Read Lengua Sur Job 17 Bible Online

Job 17 - Lengua Sur bible

Job 17

¹Yaqwatchek ko'o kaxwo' sénnama; chágketwokmek néxa ekhem ahagkok; élhaxneyk kaxwók ma'a takhaxpop.

²Ellektegmaha aqsa chá'a hélanok ma'a énxet'ák; yókxoho ekhem sekwete setaqnaweykha.

³Wesse', apwanchek eyke exchep heyátegmakkasagkok; ¡wánxa aqsa apwanchek etnehek xa!

⁴Xép apmasséssessamo nak apkelya'áseykegkoho aqsok. Nágyoho aqsa hetnessásekxak kóneg.

⁵Meyk sa' kalnápok apketchek ma'a énxet kélmésso nak chá'a ekyánmaga yaqwayam elsexnenak apnámakkok.

⁶Xép apteméssesso apkeltémo chá'a kalesanchaha apkelpeywa hexének apyókxoho énxet'ák, elexpaqhak chá'a apyamánog nahát.

⁷Kelhánaqtéssegkek ahaqta'ák seklegeykegkoho ekmáske; taqmelcháseykegkók ekweyweykento sekyennaqte, ektémól'a pessesse kaxog.

⁸Elyegweyk chá'a étak setnamakxa m'a éltaqmalma nak apkeltémakxa; hetaqnók chá'a hexének sekteme magwáyo Dios.

⁹Elxének chá'a aptamhéyak ekpéwomo apkeltémakxa, tén han melánéyak aqsok ekmaso.

¹⁰Hélyo'óta hana ko'o kélyókxoho kéxegke, mótyehek sa' ko'o xama enxoho kélnepyeseksa apya'áseykegkoho nak aqsok.

¹¹Peyk kasawhaxchek ekhem sekweynchámeykha, megkatyapmak ma'a aqsok sekmáheyo nak alána', eyaqhémo temégweykmok ma'a ekmámenyého nak ewáxok.

¹²Ekhem kéxegke kéltemessáseykekxak ma'a axta'a; megkahaxanmak chá'a ekyáqtésso exma kélxeyenma eyágketwaya élseyéxma.

¹³Nétsapma eyke aqsa ko'o ewanchek aleyxek, keñe eytnók atyenwók ma'a ekyáqtésakxa nak exma'.

¹⁴¡Keñe sa' atnehek wának takhaxpop se'e: xeye' ekteme táta ahagkok, keñe sa' atnehek alának yápa apketkók se'e: kéxegke kélteme méme ahagkok tén han élyáxeg!

¹⁵¿Háxko ekmahágkaxa m'a sélhaxanma axta? ¿Háxko ekmahágkaxa m'a ektaqmalma axta sekha?

¹⁶¿Hétlawhoya sa' xamo' ma'a apkelmaheykegkaxa nak apkeletsapma, yaqwayam enxoho óllókasek nélyampe xamo' aghagkok kañe' xóp?