Read Lengua Sur Job 21 Bible Online

Job 21 - Lengua Sur bible

Job 21

¹Sekpeywa eyke aqsa ko'o émenyeyk kóleyxho, yaqwayam enxoho héltaqmelchessásekxak ewáxok.

³Ná hélpekhés chá'a sekpaqmeta enxoho, keñe sa' sekpenchesa enxoho chá'a, kélwanchek kóllektegmaha.

⁴Háwe ko'o énxet xamo' sélátegmómaxko nak chá'a; cháxa keñamak may'áseykegko nak chá'a sektémakxa.

⁵Éllanawók agkok ko'o, kólwanmeyagkok sa' sélaye.

⁶Xénwákxok agkok chá'a ko'o ewáxok ma'a setnamakxa nak, kapexchak chá'a émpehek; kalpexyennók chá'a sekyókxa'.

⁷¿Yaqsa ektéma ekwenaqtamo nak chá'a apheykha m'a élmasagcha'a nak apkeltémakxa? Apkelwányamók chá'a etnahágkok, kaxámagkok chá'a aqsok apagkok.

⁸Elwetak chá'a yektog ma'a apketchek, tén han aptawán'ák, méko chá'a katnehek ektáhakxa apheykha.

⁹Méko katnehek apkekakxa m'a apxanák nak; mellegássesagkók nahan ma'a Dios.

¹⁰Kaxámagkok chá'a étkók ma'a apnaqtósso; tásek chá'a katnehek ekpalchesso étkók.

¹¹Enaqtémha chá'a m'a apketchek, eneywagkok chá'a aptémól'a nepkések apketkók,

¹²eneywagkok chá'a yetlo élpayheykekxa apkelwáxok, elnextegmakha han chá'a néten neyseksa kélpáwasso arpa, tén han aqsok kéltekpaga, keñe han yámámok.

¹³Elmassegwók chá'a yetlo ektaqmalma apheykha; elántexek chá'a takhaxpop yetlo meyke ektáhakxa'.

¹⁴Etnehek chá'a yának Dios se'e: “¡Ná hẽlye'és exma, mogmenyeyk negko'o agya'ásegwók segánamakxa apagkok!

¹⁵¿Yaqsa m'a ekha nak Apyennaqte, yaqwayam enxoho negko'o ólpeykesho'? Méko aqsok negko'o hegwetaksek ólmaxnak nápaqto' ma'a.”

¹⁶(Háwe eyke apagkok ektaqmalma nak apheykha m'a élmasagcha'a nak apkeltémakxa. ¡Megkalxegkáseykha ko'o katnehek élchetamso ewáxok ektémakxa nak ma'a!)

¹⁷¿Kamassegwomhoya chá'a apkelweynchámeykha m'a élmasagcha'a nak apkeltémakxa? ¿Káhapwohoya han chá'a ekmaso apheykha? ¿Eltaqnaweygkohoya han chá'a Dios? ¿Ellegássesagkohoya han chá'a?

¹⁸¿Agwethoya chá'a kólexpánchesek, ektémól'a pa'at apák kalsók samaxche éxchahayam agkok?

¹⁹Kaxénaxkoho nak chá'a Dios apkellegassáseykegkoho kélketchek eñama apkeltémakxa ekmaso m'a apyapmeyk nak. Eyke payhawók kóllegássesagkohok ma'a ekmaso nak aptémakxa, tén han kólestéhegkesek.

²⁰Cháxa payhawok exkak kéllegassáseykegkoho m'a eñama aplo m'a ekha nak Apyennaqte.

²¹Apketsekkek agkok ma'a, megkaxének apwáxok yaqwánxa katnehek ekheykha m'a ekheykha nak apxagkok.

²²(¡Méko awanchek kalxekmósagkok ma'a Dios, kawomhok apkelyekpelchémo m'a apheykha nak néten!)

²³Yetneyk chá'a apkeletsapma énxet élyennákxoho apyempe'ék, tén han élpayheykekxa apkelwáxok, keñe han meyke ektáhakxa apheykha,

²⁴ektaqmalma agko' apheykha, tén han meyke apkelháxamap.

²⁵Yetneyk eyke han chá'a pók eklo apwáxok, tén han apkeletsapma chá'a meyke apkelwete élpayheykekxa apkelwáxok.

²⁶Meyeykhakpek eyke pók ma'a kañe' nak takhaxpop; etawagkok chá'a m'a yápa apketkók.

²⁷Ekya'ásegkók eyke ko'o ektáhakxa élchetamso kélwáxok kéxegke séllano ko'o, tén han ekmaso yaqwánxa kóltéhek.

²⁸Kéltáhak kéltegyeyncha'a amya'a s'e: “¿Háxko apyetnákxexa apxagkok ma'a wesse' ekmaso aptémakxa, apnaqtawáseykegkoho nak énxet'ák apagkok?”

²⁹¿Yagkólmaxneyeykha chá'a kéxegke m'a énxet'ák apkelxega nak chá'a? ¿Yagkóllegeyk kéxegke eltennasha aqsok ma'a:

³⁰apkelxeyenma nak chá'a aplawa enxoho Dios yáphaksek ekmaso negha, keñe megkatnégwomok exma m'a ekmaso nak aptémakxa?

³¹Méko kaxénchásekxohok ma'a aptémakxa, méko kañássesagkoho', ekpayhawo neykhe kóltéhek kéllegassáseykegkoho.

³²Keñe ekwokmo enxoho néxa apha, kólsók yaqwayam kólátawanyek, apyókxoho énxet elyetlók, nápakha elxog ma'a apmonye', keñe nápakha han ma'a neptámen, kóllanha han ma'a takhaxpop apagkok, kawomhok han xapop ekmomhápa elano'.

³⁴¡Kaqhók kéxegke kóltamhok héltaqmelchessásekxak ewáxok! ¡Wanchek amya'a m'a ekyókxoho kéltémakxa nak chá'a kélpeywa!