Read Lengua Sur Éxodo 3 Bible Online

Éxodo 3 - Lengua Sur bible

Éxodo 3

¹Apkeláneseykha axta nepkések apnaqtósso apepyáta' m'a Moisés apwesey axta Jetró, apteme axta apkelmaxnéssesso énxet'ák apagkok ma'a yókxexma Madián. Xama ekhem axta nahan apkelya'ásekxak ma'a yókxexma meykexa nak énxet, apwákxók axta m'a Horeb, Dios egkexe apagkok nak,

²cham'a apxekmowásekpexa axta anhan xama Wesse' egegkok apchásenneykha xama táxa eyáléwe neyseksa maktek. Aptaqmelchásekxók axta nahan apkelányo Moisés ma'a, apwet'ak axta eyáléweyncha'a táxa m'a neyseksa maktek, maxta eyke kamyetak.

³Tén axta ektáha élchetama apwáxok se'e: “¡Aqsok magweteya katnehek sekwet'a! Atyánegwomhok hana, yaqsa kexa ektáha megkamyeta nak xa maktek nak.”

⁴Xama axta apwet'a Wesse' egegkok apchágketchessekmo Moisés yaqwayam elano', tén axta apwóneyncha'a m'a ekpayhókxa axta énmakxa m'a maktek. Aptáhak axta apcháneya s'e: —¡Moisés! ¡Moisés! —Tén axta aptáha apchátegmowágkokxo Moisés se'e: —Keso sénmáncha'a s'e.

⁵Tén axta aptáha apcháneya Dios se'e: —Ná épetchegwoho aqsa. Elhaxyawes sekxók apkeltéto apmagkok, hakte keso yókxexma apwa'akxa nak xép ekteme ekpagkanamaxche'.

⁶Tén axta aptáha nahan apcháneya s'e: —Ko'o sekteme Dios apagkok ma'a apyapmeyk nano' nak xeyep. Ko'o sekteme Abraham, Isaac, tén han Jacob Dios apagkok. Appóssek axta nápat ma'a Moisés, hakte apchekak axta elanok ma'a Dios.

⁷Apkelenxanakmók axta eyke aptáha apcháneya Wesse' egegkok se'e: —Naqsók agko' ko'o sekweteya ektémakxa apkellegeykegkoho énxet'ák ahagkok ma'a apheykencha'a nak Egipto. Eklegayak nahan ko'o ektémakxa apkelpaqméteykha apkelxeyenma élleklámeykegko aptamheykegkaxa m'a apkelámha apmonye'e apxegkessesso nak chá'a apkeltamheykha, ekya'ásegkók ektémakxa apkellegeykegkoho.

⁸Cháxa keñamak sekweywento nak ko'o, yaqwayam alwagkasek teyp neyseksa apkelma m'a egipcios; alántekkesek sa' ko'o s'e apkelókxa nak, alya'aksek sa' ma'a xama xapop ekyawe agko' nak tén han ektaqmalma, cham'a ényahamakxa nak weyke nagkeygmenek, tén han yányawhéna' apyegmenek ektémól'a kanyehek ma'a yegmen, cham'a apchókxa apheykegkaxa nak ma'a cananeos, hititas, amorreos, ferezeos, heveos tén han ma'a jebuseos.

⁹Elano, eklegayak ko'o apkelpaqméteykha m'a israelitas. Ekwetayak nahan ko'o apnaqtawáseykegkoho ekwányam agko' ma'a egipcios.

¹⁰Exeg sa' kaxwo', wáphaksek sa' ko'o exchep emhagkok ma'a aphakxa nak faraón yaqwayam elántekkesek Egipto m'a énxet'ák ahagkok, cham'a israelitas.

¹¹Tén axta Moisés aptáha apcháneya Dios se'e: —¿Háxko atnehek ko'o ay'ammok aphakxa faraón alántekkesek Egipto m'a israelitas? Mékoho ahagko' ko'o.

¹²Tén axta aptáha apchátegmowágkokxo Dios se'e: —Ko'o sa' atnehek sekxegexma exchep. Sa' katnehek magkenatchesso ektáha ko'o exchep seyáphasso apkelántekkesa sa' Egipto m'a énxet'ák ahagkok. Kélyókxoho sa' hélpeykeshok ko'o s'e néten egkexe nak.

