyahákxoho enxoho nahan chá'a m'a séltémókxa nak chá'a kóltéhek, tén han kéllana enxoho chá'a m'a segánamakxa ahagkok nak, magwáphaksek sa' ko'o xama enxoho m'a aqsok ekmaso nenlegeykegkoho, seyáphasa axta ko'o nepyeseksa m'a egipcios, hakte ko'o sekteme Wesse', ektáha nak chá'a apkelmeyáseykekxa kélyennaqte kéxegke.”

²⁷Apkelwokmek axta m'a yókxexma ekwesey nak Elim, ekheykegkaxa axta nahan doce maxcha'a yegmen ma'a tén han setenta yám'áxa élaqnéyak, apkelpakxenwokmek axta nahan ma'a ekpayhókxa axta ekyetnamakxa m'a yegmen.