Read Lengua Sur Job 32 Bible Online

Job 32 - Lengua Sur bible

Job 32

¹Xama axta apkelwet'a melwátéssekmo Job apxeyenma meyke aptémakxa xa apqántánxo énxet nak, apkelwátesagkek axta appaqhetchesso.

²Keñe axta xama énxet apwesey axta Elihú, Baraquel axta apketche, apteme axta buzita, Ram axta aptáwen neptámen, massék axta apmágweykxo apmáheyo etaqnók ma'a Job, melwátéssekmo apxeyenma apteme meyke aptémakxa, appehessákxo chá'a aptaqnagko m'a Dios.

³Apkeltaqnaweygkek axta han ma'a apqántánxo apnámakkok nak Job, eñama megkamopwána chá'a apchátegmowéyak, máxa megkapayhawo axta aptemessásak aptáhakxa m'a Dios.

⁴Apkelhaxneyk axta aqsa han epenchesagkok apkelpaqhetchesso Job ma'a apqántánxo nak, hakte apketkok apagko' axta m'a Elihú, maxta exnawok ma'a;

⁵keñe axta apwet'a mey'ásegko kaxwók etnehek yátegmowagkok ma'a énxet'ák nak, massék axta apmako ewanmak aqsa

⁶yetlókok axta appaqmeyesma. Élnawágweykxeyk xeyk ko'o sekmako altennaksek ektáhakxa élchetamso ewáxok, hakte étkok ahagko' ko'o, maxnawok kéxegke, kélwányam.

⁷Exchek táhak ewáxok se'e: “Elpaqmétek apagkok xa apkelya'áseykegkoho nak ekyókxoho aqsok; exekmósek sa' ektémakxa apkelya'áseykegkoho hakte apxámok apyeyam apkelweynchámeykha keso náxop.”

⁸Apyókxoho énxet'ák ekha apkelya'áseykegkoho aqsok, hakte ekha Apyennaqte espíritu apagkok apkelmésso.

⁹Megkatnéssesek apmopwána aqsok énxet apxámokma apyeyam apha, háwe han apwányamók ekwetasso chá'a apya'áseyak aqsok.

¹⁰Cháxa keñamak sektáha nak se'e: “Kóleyxho sa' kaxwók sekpeywa, yetneyk ko'óxa aqsok yaqwayam axének.”

¹¹Ekhaxnawók xeyk ko'o kélxéna exchek kéxegke, ekleg'ak xeyk nahan, ekhaxnawók xeyk kéltegyáncha'a yaqwánxa kóltéhek kélpeywa,

¹²ekwet'ak xeyk nahan kéxegke megkólewagko kélxama enxoho kóltennaksek megkapayhawo aptáhakxa m'a Job.

¹³Nágkólxén aqsa kéxegke kélteme kélmowána aqsok, Dios sa' yátegmowagkok ma'a, háwe xama énxet.

¹⁴Makke ko'o hepaqhetchessók ma'a Job, matnehek sa' han ko'o wátegmowagkok ma'a kéltáhakxa exchek kéxegke.

¹⁵Job, melya'ásegkok aptamhágkaxa s'e apqántánxo nak, hakte méko kaxwók etnahagkok yátegmowagkok;

¹⁶nágyána aqsa ko'óxa awanmégwak se'e, aptamhágko nak xa, hakte méko táhak yaqwánxa etnehek yátegmowagkok.

¹⁷Wátegmowagkok sa' ko'óxa, axének sa' ma'a sekmako nak axének.

¹⁸Xámok ko'o yaqwánxa atnehek sekpeywa, massék seyewagko peya amágwakxa';

¹⁹epekhéssek sekmáheyo apaqmétek máxa ektáhak ma'a vino kélyetál'a yempehek axnagkok ekmáheyól'a kanmog.

²⁰Apaqmétek sa' yaqwayam enxoho alánegwók ektáhakxa ewáxok, wátegmowagkok sa'.

²¹Megkataqmalmakha sa' ko'o sekpeywa axének xama énxet; meyke apyeykhamap pók sa' atnéssesek apyókxoho.

²²Meheltámeyeyk ko'o ektaqmeleykha sekpeywa axénmakha xama énxet; ¡ektemék agkok xa, heñássesagkohok sa' ma'a apteme nak Senlane!