Read Lengua Sur Éxodo 19 Bible Online

Éxodo 19 - Lengua Sur bible

Éxodo 19

¹Apkelwokmek axta israelitas yókxexma meykexa nak énxet Sinaí natámen axta ekwayam apqántánxo pelten apkelánteyapma m'a Egipto.

²Apkelwokmek axta m'a meykexa nak énxet Sinaí, apkelpakxenwokmek axta nahan ma'a, cham'a natámen axta apkelánteyapma m'a yókxexma Refidim, ekpayho nak ma'a egkexe.

³Apchánteyk axta Moisés apyo'ókmo Dios ma'a, tén axta apwóneyncha'a Wesse' egegkok ma'a néten egkexe nak. Aptáhak axta apcháneya s'e: —Eltennasák sa' Jacob aptawán'ák neptámen se'e amya'a nak, cham'a israelitas:

⁴‘Kélweteyak kéxegke sekteméssessamakxa axta ko'o m'a egipcios, tén han ma'a ektémakxa axta seknaqleykento ko'o kéxegke m'a sekhakxa nak, máxa axta kéltemék kélxegeykmo m'a ektémól'a náta ekyawe kaxnésha néten axempenák ma'a étkók.

⁵Élyahákxók agkok chá'a ko'o kélyókxoho nak, kéllana enxoho chá'a m'a ekhémo mók nélpaqhetchásamáxkoho ahagkok, atnehek sa' énxet'ák ahagkok ahagko' nepyeseksa m'a apyókxoho énxet'ák nak keso náxop, hakte ko'o sekteme ahagkok se'e ekyókxoho nak keso náxop.

⁶Kéxegke sa' nahan kóltéhek kélpasmo kélmaxnéssesso énxet'ák ahagkok xa kélyókxoho nak, énxet'ák ektáha nak chá'a apkelpagkanchásamap ko'o.’ Eltennasák sa' ekyókxoho israelitas xa.

⁷Apxegkek axta Moisés, tén axta apkelwóneyncha'a m'a apkelámha apmonye'e nak nepyeseksa énxet'ák, apkeltennásencha'a ekyókxoho m'a apkeltamhókxa axta etnehek ma'a Wesse' egegkok.

⁸Keñe axta israelitas apheyásawo mók apkelpeywa apkelátegmowágkokxo. Aptáhak axta s'e: —Anlának sa' ekyókxoho m'a apkeltamhókxa enxoho chá'a anlának ma'a Wesse' egegkok. Keñe axta Moisés apsákxésa Wesse' egegkok ma'a ektáhakxa axta apkelpaqmeyesma m'a énxet'ák.

⁹Tén axta aptáha apcháneya Wesse' egegkok se'e: —Elano, atnegwaták sa' ko'o apmonye' exchep neyseksa xama yaphope ekyentaxno agko', yaqwayam enxoho ellegak apaqhetchesek ma'a énxet'ák nak, tén sa' keytek chá'a kéláyo exchep. Apkelánekxók axta makham apkeltennasso Moisés Wesse' egegkok ma'a aptáhakxa axta apkelátegmoweykegkokxa m'a énxet'ák.

¹⁰Aptáhak axta apcháneya Wesse' egegkok se'e: —Exeg, elánekxés sa' aptamhágkaxa m'a énxet'ák sakhem tén han saka sa', yaqwayam enxoho hélpeykeshok ko'o. Tásek sa' elyenyesagkok apkelnaqta,

¹¹tén han elanagkokxak aptamhágkaxa yaqwayam elpencheshok ma'a mók ekhem sa', hakte mók ekhem sa' aweywenták ko'o, sektáha nak Wesse' kélagkok ma'a egkexe nak Sinaí, nápaqta'awók ma'a apyókxoho énxet'ák.

¹²Elqahasák sa' néxa nekhaw'ék ma'a egkexe nak yaqwayam enxoho melmallánek ma'a énxet'ák, yána sa' nahan yáwhok ma'a egkexe nak, nágyána elchántek tén han elyepetchegwomhok ma'a neyáwa nak, hakte apyókxoho énxet ektáha enxoho apyepetchegweykmoho xa, yetsapok sa'.

