Read Lengua Sur Job 29 Bible Online

Job 29 - Lengua Sur bible

Job 29

¹¡Katnekxoho annal'a makham setnamakxa axta nano', setaqmelchessama axta chá'a Dios!

³sélsássessama axta chá'a exma, keñe sekmowagko chá'a ko'o axog neyseksa ekyáqtésakxa exma;

⁴matnamakxa axta sekwányamo séláneseykencha'a axta chá'a exagkok Dios;

⁵aptéma axta chá'a sekxegexma m'a ekha nak Apyennaqte, sepasmeykencha'a axta chá'a m'a étchek;

⁶ekyetnama axta chá'a ekyawe weyke nagkeygmenek, ektekkessama axta chá'a pexmok égmenek ma'a meteymog;

⁷sekhama axta chá'a apchaqneykekxexa nak énxet'ák ma'a tegma apwányam.

⁸Apkelyetnakhayo axta chá'a emonye' wokma'ák sét'a enxoho yaqwayam ayeykha', apkelchampeykekxo axta chá'a néten hétak ma'a apkelwányam.

⁹Kawomhok axta chá'a apkelwanmeyeykekxa m'a énxet'ák ekha nak kéláyo, yának axta chá'a kalwónekxak exma.

¹⁰Kamaskok axta chá'a elyennaqtéshok apkelpeywa m'a apkelwesse'e nak; elwanmeyekxak axta chá'a.

¹¹Kaltaqmalmakha axta chá'a apkelpeywa énxet'ák hélának sét'a enxoho, kaltaqmalmakha axta chá'a apkelpeywa hexének aphaxnawo enxoho sekpeywa,

¹²hakte apasmok axta chá'a ko'o m'a élyeheykha nak, tén han ma'a meyke nak aqsok apagkok, cham'a énxet'ák meyke nak ekpasmo.

¹³Hegkések axta chá'a ko'o ekpayheykekxa apkelwáxok ma'a ketók apkeletsapmakxa nak; alpeykessásekxak axta chá'a awáxok sekpasma enxoho ko'o m'a xentampe'e nak.

¹⁴Ektaxneykekxeyk axta ko'o m'a ekpéwomo nak nentémakxa, eyáhakkásamaxcheyk axta: máxa sétchesso épátek axta ektemék ma'a meyke nak sektémakxa'.

¹⁵¡Ko'o axta chá'a seknaqleykha m'a meyke nak apaqta'ák, tén han sekpasmo chá'a m'a meyke nak aptapnák,

¹⁶máxa apyáp axta ko'o etnék ma'a ekha nak chá'a eyeyméxchexa aqsok aphágkaxa, tén han sélátegmakkáseyak chá'a amya'a m'a apkeleñama nak mók nekha!

¹⁷Élekkexchessegkek axta chá'a ko'o apmáxempenák élmasagcha'a nak apkeltémakxa, élhaxyawássesseykekxeyk axta chá'a apwáxok ma'a apmáheyo nak etwok.

¹⁸Axta katnehek chá'a ko'o ewáxok se'e: “Xámok agko' sa' katnehek ekhem sekha, ektémól'a xapop ánek ekxákma; sekwányamók sa' watsapok, tén han ma'a exagkok nak.

¹⁹Ekhémók axta ko'o m'a yámet kélcheneykekxa nak neyáwa yegmen, élyássessamól'a áwa' m'a yálye ektéyeykmoho nak axta'a.

²⁰Axnagko' sa' katnekxak makham ma'a ektémakxa nak ekha séláyo, megkameykehek sa' sekyennaqte.”

²¹Heyeyxhok axta chá'a apyókxoho énxet'ák, elwanmeyagkok axta chá'a eleyxek yaqwánxa atnehek alpaqhetchesha.

²²Melpaqmétekxók axta han chá'a sekpenchesa enxoho chá'a ko'o sekpaqmeyesma. Máxa axta yegmen eksekkenma katnehek kapálwaták sekpeywa nepyeseksa m'a énxet'ák nak,

²³elhaxnagkok apagko' axta han chá'a sekpeywa m'a, ektémól'a kalhaxnaxchek ekmámeye ekmexanmakxal'a exma.

²⁴Chátseyha axta agkok chá'a ko'o nahát alanok ma'a énxet'ák éllegeykegkoho nak apkelwáxok, kalpayhekxohok axta chá'a apkelwáxok hélano', yetlo éllómo apyempe'ék.

²⁵Ko'o axta chá'a sekteme sémha emonye' nepyeseksa m'a, tén han séltennasso chá'a yaqwánxa elanagkok, máxa wesse' apwányam axta ektemék apxegál'a apmonye' sẽlpextétamo apagkok. Kelyaqhápawók axta agkok chá'a apkelwáxok, alpeykessásekxak axta chá'a apkelwáxok.