¹³Apchátegmowágkokxeyk axta makham ma'a Moisés. Aptáhak axta s'e: —Ekxegkek agkok ko'o, sektáha enxoho alának israelitas se'e: ‘Eyáphássek xeyk ko'o kélnepyeseksa kéxegke m'a kélyapmeyk nano' nak Dios apagkok’ keñe sa' aptáha enxoho hélmaxneyha s'e: ¿Háxko apwesey? ¿Háxko sa' ko'o atnehek alána'?

¹⁴Tén axta Dios aptáha apchátegmowágkokxo s'e: —KO'O SEKTEME. Sa' etnehek elának israelitas se'e: ‘KO'O SEKTEME exchek ko'o seyáphasso kélnepyeseksa kéxegke.’

¹⁵Aptáhak axta anhan apcháneya Dios Moisés se'e: —Etne sa' nahan elának israelitas se'e: ‘Eyáphássek xeyk ko'o kélnepyeseksa kéxegke m'a Wesse', Dios apagkok nak ma'a kélyapmeyk nano', cham'a Abraham, Isaac, tén han ma'a Jacob nak Dios apagkok.’ Cháxa sekwesey megkatnégwayam néxa xa; sekwesey megkamassegwayam yókxoho apyeyam chá'a xa.

¹⁶Exeg, yánchásekxa sa' ma'a apkelámha apmonye'e nak Israel. Sa' etnehek elának se'e: ‘Exekmowásekpok axta ko'o m'a Wesse' egegkok, cham'a Dios apagkok axta m'a kélyapmeyk nano' axta kéxegke, cham'a Abraham, Isaac, tén han ma'a Jacob axta Dios apagkok, tén han séltennasa ko'o apkeláneykencha'a kéxegke, apxéna nahan apwetaya kélteméssessamakxa m'a Egipto.

¹⁷Éltennássek axta nahan ko'o apxéna kéxegke apmako elmallahanchesek ma'a ektémakxa nak kéllegeykegkoho m'a Egipto, apxéna elya'aksek ma'a yókxexma apagkok nak ma'a cananeos, hititas, amorreos, ferezeos, heveos, tén han ma'a jebuseos; cham'a xama xapop ényahamakxa nak weyke nagkeygmenek, tén han ma'a yányawhéna' apyegmenek ektémól'a kanyehek ma'a yegmen.’

¹⁸Elyahakxohok sa' nahan xeyep aptáhakxa m'a apkelámha apmonye'e nak; tén sa' xép exog etnehek apkelxegexma'a ey'ammok ma'a wesse' apwányam Egipto. Sa' etnehek yának se'e: ‘Enxekmowásekpok axta negko'o m'a Wesse' egegkok, aptáha nak hebreos Dios apagkok, hẽgho sa' negko'o ólmahagkok ma'a yókxexma meykexa nak énxet, cham'a ekweykmoho nak ántánxo ekhem nenxega agwomok, yaqwayam enxoho agmések negko'o aqsok kélnaqtósso ektekyawa m'a Dios Wesse' egegkok.’

¹⁹Ekya'ásegkók eyke ko'o wesse' apwányam Egipto megyohók kólántépok aqsa m'a megkólyennaqtésa enxoho kélyempe'ék.

²⁰Axekmósek sa' eyke ko'o sekmowána m'a egipcios, alnápok sa' nahan. Atekkessesek sa' nahan ekyókxoho aqsok segyegwakkassamo nak agwetak ma'a kañe' apchókxa. Keñe sa' natámen xa, yohok kólántépok ma'a wesse' apwányam faraón.

²¹Wának sa' eyke nahan ko'o kaltaqmalmakha aqsa apkelwáxok elanok israelitas ma'a egipcios, yaqwayam sa' melxeghe aqsa meyke apkelseykha m'a apkelántepa enxoho.

²²Xama kelán'a sa' nahan chá'a kalmaxnegwók mók aqsok ma'a ektáhakxa nak chá'a ketók axagkok, essenhan ma'a mók kelán'a ekha nak chá'a xamo', kagkések ma'a aqsok élmomnáwa, cham'a sawo ekmope élmomnáwa nak, tén han ma'a sawo ekyátekto élmomnáwa nak, tén han ma'a apáwa, yaqwayam sa' kólántaxneyásekxak kéxegke m'a kélketchek, kólsawhaksohok sa' aqsok apagkok ekyetnakxa enxoho kéxegke m'a egipcios.