Read Lengua Sur Éxodo 31 Bible Online

Éxodo 31 - Lengua Sur bible

Éxodo 31

¹Appaqhetchessek axta Wesse' egegkok Moisés. Aptáhak axta apcháneya s'e:

²“Élyésáha ko'o nepyeseksa Judá énxet'ák apagkok ma'a Besalel, apketche nak ma'a Urí, aptáwen nak ma'a Hur,

³eklánessásawók nahan ko'o apwáxok ma'a sekmowána, tén han ma'a apya'áseyák nak, tén han ma'a apya'áseykegkoho nak, tén han ma'a apyekpelchémo nak tén han ma'a apmopwána nak elának ma'a aqsok,

⁴yaqwayam enxoho elának ma'a aqsok kéleykmássesso tén han ma'a nentamheykha nak nenlane m'a sawo ekyátekto ekmomnáwa, sawo ekmope ekmomnáwa tén han ma'a sawo ekyexwase,

⁵tén han yaqwayam eltekpog elyepetchesek ma'a meteymog éltaqmalma nak, tén han yaqwayam eltekpog ma'a yántéseksek tén han elának ma'a mók ektémakxa nak chá'a aptamheykha apmopwána eleykmássesha.

⁶Ekteméssessek nahan ko'o appasmeykha aptamheykha m'a Oholiab, apketche nak ma'a Ahisamac, apkeñama nak nepyeseksa m'a Dan énxet'ák apagkok. Ekméssek nahan ko'o néten apkelya'áseyak ma'a énxet apmopwancha'a nak chá'a aqsok, yaqwayam sa' elanagkok ekyókxoho m'a séltamhókxa enxoho chá'a ko'o elanagkok:

⁷cham'a kélpakxanma apchaqneykekxexa nak chá'a énxet'ák, tén han ma'a yántéseksek ekhémo mók nélpaqhetchásamáxkoho, tén han ma'a átog ekyetno nak néten ma'a yántéseksek, tén han ma'a ekyókxoho aqsok kélmeykegkaxa nak chá'a m'a kañe' kélpakxanma.

⁸Tén han ma'a mésa, yetlo m'a aqsok élmeykegkaxa nak chá'a, tén han ma'a cháléwasso ekyawe sawo ekyátekto agko' nak, yetlo nahan ma'a aqsok élmeykegkaxa nak chá'a, tén han ma'a ekwatnamáxchexa nak chá'a aqsok ekmátsa agko' la'a ekpaqneyam éten agkok,

⁹tén han ma'a ekwatnamáxchexa nak chá'a aqsok kéltósso, yetlo nahan ma'a aqsok élmeykegkaxa nak chá'a, tén han ma'a sokpayhe ekwányam yetlo m'a awhak ekpayhe ekyennaqtéssamakxa nak,

¹⁰tén han ma'a apáwa kélótma, apkelántaxno apkeltaqmalma nak ma'a apkelmaxnéssesso énxet'ák ahagkok Aarón tén han ma'a apkelántaxno nak ma'a apketchek apkenchesso chá'a m'a apkeltamheyncha'a enxoho elmaxnéssesek ma'a énxet'ák ahagkok,

¹¹tén han ma'a pexmok égmenek kélexpaqhayól'a kólteméssesek appagkanamap énxet tén han ma'a aqsok ekmátsa nak ekpaqneyam éten agkok yaqwayam nak kólmaha m'a kañe' kélpakxanma appagkanamap. Elanagkok sa' ekyókxoho m'a, séltamhókxa axta ko'o etnehek xeyep.”

¹²Appaqhetchessek axta Wesse' egegkok Moisés. Aptáhak axta apcháneya s'e:

¹³“Elpaqhetches sa' xeyep apagko' ma'a israelitas; etne sa' elának se'e: ‘Kólteme chá'a kéláyo ekhem ahagkok sábado, hakte cháxa ekteme aqsok magkenatchesso kélnepyeseksa kéxegke xa tén han ko'o xa megkatnégwayam néxa, yaqwayam enxoho kólya'asagkohok ko'o, sektáha nak Wesse', sélyéseykencha'a kéxegke.

¹⁴Ekhem ekpagkanamaxche kélagkok sa' kóltéhek kéxegke m'a sábado, kólteme sa' chá'a kéláyo. Énxet ektáhakxa enxoho megyáyo xa ekhem nak, ematñekxak sa'. Keñe nahan énxet aptamheykha enxoho xa ekhem nak, kóltekkesek sa' nepyeseksa m'a aphawóxama.

¹⁵Apwanchek sa' eyke etneykha chá'a énxet ekweykmoho seis ekhem, keñe sa' ma'a ekhem siete, katnehek sa' ekhem néllókassamakxa nélyampe sélpagkanchessamakxa ko'o, sektáha nak Wesse' kélagkok. Apyókxoho énxet ektáhakxa enxoho aptamheykha ekhem sábado, ematñekxak sa'.’

¹⁶Apcháyo sa' chá'a etnehek israelitas ma'a élánamáxchexa nak chá'a néllókasso nélyampe ekhem sábado, ektémól'a m'a ekhémo mók nélpaqhetchasamáxkoho meyke néxa yókxoho apyeyam chá'a.

¹⁷Katnehek sa' xama aqsok magkenatchesso ekpekkenamaxche nepyeseksa israelitas tén han ko'o xa.” Hakte seis ekhem axta weykmok ko'o sélane m'a néten tén han keso náxop, ko'o sektáha nak Wesse' kélagkok, keñe ekhem siete sélwátéssama sektamheykha, séllókassama sekyampe.

¹⁸Xama axta apsawha appaqhetchesso Wesse' egegkok Moisés ma'a néten egkexe nak Sinaí, apkelméssek axta ánet meteymog élpayhe apnaqtáxésso apagko' axta segánamakxa m'a Dios.