Read Lengua Sur Éxodo 30 Bible Online

Éxodo 30 - Lengua Sur bible

Éxodo 30

¹“Elána sa' nahan xama ekwatnamáxchexa aqsok yámet apkeñama nak wantep, yaqwayam sa' kólwatnek chá'a m'a aqsok ekmátsa nak ekpaqneyam éten agkok.

²Ekhémo mók nekhaw'ék sa' etnéssesek, ekwayam nak cuarenta y cinco centímetros ma'a ekwegqakxa tén cuarenta y cinco centímetros ma'a ekpayhakxa, keñe sa' noventa centímetros ekmahéyak ma'a néten, xama ekpasmeykekxa sa' nahan katnekxak ekyókxoho ekwatnamáxchexa nak aqsok ma'a élámha élmahamtakcha'a nak ekhéyak nekhaw'ék.

³Elyepetches sa' nahan sawo ekyátekto agko' ma'a néten nak tén han ma'a cuatro nekhaw'ék nak tén han ma'a élámha élmahamtakcha'a nak, epekken sa' nahan ekpayhe étkok ekwenaqte sawo ekyátekto ekmomnáwa m'a nekhaw'ék nak.

⁴Enegkenches sa' nahan sawo élyaqye sawo ekyátekto ekmomnáwa m'a kóneg nak ekpéwa étkok kélyetlókasso m'a nekhaw'ék nak, ánet sa' chá'a m'a xama nekha nak máséyak, tén sa' ánet nahan ma'a mók nekha nak máséyak, yaqwayam sa' kólatchesek ma'a yámet élwenaqte kélmeykegkaxa nak chá'a kólmekxa kólya'aksek mók nekha.

⁵Elanés sa' yámet élwenaqte agkok ma'a yámet apkeñama nak wantep, elyepetches sa' nahan émpe'ék ma'a sawo ekyátekto ekmomnáwa.

⁶Epekken sa' ekwatnamáxchexa aqsok ma'a halep nak apáwa apkexyawe kélapma m'a yántéseksek ekhémo mók nélpaqhetchásamáxkoho, amonye' nak ma'a átog kélapma, cham'a yaqwánxa sa' chá'a ótak xeyep.

⁷Ewatnek sa' chá'a Aarón yókxoho axto'ók aqsok ekmátsa nak ekpaqneyam éten agkok xa néten nak ekwatnamáxchexa aqsok, cham'a ekweykenxal'a chá'a elánekxak ma'a cháléwasso,

⁸tén sa' nahan ma'a amonyel'a ektaxno ekhem, ekweykenxal'a elápogwatchásekxak ma'a cháléwasso, ewatnekxak makham. Sa' hélteméssesek chá'a nahaqtók, ko'o sektáha nak Wesse' kélagkok yókxoho apyeyam megkatnégwayam néxa' xa ektáha nak.

⁹Ná epekkenwom aqsa mók aqsok ekmátsa nak ekpaqneyam éten agkok xa néten nak ekwatnamáxchexa aqsok, tén han ma'a aqsok kéltósso ekwatnamáxche nak, tén han ma'a aqsok sélmésso naqsa nak ko'o hótáhap apaktek, tén han ma'a anmen yámet égmenek kélyegkenma nak néten sélmésso naqsa.

¹⁰Katnehek sa' ekpagkanchásamáxche agko' ko'o xa ekwatnamáxchexa nak aqsok, ko'o sektáha nak Wesse' kélagkok, xama apkeltexnagweykekxa sa' chá'a etnehek Aarón kéltósso ekmatñá éma agkok xama apyeyam ma'a élámha élmahamtakcha'a nak nekhaw'ék ma'a ekwatnamáxchexa aqsok, yaqwayam sa' megkólyaqmagkásekxeyk chá'a m'a kéltémakxa nak megkólya'assáxma.”

¹¹Appaqhetchessek axta Wesse' egegkok Moisés, aptáhak axta apcháneya s'e:

¹²“Apkelyetsátekxeyk sa' agkok apwánxa israelitas, hegkések sa' chá'a ko'o ekyánmaga ekyaqmageykekxa m'a apyókxa nak, ko'o sektáha nak Wesse' kélagkok, yaqwayam sa' megkatyepek xama enxoho apkellegeykegkoho ekmaso neyseksa kélyetsáteykekxa.

