Read Lengua Sur Éxodo 5 Bible Online

Éxodo 5 - Lengua Sur bible

Éxodo 5

¹Keñe axta natámen xa, apyo'ókmek axta Moisés tén han Aarón peya etnehek yának faraón se'e: —Keso aptáhakxa exchek appeywa apcháphássesso Wesse' egegkok aptáha nak Israel Dios apagkok se'e: ‘Yoho elmahagkok énxet'ák ahagkok ma'a yókxexma meykexa nak énxet, yaqwayam sa' elanagkok apkelsawássessamo eñama mehélwagqayam ko'o.’

²Keñe axta faraón aptáha apchátegmowágkokxo s'e: —¿Yaqsa Wesse' m'a apkeltamho nak ko'o alyahakxoho' tén han apkeltamho nak han wohok elántépok ma'a israelitas? Mateyk ko'o m'a Wesse' nak, magwohok nahan ko'o elxog ma'a israelitas.

³Tén axta aptáha apcháneya Moisés tén han Aarón: —Egya'awak xeyk negko'o senxekmowáseykpoho m'a aptáha nak hebreos Dios apagkok, ólmahagkok sa' negko'o kaxwók ma'a yókxexma meykexa nak énxet, cham'a ekweykmoho nak ántánxo ekhem nenxega agwomok, yaqwayam sa' agmések negko'o kélnaqtósso ektekyawa m'a Dios Wesse' egegkok, hakte heghekxak kexa katnehek negko'o eltamhok hẽlnápok ma'a negmasse ekmaso nak, essenhan ma'a sókwenaqte nak.

⁴Keñe axta wesse' apwányam Egipto aptáha apkeláneya s'e: —Moisés, Aarón, ¿yaqsa ektáha kélyétekkessessekmo nak apkeltamheykha énxet'ák? ¡kóltaqhoho', kóltemeykha makham!

⁵Aptáhak axta anhan apkeláneya faraón se'e: —Apxámók apagko' nahan kaxwók israelitas apheykha s'e seyókxa nak. ¿Kéltamhók enxeykel'a kéxegke kólwátéssesagkok apkeltamheykha?

⁶Apkelpaqhetchessek axta nahan faraón énxet'ák ektáha axta chá'a apxegkessesso apkeltamheykha xa ekhem nak, tén han ma'a apkelámha apmonye'e axta chá'a nepyeseksa m'a apkelxegexma. Aptáhak axta apkeláneya s'e:

⁷—Nágkólmés aqsa kaxwók pa'at apák ma'a israelitas yaqwayam elanagkok yátaphémekcha'ák apwetek, kélteméssessamakxa nak chá'a kélméssama. ¡Etegyagkohok sa' apagkok kaxwók ma'a!

⁸Kólána sa' eyke exnéshok chá'a apkelánéyák yátaphémekcha'ák apwetek ma'a apweykenxa axta chá'a apxámokma apkelánéyák, meyke apweweykenta'. Hakte mopmenyék chá'a eltemeykha xa. Neykhe keñamak aptéma nak chá'a apkelpaqmeyesma ekyennaqte s'e: ‘¡Ólxog heykxe agmések aqsok ektekyawa m'a Dios egagkok!’

⁹Kólmés sa' néten agko' ekyentaxno apkeltamheykha xa énxet'ák nak. Nágkólmes aqsa yaqwayam ellókasek apkelyampe, yaqwayam sa' meleyxók ma'a amya'a ekmowána amya'a nak.

¹⁰Apkelántekkek axta m'a énxet'ák apxegkessesso axta chá'a apkeltamheykha tén han ma'a apkelámha apmonye'e axta chá'a nepyeseksa apnámakkok apyo'ókmo m'a énxet'ák. Aptáhak axta apkeláneya s'e: —Apkeltamhók xeyk megkólméshek kaxwók kéxegke pa'at apák ma'a faraón.

¹¹Kéxegke kélagko' sa' kaxwók kólxog kóltegyek ma'a ekyetnamakxa nak. Kólhéshok sa' eyke nahan chá'a kélláneyak yátaphémekcha'ák apwetek ma'a apweykenxa axta chá'a apxámokma kélláneyak, meyke kélweykáseykenta'.

