Read Lengua Sur Éxodo 26 Bible Online

Éxodo 26 - Lengua Sur bible

Éxodo 26

¹“Elána sa' diez apáwa napwe'ék apkeláxñe apkelyaqséyak kélpakxanma appagkanamap, cham'a apáwa apyápaqmate, hómáyok tén han ma'a apyexwase nak; yót sa' nahan chá'a eleykmássesha apqánet sélásenneykha ekha apxempenák ma'a nápakhaw'ék nak.

²Sa' nahan chá'a exhok apkelwenaqte apyókxoho apáwa napwe'ék se'e: doce metros nepxet pók ma'a apwegqakxa nak, tén sa' ánet metros ma'a appayhakxa nak.

³Épetchásekxa sa' pók apkelyetnaqte cinco apáwa napwe'ék, sa' etnéssesek nahan ma'a pók cinco nak,

⁴enegkenchesák sa' nahan kélatcháseykekxexa nak chá'a apxát'ák apyápaqmate nápakhaw'ék ma'a apkemha apmonye' apyetno nak ma'a apáwa napwa'a. Tén sa' nahan ma'a apyetno nak napwo'o, elanaksek sa' nahan ma'a kélatcháseykekxexa nak chá'a apxát'ák.

⁵Cincuenta élyagqaxe sa' chá'a elanaksek xama kélnaqtéteykekxexa apxát'ák ma'a apáwa napwa'a nak, cham'a apyetno nak apmonye', tén han ma'a apyetno nak axayo', yaqwayam sa' kataqmelek appayhémo pók aphéyak.

⁶Elána sa' nahan cincuenta sawo élhaxe sawo ekyátekto ekmomnáwa, yaqwayam sa' kóltahanyéssak pók kólásekkásekxak ma'a apáwa napwe'ék nak, yaqwayam enxoho kasawhekxohok kélhaxtameykekxa apyókxoho m'a kélpakxanma appagkanamap nak.

⁷“Elána sa' nahan once apyepetcháseykekxa mók apchótma yát'ay apwa' yaqwayam sa' kóltéhek kélpakxanma, kélapma m'a kélpakxanma appagkanamap nak.

⁸Trece metros nepxet pók sa' nahan chá'a etnehek apwegqakxa apyókxoho m'a yát'ay apwa' nak kélótma, tén sa' ánet metros chá'a m'a appayhakxa nak.

⁹Épetchásekxa sa' nahan pók apkelyetnaqte m'a cinco yát'ay apwa' apchótma nak xama nápakha, tén sa' seis ma'a pók nápakha nak, keñe sa' eyaqsásekxak ma'a ektáhakxa nak seis yát'ay apwa' apchótma ekpayho nak nentaxnamakxa m'a kélpakxanma.

¹⁰Keñe sa' natámen elának cincuenta élyagqaxe nápakhaw'ék kélápeykekxexa nak chá'a m'a apkemha apmonye' apyetno nak ma'a yát'ay apwa' kélótma, tén sa' cincuenta élyagqaxe nápakhaw'ék nahan ma'a pók nápakha nak.

¹¹Elána sa' nahan cincuenta sawo élhaxe sawo ekyexwase, elatches sa' ma'a élyagqaxe nak, yaqwayam sa' etnekxak xama apyepetcheykekxa pók apyókxoho m'a kélpakxanma nak.

¹²Kólmakhésha sa' napwa'a apkeymomap nak yát'ay apwa' kélótma m'a apyetseksek nak kélpakxanma appagkanamap, hakte aphóxek sa' etnehek.

¹³Sa' kasawhekxohok kélpakxanma appagkanamap ma'a apkeymomap nak apwenaqte, cham'a yaqwayam nak chá'a kólmakhésha ánet nápakhaw'ék ma'a: cuarenta y cinco centímetros ma'a xama nápakha, tén han cuarenta y cinco centímetros ma'a pók nápakha nak.

¹⁴“Elána sa' makham kélpakxanma nepkések apkennawók apyempehek kélyexwássesso nak ekyexwase, yaqwayam kólpakxenek ma'a kélpakxanma appagkanamap, tén sa' nahan ma'a aqsok émpe'ék élexyawáyól'a, yaqwayam sa' kólpekkenekxak ma'a néten nak.

¹⁵“Elána sa' nahan yántéseksa'ák yámet apkeñama nak wantep, yaqwayam sa' elánchesagkok nápakhaw'ék ma'a kélpakxanma appagkanamap, elpékesho sa' nahan apnegkenma.

¹⁶Cuatro metros náxet mók sa' nahan chá'a katnehek ekwegqakxa xama m'a yántéseksek nak, tén sesenta y cinco centímetros ma'a ekpayhakxa,

¹⁷ánet élyagqaxe sa' nahan chá'a kaxek ma'a, yaqwayam sa' kataqmelek chá'a ekyepetcheykekxa mók ektaxno m'a yántéseksek nak. Etnésses sa' ekyókxoho yántéseksa'ák apagkok nak kélpakxanma appagkanamap xa ektáha nak.

¹⁸Apkelanak sa' agkok xa, elána sa' veinte yántéseksa'ák élpehewayam ma'a ekpayho nak nepyeyam,

¹⁹enegkenchesák sa' nahan cuarenta awhók élyennaqtéssamakxa sawo ekmope ekmomnáwa m'a kóneg nak. Ánet awhók ekyennaqtéssamakxa sa' nahan chá'a keytek kóneg xama yántéseksek, yaqwayam sa' kalántexek chá'a m'a ánet élyagqaxe nak.

