Read Lengua Sur Job 10 Bible Online

Job 10 - Lengua Sur bible

Job 10

¹¡Éleklágwokmek sekweynchámeykha! Altennaksek sa' ektémakxa aqsok megkaleklo ewáxok, mamágwakxeyk sa' axénmakha eklo ewáxok.

²¡Oh Dios, ná hexén aqsa ko'o sekteme seksexnánémaxche'! ¡Héltennés sa' yaqsa aqsok sesexnenagko ko'o!

³¿Táseya aptémakxa exchep setwáseykegkoho sektáhakxoho eykhe ko'o exchep apkelane? ¿Táseya aptémakxa sewanyeykencha'a, tén han ekleklamo chá'a apwáxok apkelányo ektémakxa aqsok apmáheyo elanagkok ma'a élmasagcha'a nak apkeltémakxa?

⁴¿Keya temék xépxa apwete aqsok ma'a ektémakxa nak negko'o negwete nentáha nak énxet?

⁵¿Yaqwátawóya exchepxa ektémakxa apyennaqte, ektéma nak énxet?

⁶¿Yaqsa eyke ektéma apketamsama nak chá'a aqsok magwaqhémo, tén han may'assáxma,

⁷neyseksa eykhe apwete meyke seksexnánémaxche', tén han apwete méko xama énxet apwanchek hewagkasek teyp neyseksa sema exchep?

⁸Xép apagko' axta han sélane, ¡keñe apmako kaxwók hemasséssók!

⁹Kaxénwakxoho apwáxok séláneya axta séñama yelpa': ¿xapop ánek ya makham peyk hetnessásekxa'?

¹⁰Axta apteméssessók émpehek séláneya m'a ektémól'a kalanaxchek weyke nagkeygmenek yáma ekyennaqte;

¹¹enegkenchessegkek ehápetek tén han émpehek, aptekxekkáseykekxeyk axta han mók exchakkok, apkeleykessegkek axta han éhahak;

¹²egkéssegkek axta sekyennaqte, egkéssegkek axta han seyásekhayo, xép setaqmelchesso nahan keñamak magwatsapma ko'o.

¹³Ekwet'ak eyke kaxwo' ekxéna apwáxok mók aqsok peya éxakpohok elána':

¹⁴éláneyha han apkeltamho étak may'assáxma, keñe eyaqmagkásekxak aqsok magwaqhémo.

¹⁵Yetneyk agkok ko'o aqsok ekmaso sélane, mammehek teyp; méko agkok sektémakxa, kaqhok kapayhekxak ewáxok, hakte mékoho etnessásekxa', tén han ekyaqhápeykha ewáxok.

¹⁶Eyeyxkók agkok ko'o, heyaqmaksek xép ektémól'a méwa, weykmók apkelane m'a aqsok sempelakkasso nak agweta' apmáheyo hemasséssók.

¹⁷Megkameykehek chá'a énxet séláneykha yaqwayam eltennasha sektémakxa ko'o exchep; Yágweykmók aqsa setaqnagko; ¡máxa sẽlpextétamo aptemék sektámeykmo meyke néxa'!

¹⁸¿Yaqsa axta ektéma apchahayo sekteyeykmo ko'o? Tásók axtal'a watsapok meykexho sekwetamaxche',

¹⁹tásók axta aqsal'a wañék méme awáxok amhagkok takhaxpop; máxa axta atnehek ma'a matyapma enxoho.

²⁰¡Elwatés sélya'assóxma'! hakte yaqwátawók ko'o sekha s'e náxop. Yoho sekxók kapayhekxak ewáxok yaqwatakxoho,

²¹amonye' sekxega meyke sekweyktamho chá'a, amonye' sekmahéyak ma'a ekyáqtéssamakxa agko' nak exma',

²²ekyetnamakxa nak ekho pessesse, magya'áseyak nak ektémakxa', ekyetnamakxa nak ekyáqtésso exma.