¹³Cinco gramos sawo ekmope ekmomnáwa sa' nahan chá'a hélmések ma'a eknaqtáxésamaxche nak chá'a apkelwesey kélyetsáteykekxa, ko'o sektáha nak Wesse' kélagkok, cham'a ekweykenxa nak chá'a náxet ekyentaxno kélmeykha m'a kélpakxanma appagkanamap.

¹⁴Apyókxoho kélyetsáteykekxa nak chá'a apwayam veinte apyeyam apagkok tén han néten, hegkések sa' chá'a xa aqsok apmésso naqsa nak ekyaqmageykekxa m'a apyókxa, ko'o sektáha nak Wesse' kélagkok.

¹⁵Egkéssek sa' agkok chá'a xama ekyaqmageykekxa m'a apyókxa, ko'o sektáha nak Wesse' apagkok, meyeykhássamók sa' nahan apyánmagkasso cinco gramos sawo ekmope ekmomnáwa m'a énxet ekxákma nak aqsok apagkok, keñe sa' nahan ma'a énxet meyke nak aqsok apagkok, mopwanchek sa' eyánmagkasek kóneg xa cinco gramos nak sawo ekmope ekmomnáwa.

¹⁶Yánchásekxak sa' ma'a sawo ekmope ekmomnáwa apkelyánmagkasso nak ekyaqmageykekxa apyókxa m'a israelitas, tén sa' egkések yaqwayam chá'a kólmaha élánamáxche apchaqneykekxa m'a kélpakxanma apchaqneykekxexa nak chá'a énxet'ák. Sa' etnehek xa ektáha nak, yaqwayam sa' kaxénwakxohok chá'a ko'o ewáxok ma'a israelitas, ko'o sektáha nak Wesse' kélagkok, eñama apmésso ekyánmaga ekyaqmageykekxa m'a apyókxa.”

¹⁷Appaqhetchessek axta Wesse' egegkok Moisés. Aptáhak axta apcháneya s'e:

¹⁸“Elána sa' xama sokpayhe ekwányam sawo ekyexwase, ekyetlómo awhak ekyennaqtéssamakxa ekhawo nahan ma'a sawo ekyexwase, yaqwayam sa' kóltéhek chá'a kélyenyessamakxa kélmék tén han kélmagkok; epekken sa' ma'a apmonye' nak kélpakxanma apchaqneykekxexa nak chá'a énxet'ák teyp nak ekyetnamakxa m'a ekwatnamáxchexa aqsok, eyátem sa' nahan yegmen.

¹⁹Sa' chá'a eyáwak yegmen yaqwayam elyenyeksek apmék tén han apmagkok Aarón yetlo apketchek ma'a.

²⁰Sa' eyke elyenyesagkok chá'a m'a apkelántaxna enxoho m'a kélpakxanma apchaqneykekxexa nak chá'a énxet'ák, tén han ma'a apkelyepetchegwákxoho enxoho chá'a m'a ekwatnamáxchexa nak aqsok yaqwayam elának apkeltamheykha tén han hesantagkasek ma'a aqsok sélmésso naqsa ekwatnamáxche nak, ko'o sektáha nak Wesse' kélagkok. Tén sa' meletsephe'.

²¹Kéméxcheyk chá'a elyenyesagkok apmék tén han apmagkok yaqwayam enxoho meletsephe'. Katnehek sa' xama segánamakxa meyke néxa apagkok ma'a Aarón tén han ma'a aptawán'ák neptámen nak yókxoho apyeyam chá'a.”

²²Appaqhetchessek axta Wesse' egegkok Moisés. Aptáhak axta apcháneya s'e:

²³“Elyésha sa' apagko' xép ma'a yámet éltaqmalma élmátsa nak élpaqneyam: seis kilos sa' ma'a mirra agye' ektaqmalma, tén sa' ántánxo kilos ma'a canela, tén sa' ántánxo kilos ma'a yámpa'at;

²⁴tén sa' seis kilos nahan ma'a yámet casia émpe'ék, ekhawo nak ekyentaxno kelyetsátéyak kélmeykha nak chá'a m'a kélpakxanma appagkanamap tén sa' ántánxo litros náxet mók ma'a oliva pexmok égmenek agkok nak.

²⁵Elána sa' pexmok égmenek ekpagkanamaxche kélexpaqhayól'a chá'a kólteméssesek appagkanamap énxet xa ekyókxoho nak, aptémól'a énxet apkeláneyo nak chá'a sokmátsa elának ma'a sokmátsa apagkok. Sa' katnehek pexmok égmenek ekpagkanamaxche kélmeykegko nak chá'a kólteméssesek appagkanamap énxet xa.