²⁰“Tén sa' nahan ma'a pók nápakha nak kélpakxanma appagkanamap, ekpayho nak nexcheyha, elanaksek veinte yántéseksa'ák,

²¹ekyetlómo m'a cuarenta awhók élyennaqtéssamakxa nak sawo ekmope ekmomnáwa, yaqwayam sa' kaxek chá'a ánet ekyennaqtéssamakxa awhak kóneg xama yántéseksek.

²²Keñe sa' ma'a ekpayho nak ekteyapmakxa ekhem, elanaksek sa' seis yántéseksa'ák,

²³tén sa' ánet yántéseksek makham yaqwayam kólánchesek ma'a máséyak nak, ekpayho nak han ma'a ekteyapmakxa ekhem.

²⁴Tásek sa' nahan kaxhok mók ekhéyak xa yántéseksa'ák nak tén han keypetchekxak mók éleñama m'a néten nak ekweykmoho m'a émha amonye' nak sawo ekyaqye. Sa' nahan etnéssesek ma'a ánet yántéseksek yaqwayam nak kalaqnek ma'a ánet máséyak nak.

²⁵Keñe sa' kaxek chá'a ocho yántéseksa'ák ekyetlómo agkok agko' chá'a xama dieciséis awhók élyennaqtéssamakxa m'a sawo ekmope élmomnáwa, ánet ekyennaqtéssamakxa chá'a awhak kóneg xama yántéseksek.

²⁶“Elána sa' cinco éltegyésso élwenaqte yámet apkeñama nak wantep yaqwayam sa' kóltegyések xama nápakha kélyepetchessamakxa yántéseksa'ák ma'a kélpakxanma appagkanamap,

²⁷keñe sa' cinco nahan ma'a pók nápakha nak, keñe sa' makham mók cinco éltegyésso yaqwayam kólyepetchesek yántéseksa'ák ma'a teyp nak kélpakxanma appagkanamap, cham'a ekpayho nak ektaxnegwánxa ekhem.

²⁸Tásek sa' nahan kamallahanwomhok chá'a pók napwa'a m'a ektegyésso ekyetno nak neyseksa, naxta'a nak ma'a yántéseksa'ák.

²⁹Elyepetches sa' nahan émpe'ék sawo ekyátekto ekmomnáwa m'a yántéseksa'ák nak, elanés sa' nahan sawo élyaqye agkok sawo ekyátekto ekmomnáwa m'a, yaqwayam sa' kasawhekxohok sawo ekyátekto ekmomnáwa émpe'ék apkelatchesa enxoho m'a yámet élwenaqte nak.

³⁰Elána sa' kélpakxanma appagkanamap aphémo apagko' ma'a kélxekmósa axta m'a egkexe nak.

³¹“Elána sa' apáwa kélapma apyápaqmate, hómáyok, apyexwase tén han ma'a apáwa apkeláxñe apkelyaqséyak nak, eleykmássesha sa' nahan chá'a apchótma apqánet sélásenneykha ekha apxempenák ma'a apáwa nak.

³²Elatchesák sa' cuatro yámet kéláncháséyak nak ma'a sawo élhaxe sawo ekyátekto ekmomnáwa nak, cham'a yaqwayam nak kasawheyásekxohok émpe'ék ma'a sawo ekyátekto ekmomnáwa, néten nak ma'a cuatro élyennaqtéssamakxa awhók nak sawo ekmope ekmomnáwa.

³³Elmakhésha sa' apáwa kélapma nak ma'a kóneg nak sawo élhaxe, epekken sa' yántéseksek ekhémo mók nélpaqhetchásamáxkoho m'a teyp nak kélapma. Sa' kañék apkexpánchessesso kéxegke kañe' Ekpagkanamaxche nak ma'a apáwa nak, tén han ma'a Ekpagkanamaxchexa agko' nak.

³⁴Epekkenches sa' nahan átog ma'a yántéseksek ekhémo mók nélpaqhetchásamáxkoho nak, cham'a kañe' Ekpagkanamaxchexa agko' nak.

³⁵Tén sa' ma'a mésa nak epekkenek ma'a halep nak apáwa apkexyawe kélapma ekpayho nak ma'a nexcheyha kañe' kélpakxanma appagkanamap, tén sa' ma'a cháléwasso ekyawe nak epekkenek ma'a ekpayho nak nepyeyam, amonye' nak ma'a mésa.

³⁶“Elanés sa' nahan xama apáwa napwa'a apyápaqmate, hómáyok, apyexwase tén han ma'a apáwa apkeláxñe apkelyaqséyak nak chá'a m'a nentaxnamakxa nak kélpakxanma appagkanamap, kéleykmassáseykha nak chá'a m'a nápakhaw'ék.

³⁷Elanés sa' nahan apáwa napwe'ék ma'a cinco élámha yámet apkeñama nak wantep eksawheykekxoho nak ma'a sawo ekyátekto ekmomnáwa, élyetlómo m'a sawo élhaxe apagkok sawo ekyátekto ekmomnáwa, elpeykásekxak sa' nahan elméxenchásekxak ma'a cinco awhók ekyennaqtéssamakxa sawo ekyexwase nak, yaqwayam enxoho kólmaha kólatchesek ma'a yámet élámha nak.