Read Lengua Sur Job 35 Bible Online

Job 35 - Lengua Sur bible

Job 35

¹Job, apkenagkamcheya exchep kapayhohok etnehek se'e: Dios sa' exének ekpayhawo sektáhakxa'.

³Aptemék han xép apkenagkama Dios se'e: “Megkaphemmek xép ma'a sélana enxoho may'assáxma, megkatwássesha apha m'a may'assáxma.”

⁴Ko'o sa' eyke wátegmowagkok xép, tén han ma'a apnámakkok nak.

⁵Yenmexho hana néten, elano, netnók ma'a yaphope apyetseksek nak.

⁶Apkelanak agkok mey'assáxma, megkatwássesha apha m'a Dios; xámok agko' eykhe katnehek apkelane mey'assáxma, megkatnéssessamók eyke exma.

⁷Tásek agkok han aptáhakxa', méko egkések; méko aqsok ektaqmela egkések.

⁸Eyke katwássesha apheykha mey'assáxma m'a énxet'ák aphawo nak xép, tén han kataqmelchessesek apheykha m'a aptémakxa ektaqmela nak.

⁹Yentexek agkok kélnaqtawáseykegkoho énxet'ák, elwehesha chá'a, keñe etegyaha chá'a yaqwayam kalwagkasek teyp neyseksa apkelma m'a apkelyennaqteyáseykha nak apyempe'ék;

¹⁰keñe melyo'ókxeyk ma'a Dios ektáha axta apkelane, apkelmésso nak chá'a apkelyennaqte ekwa'a enxoho chá'a ekyáqtésso agko' exma,

¹¹segyeykhássesseykmoho nak chá'a sẽlxekmósso m'a aqsok nawha'ák nak keso náxop, tén han náta.

¹²Elpáxamha eykhe chá'a, megyátegmowagkek eyke Dios, hakte énxet'ák élmasagcha'a apkeltémakxa tén han apkeleymákpoho m'a.

¹³Megyeyxók Dios ekha nak Apyennaqte m'a negmowána amya'a nak.

¹⁴Ekyágwánxa agkok xép apxeyenma nak chá'a méteya Dios, eleyx aqsa, hakte yetnegkek xép aptémakxa nak ma'a aphakxa nak.

¹⁵Apxeyenmeyk chá'a exchep Dios melwehe', tén han mehenlegássesagko', tén han melanók apagko' ma'a magya'assáxma.

¹⁶¡Job, apxeyenmeyk eyke aqsa exchep aqsok mékoho, appaqméteykha aqsa chá'a exchep meyke apya'áseyak!