²⁶Yexpaqhak sa' ma'a néten nak kélpakxanma apchaqneykekxexa nak chá'a énxet'ák, tén han ma'a yántéseksek ekhémo mók nélpaqhetchásamáxkoho,

²⁷tén han ma'a mésa nak yetlo m'a ekyókxoho aqsok élmeykegkaxa nak chá'a, tén han ma'a cháléwasso ekyawe yetlo nahan ma'a ekyókxoho aqsok élmeykegkaxa nak, tén han ma'a ekwatnamáxchexa nak aqsok ekmátsa nak ekpaqneyam éten agkok,

²⁸tén han ma'a ekwatnamáxchexa nak chá'a aqsok kéltósso yetlo nahan ma'a ekyókxoho aqsok élmeykegkaxa nak, tén han ma'a sokpayhe ekwányam ekyetlómo m'a awhak ekpayhe ekyennaqtéssamakxa nak.

²⁹Keñe sa' etnéssesek élpagkanamaxche' xa, katnahagkok sa' nahan aqsok élpagkanamaxche agko'; ekyókxoho aqsok ektamhomaxkoho enxoho xa, katnehek sa' ekpagkanamaxche'.

³⁰“Yexpaqha sa' nahan Aarón tén han apketchek xa pexmok égmenek nak, yaqwayam sa' elpagkanakpok etnahagkok apkelmaxnéssesso énxet'ák ahagkok.

³¹Etne sa' nahan elának israelitas se'e: ‘Katnehek sa' chá'a pexmok égmenek ahagkok ektaqmalma kélyegkenchessamo nak chá'a apqátek énxet kólteméssesek appagkanamap meyke néxa xa.

³²Nágkólexpaqha aqsa chá'a pók énxet enxoho xa, cham'a metnaha enxoho chá'a yaqwayam kólteméssesek appagkanamap, nágkóllána nahan mók ekhémo enxoho xa pexmok égmenek nak. Pexmok égmenek ekpagkanamaxche ekteme xa, kéméxcheyk chá'a kólteméssesek aqsok ekpagkanamaxche'.

³³Apkelanak sa' agkok xama énxet ekhémo xa pexmok égmenek nak, essenhan apkexpaqha'a enxoho aqsa m'a énxet metnaha nak yaqwayam kólteméssesek appagkanamap, kóltekkesek sa' nepyeseksa m'a énxet'ák apagkok.’”

³⁴Aptáhak axta Wesse' egegkok apcháneya Moisés se'e: “Exnésho sa' nahan ekwánxa exchek aptegye aqsok élmátsa nak élpaqneyam se'e mók aqsok élmátsa nak élpaqneyam: yámet agye', aqsok aphék ekmátsa nak ekpaqneyam, tén han ma'a aqsok ekmátsa nak ekpaqneyam éten agkok, tén han ma'a yámet gálbano agye' ekmátsa nak ekpaqneyam.

³⁵Elána sa' xama aqsok ekmátsa agko' ekpaqneyam éten agkok xa, tén han ekpagkanamaxche', etaqmelcheshok sa' apkencheheykekxa mók ma'a ekyókxoho nak, aptémól'a elának sokmátsa apagkok ma'a énxet apkeláneyól'a sokmátsa.

³⁶Etnésses sa' ánek agko' etekxók ma'a nekha nak, epekken sa' ma'a amonye' nak yántéseksek ekhémo mók nélpaqhetchasamáxkoho, cham'a kélpakxanma apchaqneykekxexa nak chá'a énxet'ák, yaqwánxa sa' chá'a ko'o ótak xeyep. Ekpagkanamaxche agkók sa' katnehek xa aqsok ekmátsa nak ekpaqneyam éten agkok, kélagkok kéxegke,

³⁷megkéméxchek nahan elának mók aqsok ekmátsa nak ekpaqneyam éten agkok yaqwayam etnehek apmeykha exchep, ekhawo nak xa apkelana nak, hakte ko'o ahagkok xa, sektáha nak Wesse' kélagkok. Xama aqsok ekpagkanamaxche sa' etnéssesek xeyep.

³⁸Énxet ektáhakxa enxoho apkelane ekhémo xa aqsok ekmátsa nak ekpaqneyam éten agkok yaqwayam etnehek apmeykha, kóltekkesek sa' nepyeseksa m'a énxet'ák apagkok.”