Read Lengua Sur Éxodo 25 Bible Online

Éxodo 25 - Lengua Sur bible

Éxodo 25

¹Appaqhetchessek axta Wesse' egegkok Moisés. Aptáhak axta apcháneya s'e:

²“Eltennasák sa' israelitas, heyánchessesha sa' ko'o aqsok apmésso naqsa apagkok. Sa' eyke yánchásekxak aqsa nepyeseksa m'a apyókxoho apmáheyo apagko' nak chá'a egkések, tén han ma'a ekmáheyo agko' nak chá'a apwáxok.

³Keso aqsok yaqwayam nak kólánchesha s'e: sawo ekyátekto ekmomnáwa, sawo ekmope ekmomnáwa, tén han ma'a sawo ekyexwase élyenma agko' nak,

⁴apáwa napwa'a apyápaqmate, hómáyok, apyexwase tén han ma'a apáwa apkeláxñeyo apkexyawe nak, tén han ma'a yát'ay apwa',

⁵nepkések apkennawo' apyempehek kélyexwássesso nak ekyexwase, tén han ma'a aqsok émpe'ék élexyawáyól'a tén han ma'a yámet apkeñama nak wantep,

⁶cháléwasso égmenek, sokmátsa yaqwayam nak kólenchehekxak ma'a pexmok égmenek kélmeykencha'awól'a chá'a hẽlteméssesek nempagkanamaxche', tén han yaqwayam nak kólyepetchesek ma'a aqsok ekmátsa nak ekpaqneyam éten agkok,

⁷tén han ma'a meteymog élyexwasél'a élyenma ekwesey nak cornalina, tén han ma'a mók meteymog élexyawél'a, yaqwayam enxoho kóltahanchesek néten ma'a apáwa apyaqwate apkelyenma nak efod, tén han ma'a apkexanma nak chá'a apnények ma'a apkemha apmonye' nak apkelmaxnéssesso Dios énxet'ák apagkok.

⁸Héllanés sa' nahan xama kélpakxanma appagkanamap yaqwayam enxoho axek chá'a ko'o kélnepyeseksa kéxegke.

⁹Kólhéshok sa' eyke kéllane sekmako nak ko'o axekmósek, cham'a kélpakxanma yaqwánxa nak chá'a ko'o axek, yetlo m'a ekyókxoho yántéseksa'ák.

¹⁰“Elána sa' xama yántéseksek yámet apkeñama nak wantep, ekwayam nak xama metro diez centímetros ekwegqakxa, tén sesenta y cinco centímetros ma'a ekpayhakxa, keñe han sesenta y cinco centímetros ekmahéyák ma'a néten.

¹¹Elyepetches sa' nahan sawo ekyátekto ekmomnáwa m'a kañe' awáxok tén han ma'a émpehek nak. Epekken sa' nahan xama élyenma étkok ekwenaqte sawo ekyátekto ekmomnáwa m'a nekhaw'ék nak.

¹²Elanés sa' nahan cuatro sawo élyaqye sawo ekyátekto ekmomnáwa, elatches sa' ma'a cuatro ayay'ák nak, ánet sa' ma'a xama nekha nak, tén sa' ánet nahan ma'a mók nekha nak.

¹³Elána sa' nahan éltegyésso élwenaqte yámet apkeñama nak wantep, elyepetches sa' nahan émpe'ék ma'a sawo ekyátekto ekmomnáwa nak,

¹⁴elatches sa' ma'a sawo élyaqye ekhágko nak ma'a nekhaw'ék nak yántéseksek, yaqwayam enxoho kólchegwának chá'a kólya'aksek néten ma'a.

¹⁵Ná elhaxyawásekxa aqsa chá'a m'a; kalyetlawhok sa' agkok ma'a sawo élyaqye agkok nak yántéseksek.

¹⁶Exátem sa' kañe yántéseksek ma'a segánamakxa sekmako nak almések.

¹⁷“Elána sa' nahan xama átog sawo ekyátekto agko' nak, ekwayam nak xama metro diez centímetros ekwenaqte m'a ekwegqakxa tén han sesenta y cinco centímetros ma'a ekpayhakxa,

¹⁸ekyetlómo apqánet sélásenneykha ekha apxempenák kéleykmássesso sawo ekyátekto ekmomnáwa, kéltekpagéyak la'a kéllane m'a sawo ekyentaxno, cham'a ánet nekhaw'ék nak chá'a átog.

¹⁹Xama sa' eyke katnekxak ma'a átog nak ekyepetcheykekxa m'a kéleykmássesso nak sélásenneykha ekha apxempenák. Xama sa' etnamha m'a mók nekha nak átog, tén sa' nahan xama m'a mók nekha nak.

²⁰Epayhohok sa' nahan pók, keñe sa' nápaqta'a kalpayhohok ma'a néten átog nak, tén sa' ma'a apxempenák nak kalpayhek ma'a néten átog nak eláhakkasek.

