Read Lengua Sur Job 16 Bible Online

Job 16 - Lengua Sur bible

Job 16

¹Xámokmeyk ko'o seklege xa ektéma nak amya'a. Élyánchessásegko aqsa seklegeykegkoho, mehélpeykessásekxak ewáxok.

³¿Megkólwátesagkeya sa' kélpaqméteykha naqsa? ¡Hélátegmowagkok aqsa chá'a!

⁴Temék agkok han kéxegke s'e setnamakxa nak ko'o, atnehek ko'óxa alpaqhetchesek kéxegke xa ektáha nak; ayeykesha chá'a épátek alanok kéxegke, keñe alpaqhetchesek chá'a ekxámokma agko',

⁵cham'a sekpeywa ektaqmeleykha, ekpeykeseykekxa nak egwáxok, yaqwayam enxoho agkeyásekxak kélyennaqte tén han alwasqakkásekxoho'.

⁶Ekpaqmetchek aqsa agkok ko'o, megkamasseksek ma'a seklegeykegkoho, ekwanmakkek agkok han, megkaxyawásekxék ma'a setnamakxa.

⁷Apmasséssek sekyennaqte m'a Dios; élyementamákxeyk han apyókxoho étchek,

⁸exnéssegkek kañe' negmomaxchexa'. Énmexáha sexéneyncha'a; apmopwána amya'a aptáhak sexéneyncha'a.

⁹Eyaqmáseyha ko'o Wesse' egegkok, apkelpáxqatchek émpehek, máxa aqsok nawhak eklo etnessásak apmako heyaqhek, megyeyásak sélano, máxa sénmexma aptáhak.

¹⁰Apxámok énxet sénmexma ko'o, élántekkessáseyha apaqta'ák, etekpagáha apkeltamho amegqe'.

¹¹Apchahayók Dios semoma ko'o m'a énxet'ák élmasagcha'a nak apkeltémakxa', tén han élyeyháxma nak.

¹²Méko axta ko'o ektémakxa sekha, keñe seyaqhakkasa eyespok; eyaqhapchek axta setnéssásekxo nekha'a étkók. Epékássawok nahan semakta'a yágke apagkok.

¹³Máxa keñamak sélyáte yágke apagkok; kelyaqxakkak sekyókxa', meyke apmompyósa sélányo, kexpaqnáha náxop ekhéyak ewáxok.

¹⁴Apxámássek sélyensasso, máxa kempakhakma yáp aptáhak sektamakmo.

¹⁵Yetlo ekyentaxno ewáxok élántaxneykxak ma'a apáwa sẽlwáxaqxamo nak, ekheyk náxop sektekxeya xapop épátek sekmegqakto.

¹⁶Yephék nahát sekwóno; kelhagqak ahaqta'ák,

¹⁷meynnaqteyáseykegkaxho émpehek alának xama énxet, ektáhakxoho eyáxñeyo sélmaxnagko.

¹⁸Keso ekmaso sélteméssesakxa nak ko'o, kéméxcheyk kalanaxchekxak heykxa amya'a; ¡xapop, nágkakpós aqsa m'a sélmaxneyeykha nak!

¹⁹Apheyk xama énxet ma'a néten yaqwayam hexének hepasmok,

²⁰apmopwána nak exének nápaqtók Dios ma'a ektémakxa élchetámeykha ewáxok, yaqwayam enxoho étak ektémakxa sélekxagweykha m'a;

²¹xama énxet yaqwayam epaqmétek nápaqtók Dios hemyók ko'o, aptémól'a énxet elpaqhetchesakpohok pók yaqwayam emyók ma'a apxegexma.

²²Peyk kasawhaxchek ekhem sekweynchámeykha, kaxwók sa' axog meyke sekweyktámho.