¹²Appayhekxeyk axta israelitas ma'a ekyókxoho kañe' Egipto apkelchetama ekpayhókxa ekyetnamakxa m'a pa'at apák, yaqwayam enxoho etnehek apkelmeykha.

¹³Yókxoho ekhem axta apkelyáteyeykegkoho faraón énxet'ák apagkok ektáha axta chá'a apxegkessesso apkeltamheykha apkeltémo exnéshok apxámokma apkelánéyák yátaphémekcha'ák apwetek ma'a apweykenxa axta chá'a apkelánéyák apkelméssamakxa axta m'a pa'at apák. Apkelyekpexcheteykegkek axta nahan chá'a m'a apkelámha apmonye'e apagkok axta m'a israelitas. Axta etnehek nahan chá'a elának se'e: —¿Háxko ektáhakxa kéxegke sakhem tén han hemaxta megkólhéssákxoho nak kéllánéyak yátaphémekcha'ák apwetek ma'a apweykenxa axta chá'a apxámokma kéllánéyak?

¹⁵Keñe m'a apkelámha apmonye'e apagkok axta m'a israelitas, apkelxegkek axta appaqhetchessákxo m'a faraón. Aptáhak axta apcháneya s'e: —¿Yaqsa ektáha senteméssesa nak negko'o, nentáha nak xeyep apkeláneykha s'e ektáha nak, wesse'?

¹⁶Massék nahan sẽlmeyásegko m'a pa'at apák nak, ẽlyáteyágkók aqsa chá'a apkeltamho anlanagkok ma'a yátaphémekcha'ák apwetek, ẽlyekpexchetágkek nahan chá'a. ¡Xeyep énxet'ák apagkok keñamak aptamhéyak xa, wesse'!

¹⁷Aptáhak axta apchátegmowágkokxo faraón se'e: —¡Megkólmenyeyk eyke chá'a kéxegke kóltemeykha! Cháxa keñamak kéltéma nak chá'a kélpaqméteykencha'a s'e: ‘Ólxog heykxe agmések kélnaqtósso ektekyawa m'a Wesse' egegkok.’

¹⁸¡Kóltaqhoho makham, kóltemeykha! Kamaskok sa' eykhe kólxawagkok ma'a pa'at apák nak, kólhéshok sa' eyke chá'a kélchexeykekxa yátaphémekcha'ák apwetek ma'a apweykenxa axta chá'a apxámokma kéllánéyak.

¹⁹Kelyetnakha'awók axta apkelwáxok apkelámha apmonye'e israelitas kéltennasa megyáneyákpo chá'a mexnésók apkelánéyak yátaphémekcha'ák apwetek ma'a apweykenxa axta chá'a apkelánéyak yókxoho ekhem, hakte kelápagqánexkók axta apkelwáxok.

²⁰Xama axta apkelántepa natámen apkelpaqhetchásamákpoho m'a faraón, apkelwet'ak axta apchaqnáncha'a Moisés tén han Aarón apkelhaxna.

²¹Aptáhak axta apkeláneya s'e: —Wesse' egegkok sa' étak aqsok kéllánéyak kéxegke, tén sa' ellegássesagkoho'. Kéxegke keñamak sẽltaqnaweykegko negko'o m'a faraón tén han ma'a apkeláneykha nak. Kéxegke kélagko' nahan kélmeyásegkok sókwenaqte yaqwayam negko'o hẽlnápok.

²²Tén axta Moisés aptáha apcháneya Wesse' egegkok apkelmaxnagko s'e: —Wesse' ahagkok, ¿yaqsa ektéma apkellegassáseykegkoho nak xép se'e énxet'ák nak? ¿Yaqsa axta ektéma seyáphassama?

²³Apyánchessekmók axta aqsa nahan apnaqtawáseykegkoho faraón, énxet'ák apagkok ma'a sekxók axta sekyo'ókmo séltennássekmo m'a aptémakxa appeywa, keñe exchep méko apkelana yaqwayam enxoho elwagkasek teyp.