²¹Tén sa' epekkenek néten átog ma'a yántéseksek nak, enegken sa' nahan kañe' yántéseksek ma'a segánamakxa ahagkok sekmako nak almések.

²²Sa' ótak chá'a exchep ma'a, néten nak ma'a átog, nepyeseksa nak ma'a apqánet kéleykmássesso sélásenneykha ekha apxempenák, cham'a apheykha nak ma'a néten yántéseksek ekhémo mók nélpaqhetchásamáxkoho ahagkok nak, altennaksek sa' chá'a m'a ekyókxoho séltamhókxa enxoho chá'a etnahagkok ma'a israelitas.

²³“Elána sa' xama mésa apkeñama nak yámet wantep, ekwayam nak noventa centímetros ekwenaqte ekwegqakxa, tén cuarenta y cinco centímetros ma'a ekpayhakxa, keñe han sesenta y cinco centímetros ekmahéyak ma'a néten.

²⁴Elyepetches sa' nahan émpe'ék ma'a sawo ekyátekto agko' nak, epekkenches sa' nahan xama ekpayhe étkok ekwenaqte sawo ekyátekto ekmomnáwa m'a nekhaw'ék nak.

²⁵Elanés sa' nahan xama aphaxtegkesso m'a nekhaw'ék nak ekweykmoho siete centímetros ekpayhakxa, tén sa' epekkenchesek nahan ekpayhe étkok sawo ekyátekto ekmomnáwa m'a neyseksa nak.

²⁶Elanés sa' nahan cuatro sawo élyaqye sawo ekyátekto ekmomnáwa, enegkenchesák sa' nahan ma'a cuatro máséyak nak, ekpayhókxa nak chá'a m'a ayay'ák.

²⁷Kaxnagkohok sa' xamo' ma'a kélhaxta nak, yaqwayam sa' kólatchesek ma'a yámet élwenaqte nak tén sa' kólewának chá'a kólsók ma'a mésa nak.

²⁸Elanés sa' nahan yámet élwenaqte m'a yámet apkeñama nak wantep yaqwayam sa' kólmaha chá'a kólsók ma'a mésa nak, elyepetches sa' nahan émpe'ék ma'a sawo ekyátekto ekmomnáwa nak.

²⁹Elanés sa' nahan sawo ekyátekto agko' ma'a sokpayhe agkok, yekweykto élyawe, egheykok élyawe tén han ma'a egheykok étkók yaqwayam sa' kóltéhek chá'a kélmeykha kélanchesso sélmésso m'a aqsok égmenek.

³⁰Enegken sa' chá'a néten mésa, sekhakxa nak ko'o m'a kelpasmaga sélpagkanchesso nak chá'a.

³¹“Elána sa' xama cháléwasso ekyawe sawo ekyátekto agko' la'a, kéltekpageykegkoho nak chá'a kalanaxchek ma'a sawo ekyentaxno. Xama sa' eyke katnekxak ekpasmeykekxa ekyókxa m'a awhak ekpayhe nak, axchapok, egheykok étkók agkok, tén han ma'a élapma nak, tén han ma'a axanák nak.

³²Keñe sa' ma'a nekhaw'ék nak kaxnagkok seis aktegák, ántánxo sa' ma'a xama nekha nak tén sa' ántánxo nahan ma'a mók nekha.

³³Ántánxo egheykok étkók ekho nak mokwa apexnók yetlo élapma tén han axanák sa' chá'a kaxnagkok xama aktog, cham'a seis aktegák nak chá'a ekhéyak xama nekha axchapok ma'a cháléwasso nak.

³⁴Keñe sa' ma'a axchapok agko' nak kaxnagkok cuatro egheykok étkók agkok, ekhawo nahan ma'a ektémól'a mokwa apexnók, yetlo m'a axanák nak tén han ma'a élapma nak.

³⁵Xama exnamok axagkok sa' nahan chá'a keytek kóneg xama m'a ántánxo aktegák nak chá'a xama nekha m'a cháléwasso nak.

³⁶Xama ekpasmeykekxa sa' eyke katnehek cháléwasso m'a exnamok axanák nak tén han ma'a aktegák nak, cham'a yaqwayam nak katnehek ma'a sawo ekyátekto agko' la'a, kéltekpageykegkoho nak chá'a kalanaxchek ma'a sawo ekyentaxno.

³⁷Elanés sa' nahan siete cháléwasso étkók, enegkenák sa' ma'a néten nak yaqwayam sa' kaltátchesek ma'a amonye' nak,

³⁸sawo ekyátekto ekmomnáwa nahan chá'a payhawók katnehek ma'a kélmeykha nak chá'a kólsapanchesek tén han ma'a sokpayhe étkók agkok nak.

³⁹Emha sa' treinta y tres kilos sawo ekyátekto agko' la'a yaqwayam elának ma'a cháléwasso tén han ma'a ekyókxoho aqsok agkok élmeykegkaxa nak chá'a.

⁴⁰Exnésho sa' apkelane m'a ektéma axta kélxekmósa m'a egkexe nak.