¹³Méko sa' kawának kapaknegwomho'. Meteymog sa' kólyetnak kólaqhek essenhan kólmaktak yágke m'a ektáha enxoho apyepetchegweykmoho, megkeyxek sa' ma'a xama énxet essenhan aqsok nawhak, kólaqhek sa' meyke kélhayo kalweynchamha. Wánxa sa' aqsa apwanchek elchántek énxet'ák egkexe m'a apkelleg'a sa' kapáwak kélaqkahasso.

¹⁴Aptekkek axta Moisés néten egkexe apmako elánesseták aptamhágkaxa m'a énxet'ák, yaqwayam enxoho elpeykeshok ma'a Dios. Apkelyenyeyásegkek axta apkelnaqta,

¹⁵keñe axta Moisés aptáha apkeláneya s'e: —Kóllánekxa sa' kéltáhakxa yaqwayam enxoho kólpenaksohok ma'a mók ekhem sa', nágkólpatheták aqsa sekxók kélnaqteyegka'a.

¹⁶ Keñe axta élsaka ekwokmo ántánxo ekhem, wetáxcheyk axta apkelyenmayam, legáxcheyk axta nahan ma'a takha' appáwà, yetna'ék axta nahan xama yaphope ekyentaxno m'a néten egkexe nak. Legáxcheyk axta nahan ekpáwà kélaqkahasso ekyennaqte agko'. Apyókxoho énxet axta nahan apkelpexyennamak apkelaka m'a apheykegkaxa axta.

¹⁷Keñe axta Moisés apnaqlawa énxet'ák apkelya'asa m'a teyp apheykegkaxa axta apkelpakxeneykegko, yaqwayam elanyexagkok ma'a Dios, apchaqnágwokmek axta m'a nekha egkexe nak.

¹⁸Paqneyk axta nahan ekyókxoho m'a egkexe Sinaí, hakte apweywenteyk axta Wesse' egegkok apkenegwa'akto m'a neyseksa táxa eyáléwe. Meyákxeyk axta néten ma'a éten ektémól'a m'a táxa axagkok, kelpexyennegkek axta nahan ekyennaqte agko' ma'a egkexe nak.

¹⁹Yágwokmók agko' axta aqsa nahan ekyennaqte ekpáwà m'a kélaqkahasso nak; appaqhetchessek axta m'a Moisés, tén axta Dios apchátegmowágkokxo aptáha appeywa m'a ektémól'a epáwak takha'.

²⁰Apweywenteyk axta Wesse' egegkok ma'a étsekso nak egkexe Sinaí, tén axta apkeltamho yántek Moisés ekweykmoho m'a apkenegwa'aktamxa axta. Apchánteyk axta Moisés,

²¹tén axta aptáha apcháneya Wesse' egegkok se'e: —Etyep, eltennasagkok sa' énxet'ák yaqwayam melmallánhek ma'a néxa nak kélqaháseyak, nágyána nahan eltamhok hétak ko'o, yaqwayam enxoho mexámhek apkeletsapma.

²²Kammohok sa' nahan apkeláxñáseykekxa apyempe'ék ma'a énxet'ák apkelmaxnéssesso nak chá'a énxet'ák ahagkok apmopwancha'a nak chá'a ko'o hépetchegwoho', hakte allegássesagkohok ko'o katnehek ekyentaxno agko' xa énxet'ák nak.

²³Apchátegmowágkokxeyk axta Wesse' egegkok ma'a Moisés. Aptáhak axta apcháneya s'e: —Mopwanchek eyke elchántek énxet'ák se'e egkexe nak Sinaí, hakte xeyep axta apkeltémo ampekkenek néxa nélqahasso xa, apteméssessek axta nahan ekpagkanamaxche'.

²⁴Aptáhak axta apcháneya Wesse' egegkok se'e: —Etyep; tén sa' natámen yántohok xamo' ma'a Aarón. Eyke mopwanchek elmallánek néxa kélqahasso yaqwayam hey'áwak sekhakxa ko'o m'a apkelmaxnéssesso nak énxet'ák ahagkok tén han ma'a énxet'ák nak, hakte allegássesagkohok ko'o katnehek ekyentaxno m'a.

²⁵Aptekkek axta m'a Moisés tén axta apkeláneykxoho apkeltennasso israelitas xa amya'a nak.