Read Lengua Sur Éxodo 40 Bible Online

Éxodo 40 - Lengua Sur bible

Éxodo 40

¹Appaqhetchessek axta Wesse' egegkok Moisés, aptáhak axta apcháneya s'e:

²“Exátekhes sa' kélpakxanma appagkanamap, cham'a kélpakxanma apchaqneykekxexa nak chá'a énxet'ák, émha amonye' ekhem pelten apkemha apmonye' nak.

³Epekken sa' yántéseksek ekhémo mók nélpaqhetchesamaxkoho m'a kañe' nak, yáhap sa' ma'a apáwa kélapma nak.

⁴Epekken sa' nahan mésa tén han cháléwasso ekyawe m'a kañe' nak. Etaqmelchesho sa' nahan apkeláneykekxa m'a mésa nak. Elatchesses sa' nahan cháléwasso étkók agkok ma'a cháléwasso ekyawe nak.

⁵Epekken sa' ekwatnamáxchexa nak chá'a aqsok élánamáxche nak sawo ekyátekto ekmomnáwa yaqwayam nak chá'a kawatnaxchek aqsok ekmátsa ekpaqneyam éten agkok ma'a amonye' nak yántéseksek ekhémo mók nélpaqhetchesamaxkoho, emakhésha sa' nahan apáwa m'a átog nentaxnamakxa nak kélpakxanma appagkanamap.

⁶Epekken sa' ekwatnamáxchexa nak chá'a aqsok kéltósso m'a átog nentaxnamakxa nak kélpakxanma appagkanamap, cham'a kélpakxanma apchaqneykekxexa nak chá'a énxet'ák.

⁷Keñe sa' epekkenek sokpayhe ekwányam ma'a halep nak kélpakxanma apchaqneykekxexa nak chá'a énxet'ák, teyp nak ma'a ekwatnamáxchexa nak chá'a aqsok, eyátem sa' nahan yegmen.

⁸Tén sa' elának aphaxta nepyáwa m'a kélpakxanma nak, emakhésha sa' apáwa m'a átog nentaxnamakxa nak ma'a kélhaxta.

⁹“Keñe sa' emok ma'a pexmok égmenek kélexpaqhayól'a kólteméssesek appagkanamap énxet, eyegken sa' ma'a néten nak kélpakxanma appagkanamap, tén han ma'a ekyókxoho aqsok ekhágko nak ma'a kañe'. Keñe sa' etnéssesek xép appagkanamap yetlo m'a ekyókxoho aqsok kélmeykegkaxa nak chá'a, katnehek sa' kañe' ekpagkanamaxchexa agko'.

¹⁰Eyegken sa' nahan pexmok égmenek kélexpaqhayól'a chá'a kólteméssesek ekpagkanamaxche aqsok ma'a néten nak ekwatnamáxchexa aqsok kéltósso tén han ma'a ekyókxoho aqsok élmeykegkaxa nak chá'a. Keñe sa' etnéssesek élpagkanamaxche m'a, katnehek sa' nahan xama ekwatnamáxchexa aqsok kéltósso ekpagkanamaxche agko'.

¹¹Eyegken sa' nahan pexmok égmenek ma'a néten nak sokpayhe ekwányam tén han ma'a awhak ekpayhe ekyennaqtéssamakxa nak, keñe sa' etnéssesek nahan élpagkanamaxche m'a.

¹²“Keñe sa' natámen eyentamok Aarón tén han apketchek ma'a nekha átog nak kélpakxanma apchaqneykekxexa nak chá'a énxet'ák, yána sa' eyaqpasagkok yegmen,

¹³tén sa' Aarón elántaxnekxak ma'a apkelántaxno apkeltaqmalma nak. Eyegkenches sa' apqátek ma'a pexmok égmenek yaqwayam sa' etnéssesek appagkanamap yaqwayam etnehek apkelmaxnéssesso énxet'ák ahagkok.

¹⁴Yának sa' nahan elyepetchegwohok ma'a apketchek nak, elántaxneyásekxa sa' ma'a apkelántaxno apkelwenaqte nak,

¹⁵elexpaqhássesák sa' nahan apqatkok ma'a pexmok égmenek, ekhawo apteméssesakxa exchek ma'a Aarón, yaqwayam sa' etnahagkok apkelmaxnéssesso énxet'ák ahagkok. Cháxa aptamhágko kaxwók apkelmaxnéssesso énxet'ák ahagkok meyke néxa yókxoho apyeyam chá'a xa, kélexpaqhassásegko nak apqatkok ma'a pexmok égmenek.”

¹⁶Apkelanak axta Moisés ekyókxoho m'a apkeltamhókxa axta etnehek ma'a Wesse' egegkok.

¹⁷Apkelánékpek axta kélpakxanma appagkanamap ektáha axta apqánet apyeyam élántépomáxche m'a Egipto, sekxók eyeynókxa axta ekxega émha amonye' ekhem ma'a apkemha apmonye' pelten.

¹⁸Apxátekhássek axta Moisés ma'a kélpakxanma appagkanamap, apnegkenchásegkek axta m'a apowhók élyennaqtéssamakxa nak, apnegkenágkek axta nahan ma'a yántéseksa'ák nak, apkelchexnágkek axta nahan ma'a yámet élwenaqte éltegyésso nak, apkelánchásegkek axta nahan ma'a yámet élámha nak,

¹⁹appeykessek axta nahan kélpakxanma m'a néten nak kélpakxanma appagkanamap, apkexneyk axta nahan kélpakxanma éxyawe nak yaqwayam keytek ma'a néten nak kélpakxanma, ekhawo m'a apkeltémókxa axta etnehek ma'a Wesse' egegkok.

