Read Lengua Sur Job 11 Bible Online

Job 11 - Lengua Sur bible

Job 11

¹Payhawók kólátegmowagkok ekyókxoho xa ektémakxa nak appaqméteykha naqsa. Énxet ekxámokma nak appeywa, ¿kapayhohoya chá'a aptáhakxa xa?

³¿Apkeneykeya exchep hẽlwanmeyásekxak xa aptémakxa nak chá'a appaqméteykha naqsa? ¿Apkeneykeya han méko kátegmowagkok chá'a m'a aptémakxa nak sẽlwanyeykha?

⁴Exénhok chá'a exchep ekpéwomo m'a aptémakxa nak chá'a appaqméteykencha'a, exénakpekxohok apagko' han chá'a apteme eyáxñeyo aptémakxa.

⁵¡Émenye' nak la'a ko'o exchep epaqhetchesek Dios yátegmowágkok!

⁶Keñe exekmósek ma'a negya'ásegwayam eyápomáxko nak agya'asagkoho', cham'a ekmáske nak. Keñe ékpelchágwók aplegassásegkoho ketsék xép ma'a Dios, megkaxnawo m'a ekwánxa nak eykhe ekpayhawo eñássesagkoho'.

⁷¿Apkeneykeya yepwának ey'asagkohok ekyókxoho m'a aqsok élpowásamáxche éleñama nak Dios, keñe han ey'asagkohok ma'a ekwánxa nak apteme ekha apmopwána?

⁸¿Háxko etnehek xeyep ey'asagkohok xa aqsok nak? Yeykhágweykmók ma'a néten nak, Yeykhágweykmók agko' ekmattawóneg ma'a élmaheykegkaxa nak eghagák, mopwanchek ey'asagkoho'.

⁹Awanhók agko', yeykhágweykmók ma'a ekwánxa nak ekyawe xapop, awanhek han ekpayhakxa', yeykhágweykmók ma'a ekwánxa nak ekpayhakxa wátsam ekwányam.

¹⁰Apkexyekmek sa' agkok Dios, keñe han apma enxoho xama énxet yaqwayam ékpelkohok aptémakxa', ¿yaqsa awanchek kanókasha?

¹¹Apya'ásegkok Dios ma'a énxet apteme nak chá'a apmopwána amya'a; apweteyak han ma'a ektémakxa nak aqsok ekmaso élánamáxche', ¿apkenagkamcheya exchep mey'ásegkok xa?

¹²Elya'ásegwók sa' aqsok melya'áseyak nak aqsok ma'a ekhem ekmassa sa' ekteme ekmeymente m'a yámelyeheykok.

¹³Ey'ókxés makham apwáxok ma'a Dios, elye'és néten apmék, yána epasmok ma'a.

¹⁴Yetneyk agkok xép mey'assáxma, eyenyekxa'; nágyoho keytek apxagkok ma'a aqsok ekmaso.

¹⁵Keñe sa' memegqáyhek chá'a, méko sa' katnehek apha, méko sa' han katnehek apkekakxa';

¹⁶kamaskok sa' kaxének apwáxok ma'a ektémakxa nak aplegeykegkoho; kalwánaqmak sa' ektémól'a yegmen kaxog.

¹⁷Kataqmelekxohok agko' sa' apweynchámeykha, kayeykhágwomhok sa' ma'a ekwánxal'a éltátchesso mayáhat yetseksók ekhem; kayáqtéshok sa' eykhe exma', máxa sa' eyke katnehek ma'a élseyél'a axto'o.

¹⁸Megkaqhók sa' etnehek mey'ásseyam, tásek sa' katnehek apha; tásek sa' chá'a katnehek apteyenma, hakte etaqmelchesek sa' Dios.

¹⁹Méko sa' chá'a keygwakkasek apkellókasa enxoho chá'a apyampé. Apxámok sa' énxet ey'áwak xép yaqwayam eltamhok epasmok.

²⁰Keñe sa' ma'a élmasagcha'a nak apkeltémakxa, kaqhók sa' etegyagkok ekpasmo; melwetágwomek sa' apkelyexanmomakxa', apkeletsapma sa' aqsa elhaxnagkok.