Read Lengua Sur Éxodo 27 Bible Online

Éxodo 27 - Lengua Sur bible

Éxodo 27

¹“Elána sa' xama ekwatnamáxchexa aqsok ekhémo mók ekpayhakxa, yámet apkeñama nak wantep, ekwayam nak chá'a ánet metros veinticinco centímetros xama nekha, tén sa' xama metro veinticinco centímetros ekmahéyák ma'a néten.

²Elanés sa' nahan cuatro élámha élmahamtakcha'a m'a cuatro máséyak nak, yaqwayam sa' katnehek xama ekpasmeykekxa m'a ekwatnamáxchexa nak chá'a aqsok, elyepetches sa' nahan sawo ekyexwase m'a émpehek nak ekwatnamáxchexa aqsok.

³Sawo ekyexwase sa' nahan chá'a katnehek ekyókxoho aqsok kélmeykegkaxa nak chá'a m'a ekwatnamáxchexa aqsok: cham'a kélxata nak chá'a táhap agkok, tén han ma'a kélyekwe nak chá'a kólchexa', sokpayhe élyawe agkok, kelyetxaqxo apto tén han ma'a kélxata nak chá'a kólchexák átex.

⁴Elanés sa' nahan xama élyagqáxeykha ekho yám'én aqta'ák sawo ekyexwase, enegkenák sa' cuatro sawo élyaqye sawo ekyexwase m'a cuatro máséyak nak chá'a m'a sawo élyagqáxeykha ekho nak yám'én aqta'ák.

⁵Epekken sa' kóneg ekwatnamáxchexa nak aqsok sawo ekyexwase m'a sawo élyagqáxeykha ekho nak yám'én aqta'ák, yaqwayam sa' keytek yám náxet nak ma'a ekwatnamáxchexa aqsok.

⁶Elanés sa' nahan yámet élwenaqte agkok apkeñama nak wantep ma'a ekwatnamáxchexa nak aqsok, elyepetches sa' émpe'ék ma'a sawo ekyexwase nak.

⁷Elatchesek sa' nahan yámet élwenaqte m'a sawo élyaqye nak, kalyetlawhok sa' agkok nahan ma'a ánet nekhaw'ék nak ekwatnamáxchexa aqsok, yaqwayam sa' kólchegwának chá'a kólmok kólya'aksek mók nekha.

⁸Ekyagqaxe awáxok sa' nahan katnehek ma'a ekwatnamáxchexa nak aqsok tén han yántéseksek, ekhémo m'a apwet'a axta m'a egkexe nak.

⁹“Elána sa' xama kélhaxta yaqwayam kólhaxtamok nepyáwa m'a kélpakxanma appagkanamap. Apáwa apkeláxñe apkelyaqséyak nahan payhawok étek kélhaxta m'a ekpayho nak nepyeyam, apwayam nak cuarenta y cinco metros apwenaqte.

¹⁰Sawo ekyexwase sa' nahan katnehek ma'a veinte yámet élámha apagkok nak tén han ma'a veinte apowhók élyennaqtéssamakxa nak, keñe sa' ma'a sawo élhaxe apagkok nak, tén han ma'a sawo élyaqye apagkok nak katnehek ma'a sawo ekmope ekmomnáwa.

¹¹Sa' nahan katnehek ma'a ekpayho nak nexcheyha, cuarenta y cinco metros sa' nahan etnehek apwenaqte m'a apáwa, ekyetlómo m'a veinte yámet élámha apagkok tén han veinte apowhók élyennaqtéssamakxa m'a sawo ekyexwase nak, tén han ma'a sawo élhaxe apagkok nak tén han ma'a sawo élyaqye apagkok nak sawo ekmope ekmomnáwa.

¹²Keñe sa' ma'a ekpayho nak ektaxnegwánxa ekhem étek veintidós metros nepxet pók ma'a apáwa napwa'a, kélhaxta nak ma'a appayhakxa, ekyetlómo diez yámet élámha tén han diez ma'a apowhók élyennaqtéssamakxa nak.

¹³Keñe sa' ma'a ekpayho nak ekteyapmakxa ekhem ekpayhakxa m'a kélhaxta, étek sa' nahan veintidós metros nepxet pók ma'a apáwa napwa'a.

¹⁴Keñe sa' ma'a xama nekha nentaxnamakxa nak, étek sa' chá'a siete metros apáwa napwa'a, ekyetlómo ántánxo yámet élámha apagkok, tén han ántánxo apowhók élyennaqtéssamakxa;

¹⁵tén sa' nahan ma'a pók nápakha nak, étek nahan siete metros apáwa napwa'a, ekyetlómo nahan ántánxo yámet élámha apagkok tén han ántánxo m'a apowhók élyennaqtéssamakxa nak.

¹⁶Tén sa' ma'a nentaxnamakxa agko' nak kélhaxta, étek sa' nueve metros apáwa napwa'a apyápaqmate, hómáyok, apyexwase tén han ma'a apáwa apkeláxñe apkelyaqséyak nak, kéleykmassáseykha nak kélótma m'a nápakhaw'ék, ekyetlómo cuatro élámha apagkok tén han cuatro apowhók élyennaqtéssamakxa.

¹⁷Kéméxcheyk nahan chá'a kaxek sawo ekmope ekmomnáwa sawo élyaqye agkok ekyókxoho m'a yámet élámha nak neyáwa kélhaxta, tén han sawo élhaxe agkok ma'a sawo ekmope ekmomnáwa nak tén han sawo ekyexwase m'a awhók élyennaqtéssamakxa nak.

¹⁸Cuarenta y cinco metros sa' nahan chá'a katnehek ekwegqakxa m'a kélhaxta nak, tén veintidós metros náxet mók chá'a xama nekha m'a ánet nekha ekpayhakxa nak, tén ánet metros veinticinco centímetros ekmahéyák ma'a néten. Apáwa apkeláxñe apkelyaqséyak sa' eyke etnehek ma'a apáwa nak, tén sa' sawo ekyexwase m'a awhók élyennaqtéssamakxa nak.

¹⁹Ekyókxoho aqsok eyeyméxchexa nak chá'a yaqwayam kólmaha m'a kañe' kélpakxanma appagkanamap, katnehek sa' ma'a sawo ekyexwase, ekhawo nahan ma'a ekyókxoho kélnaqtete nak chá'a, tén han kélnaqtete nak chá'a m'a kélhaxta, yámet kélatchesso nak chá'a xapop.

²⁰“Yána sa' elsantagkasek israelitas pexmok égmenek ektaqmalma élánamáxche nak yámet oliva égmenek, yaqwayam sa' megkaspónhek chá'a m'a cháléwasso.

²¹Aarón tén han apketchek sa' eyke chá'a elánekxak ma'a cháléwasso, yaqwayam sa' kalápogwátek nápaqtók Wesse' egegkok yókxoho axta'a m'a kélpakxanma apchaqneykekxexa nak chá'a énxet'ák, teyp nak ma'a apáwa apkexyawe kélapma, ekyetnamakxa nak nekha m'a yántéseksek ekhémo mók nélpaqhetchásamáxkoho. Cháxa xama segánamakxa apagkok meyke néxa m'a israelitas tén han ma'a aptawán'ák neptámen nak.