²⁰Keñe axta Moisés apkelwákxo m'a meteymog eknaqtáxésamaxche axta segánamakxa, apxatmeyk axta m'a kañe' yántéseksek ekhémo mók nélpaqhetchásamáxkoho; tén axta apkelatchessesa nahan yámet élwenaqte agkok ma'a yántéseksek nak, tén han ma'a átog nak yaqwayam keytek ma'a néten, apsókek axta m'a kañe' kélpakxanma appagkanamap; apmakheyáseyha axta nahan ma'a apáwa kélapma nak, apcháhakkassek axta m'a yántéseksek, ekhawo m'a apkeltémókxa axta etnehek ma'a Wesse' egegkok.

²²Tén axta appekkena mésa m'a kañe' kélpakxanma apchaqneykekxexa nak chá'a énxet'ák, ekpayho nak nexcheyha kañe' m'a kélpakxanma appagkanamap, halep axta m'a apáwa kélapma.

²³Aptaqmelchásawók axta nahan apnegkenma kelpasmaga nápaqtók Wesse' egegkok ma'a néten mésa nak, ekhawo m'a apkeltémókxa axta etnehek ma'a Wesse' egegkok.

²⁴Appekkenchek axta nahan cháléwasso ekyawe m'a kañe' nak kélpakxanma apchaqneykekxexa nak chá'a énxet'ák, amonye' nak ma'a mésa, ekpayho nak nepyeyam kañe' m'a kélpakxanma appagkanamap,

²⁵apkelápogwatchessek axta nahan cháléwasso nápaqtók Wesse' egegkok, ekhawo m'a apkeltémókxa axta etnehek ma'a Wesse' egegkok.

²⁶Appekkenchek axta ekwatnamáxchexa aqsok élánamáxche nak sawo ekyátekto ekmomnáwa m'a kañe' kélpakxanma apchaqneykekxexa nak chá'a énxet'ák, halep nak ma'a apáwa kélapma,

²⁷tén axta apwatna aqsok ekmátsa nak ekpaqneyam éten agkok ma'a néten nak, ekhawo m'a apkeltémókxa axta etnehek ma'a Wesse' egegkok.

²⁸Tén axta Moisés apmakheyáseyncha'a apáwa yaqwayam nak kólpekkenek ma'a átog nentaxnamakxa nak kélpakxanma appagkanamap;

²⁹appekkenchek axta nahan élwatnamáxchexa nak chá'a aqsok kélnaqtósso m'a átog nentaxnamakxa nak kélpakxanma appagkanamap, cham'a kélpakxanma apchaqneykekxexa nak chá'a énxet'ák, apkelwatneyk axta nahan aqsok kélnaqtósso tén han aqsok aktek eknakxamáxche ekyexna m'a néten nak yaqwayam etnéssesek aqsok apmésso naqsa m'a Dios, ekhawo m'a apkeltémókxa axta etnehek ma'a Wesse' egegkok.

³⁰Tén axta m'a sokpayhe ekwányam nak appekkena m'a halep nak kélpakxanma apchaqneykekxexa nak chá'a énxet'ák, teyp nak ma'a ekwatnamáxchexa aqsok, apyetmeyk axta nahan yegmen, yaqwayam enxoho elyenyeksek chá'a apyempe'ék.

³¹Axta eyáwak chá'a yegmen Moisés tén han Aarón ekweykekxoho apketchek, yaqwayam elyenyesagkok chá'a apmék tén han apmagkok ma'a.

³²Elyenyesagkok axta chá'a apyempe'ék apkelántaxna enxoho chá'a m'a kélpakxanma apchaqneykekxexa nak chá'a énxet'ák, tén han apchaqnágweykxo enxoho chá'a m'a nekha nak ekwatnamáxchexa aqsok, ekhawo m'a apkeltémókxa axta etnehek Wesse' egegkok ma'a Moisés.

³³Appenchessek axta aphaxtegkesso nepyáwa kélpakxanma appagkanamap ma'a Moisés tén han ma'a ekwatnamáxchexa nak chá'a aqsok, apmakheyáseyha axta nahan apáwa m'a átog nentaxnamakxa nak kélhaxta. Xama axta appenchesa aptamheykha apkelane kélpakxanma m'a Moisés,

³⁴cháhapwa'ak axta yaphope m'a kélpakxanma apchaqneykekxexa nak chá'a énxet'ák, lanawók axta Wesse' egegkok élseyéxma apagkok ma'a kañe' kélpakxanma appagkanamap.

³⁵Mopwanchek axta apmako etxek Moisés ma'a kañe' kélpakxanma apchaqneykekxexa nak chá'a énxet'ák, hakte yetna'ak axta yaphope m'a néten nak tén han eklanawo Wesse' egegkok élseyéxma apagkok ma'a kañe' kélpakxanma appagkanamap.

³⁶Xama axta ekmeyákxo enxoho chá'a néten, ekmassa enxoho chá'a ekyetno néten kélpakxanma appagkanamap ma'a yaphope nak, keytlawhok axta chá'a apkelhaxyawáseyak apkelpakxenéyak israelitas, tén axta elxegekxak chá'a.

³⁷Keñe axta megkamyákxo enxoho chá'a néten ma'a yaphope nak, melhaxyawasagkek axta chá'a m'a apkelpakxenéyak nak, elhaxnagkok axta aqsa chá'a ekwokmoho ekmeyákxo néten ma'a yaphope nak.

³⁸Keytek axta chá'a néten kélpakxanma appagkanamap Wesse' egegkok yaphope apagkok ekhem agko', yókxoho apkelxega m'a israelitas, elwetak axta chá'a m'a apyókxoho nak, tén axta chá'a axta'a keytek néten ma'a táxa eyáléwe.