Read Lengua Sur Job 12 Bible Online

Job 12 - Lengua Sur bible

Job 12

¹¡Naqsók kéxegke kélteme chá'a apháxenmo kélpeywa m'a énxet'ák, kéletsekkek sa' agkok kéxegke, méko sa' etnehek ma'a apkelya'áseykegkoho nak aqsok!

³Yetneyk eyke ko'óxa sekya'áseyak, ekhawok ko'o kéxegke, méko megkay'ásegkaxa xa aqsok nak.

⁴Meyke sektémakxa eykhe ko'o méko han aqsok ekmaso sélane, hésmaksek aqsa chá'a m'a sélxegexma'a nak, yeyxhok axta han chá'a sélmaxnagko sélmaxneya enxoho m'a Dios.

⁵Énxet ektaqmalmo nak apha, ewanyohok aqsa chá'a m'a ekmaso nak apha; eyhog aqsa chá'a m'a ketók apyaqnenmakxa nak.

⁶Méko katnehek ektáhakxa apheykha apxanák ma'a apkelmenyexma nak; tásek katnehek apheykha m'a apkelenmexeykha nak chá'a Dios, yáwhok chá'a m'a ektémakxa ekha apkelyennaqte.

⁷Elmaxneyha kaxwók ma'a aqsok nawha'ák éllo, sa' kaltamaksek ma'a, elmaxneyha kaxwók ma'a náta, sa' kalxekmósek ma'a.

⁸Elmaxneyha kaxwók xapop, sa' kaltamaksek ma'a, elmaxneyha kaxwók ma'a kelasma élleykha nak wátsam ekwányam, sa' kalxekmósek ma'a.

⁹Apyókxoho énxet'ák apkelya'ásegkók aptáha Dios apkelane xa ekyókxoho nak.

¹⁰Dios apmeykha élyennaqte ekyókxoho aqsok ekha nak élennama.

¹¹Agyekpelkohok amya'a m'a egheyk'ák, ekhawo han ma'a ektémakxa nak egátog agyekpelkohok ekmátsa nento.

¹²Yetneyk ektémakxa apkelya'áseykegkoho aqsok ma'a apkelwányam nak; ekwenaqte apkelweynchámeykha ekmésso apkelya'ásegwayam.

¹³Dios akke m'a ekha nak apya'áseykegkoho, tén han apyennaqte; cha'a apkeláneykekxa han chá'a yaqwánxa etnehek ma'a, keytlawhok han chá'a apkelane,

¹⁴Dios nak apmassésseyam aqsok, méko kawának kaxátekhásekxak makham; Dios nak apkelma, méko kawának kalántekkesek.

¹⁵Apmágkek agkok ekmámeye, keymeyk ekyókxoho; apyenyeykxeyk agkok ma'a, kápok yegmen ma'a xapop.

¹⁶Apmopwána chá'a keñamak ekmallahanchesso m'a. Apkeláneykha han ma'a kélyexancháseykha nak chá'a, tén han ma'a apkelyexancháseykha nak chá'a pók.

¹⁷Emassésseshok nahan chá'a apkelya'áseykegkoho aqsok ma'a apmopwancha'a nak aqsok, élyeyháxma chá'a etnéssesek ma'a énxet'ák segyekpelchémo.

¹⁸Meyke kéláyo chá'a etnessásekxak ma'a kelwesse'e apkelwányam, yának chá'a elmakpok kólnaqlakxak meyke apáwa.

¹⁹Elwátésseshok chá'a ektémakxa aptamheykha m'a apkelmaxnéssesso nak énxet'ák apagkok, kóneg chá'a etnessásekxak ma'a ekha nak kéláyo.

²⁰Elwanmeyásekxak chá'a m'a apkelpaqhetcháseykha nak chá'a apnámakkok ekha kéláyo, emassésseshok chá'a ektémakxa ektaqmalma apkelyekpelchémo m'a apkelwányam nak.

²¹Meyke kéláyo chá'a etnessásekxak ma'a kelwesse'e nak, elyélaqtéshok han chá'a m'a ekha nak apkelyennaqte.

²²Henxekmóshok han chá'a m'a aqsok ekpowásamáxkoho agko' nak, yáxña'akxoho chá'a enegkenekxak ma'a ekhéyak nak ekyáqtésakxa exma.

²³Exátekhaksek nahan chá'a apkelókxa m'a, keñe emasséssók han chá'a, yexpánchesek han chá'a énxet'ák, keñe yánchásekxak nahan chá'a.

²⁴Emasséssesek chá'a apkelmopwancha'a aqsok apkelámha apmonye'e xama apchókxa', ey'aksek chá'a meykexa énxet yának elweynchamha aqsa m'a meyke apkelya'áseyak,

²⁵apkelpaknameykegkaxa nak chá'a elxog neyseksa ekyáqtessóxma, elyawheykha chá'a aptémól'a anmen át'ák.