Read Lengua Sur Job 24 Bible Online

Job 24 - Lengua Sur bible

Job 24

¹¿Yaqsa ektáha mepekkena nak ekwánxa ekhem Dios yaqwayam elyekpelkohok énxet'ák? Yaqwayam enxoho elwetak ma'a apkelxegexma'a nak.

²Yaqxegkesagkohok chá'a néxa xapop apagkok ma'a élmasagcha'a nak apkeltémakxa', elmenyexek han chá'a nepkések yaqwayam exámasagkok ma'a nepkések apnaqtósso,

³elyementamok chá'a aqsok eknaqtósso m'a élyeheykha, keñe han ma'a xentampe'e.

⁴Elyetnakhaksek chá'a énxet'ák meyke aqsok apagkok ma'a ámay apagkok, keñe m'a énxet'ák apkelmopyóseka nak elyexanmok chá'a.

⁵Máxa yámelyeheykok nawha'ák élleykha nak meykexa énxet aptamheykegkok aptegyeykegko aptéyak ma'a meyke nak aqsok apagkok, cha'a éleñamakxa han chá'a apwetasso ektéyak ma'a apketchek.

⁶Elmahagkok chá'a etegyagkok aqsok kélcheneykekxa m'a pók énxet apkelchekha, elmahagkok chá'a etegyagkok anmen yámet ekyexna m'a apkeneykekxexa nak anmen yámet ma'a élmasagcha'a nak apkeltémakxa.

⁷Enaqtének chá'a axta'a meyke apkelaqlamap, meyke apkenchesso nak apmopsamáge.

⁸Kalyássesek chá'a yegmen élpexyaweykenta nak meteymog élekhahéyak, elyepetchegwók chá'a meteymog etegyagkok apkelyexanmomakxa'.

⁹Kólyementamagkok chá'a étchek kaxwe appalleyam ma'a xentampe'e nak, keñe m'a meyke nak aqsok apagkok, kólyementamok chá'a apketchek ekyánmaga aqsok kélmassáseykha.

¹⁰Meyke aptaxno chá'a eweynchamha meyke nak aqsok apagkok, meyk agko' nahan chá'a katnehek neyseksa apnakxo hótáhap apaktek.

¹¹Elyeykesek chá'a meteymog aqsok ektekxekxo yaqwayam etekkesek pexmok égmenek; elteyammok nahan chá'a anmen yámet ekyexna yaqwayam elának vino hem agko' nahan chá'a katnehek neyseksa apkelteyáyam.

¹²Ellekxámog chá'a ketók apkeletsapmakxa nak ma'a tegma apwányam, elápentegmakha chá'a, meñék eyke Dios ma'a apkelmaxneyéyak.

¹³Yetneyk énxet aptaqnagko nak élseyéxma, étnakhaksek chá'a m'a ekyókxoho ámay apagkok nak.

¹⁴Amonye' élseye chá'a exatakhak ma'a ekyetno nak apyógkexma, yaqwayam yaqhek ma'a énxet meyke nak aqsok apagkok, keñe axta'a etnekxak chá'a apmenyexma.

¹⁵Eleyxek chá'a kayáqtések ma'a énxet aptawáseykegkoho nak aptáwa' apkelane mók, yáhakkasek chá'a nápat katnehek kalchetmok apwáxok se'e: “Méko sa' hékpelkoho'.”

¹⁶Axta'a chá'a elántexek tegma m'a apkelmenyexma nak. Melántépek chá'a apyókxoho m'a ekhem; hakte mopmenyeyk élseyéxma.

¹⁷Ekyentaxno ekyáqtésso aptemessáseykekxak apkelányo m'a ekhem éltátchesso nak; megkalyegwakkasek axta'a m'a aqsok segyegwakkassamo nak.

¹⁸Kelsamchek yegmen ma'a élmasagcha'a nak apkeltémakxa. Ektaqnómaxche' aptemessáseykekxak Dios ma'a xapop apagkok nak, méko kaxwók katneykha m'a apkeneykekxexa nak anmen yámet.

¹⁹Elpayhekxak chá'a yeyam appok ekmexanmakxal'a exma, tén han ektémakxal'a meyke yegmen; keñe takhaxpop emassegwók chá'a m'a mey'assáxma nak.

²⁰Kalwánaqmak sa' han ma'a egken agko' nak; yápa apketkók sa' etwok, méko sa' han kaxénwakxohok chá'a awáxok ma'a. Máxa yámet kélyaqtónma sa' etnehek eyaqnenek ma'a ekmaso nak aptémakxa.

²¹Meltaqmelchesek axta chá'a m'a kelán'ák megkalwete nak étchek, tén han ma'a xentampe'e nak; axta epasmók xama enxoho.

²²Elyaqnegkeshok eyke chá'a Dios yetlo apyennaqtésso apyempehek ma'a apkelyennaqte nak; apkelanak agkok chá'a aqsok, méko kawagkasaxchek teyp.

²³Apchahayók eyke aqsa chá'a Dios eweynchamha yetlo meyke ektáhakxa, apkeláneykha eyke chá'a m'a ektémakxa apkelweynchámeykha.

²⁴Yaqwatakxoho chá'a etnehek néten ma'a ekmaso nak aptémakxa, yahamok eyke emassegwók. Máxa pa'at kélpátekkesso ekyamaye etnehek, máxa hótáhap apyexna kélyaqténma etnehek.

²⁵Agkok katnahak xa, ¿Yaqsa awanchek katnéssesek megkatnaha naqsók aqsok sekxeyenma, tén han kaxekmósek magwaqhawo sektáhakxa?